قۇرالايدى كوزگە اتقان جالعىز كوزدى ءالىباي

نۇر-سۇلتان. قازاقپارات - ەرتەرەكتە زايسان قالاسىنىڭ قاق ورتاسىندا ات شاپتىرىم اۋماعى بار ورتالىق الاڭ بولدى. كەڭەس ۇكىمەتىنىڭ تۇسىنداعى مەرەكەلىك شارانىڭ بارلىعى وسى الاڭدا وتكىزىلەتىن.

سول الاڭدا ورنالاسقان «جۇلدىز» كينوتەاترىنىڭ ءدال ىرگەسىندە سىرتى اعاش شارباقپەن قورشالعان وتىز شاقتى اسكەريلەر بەيىتى بار بولاتىن.

كوپ بەيىتتىڭ اراسىندا ماڭدايشاسىندا قىزىل جۇلدىزى بار ورتاداعى ۇلكەن بەيىت بىردەن كوزگە تۇسەتىن. بالالىعىمىز بولار، «ول جەردە جاتقاندار كىمدەر جانە نە ءۇشىن بارلىعىن ءبىر جەرگە جەرلەگەن؟ - دەپ ەشكىمنەن سۇراماپپىز. مۇنىڭ سىرىن بەرتىن، تاعى ءبىر ورايى كەلگەندە اڭگىمەشى قاريا، مارقۇم ەرجاننىڭ تولەگەنى تارقاتىپ ايتىپ بەرگەن.

شاتقالداعى شايقاس

- شىعىستاعى التاي، ساۋىر تاۋلارىن ەجەلدەن كەرەي رۋلارى مەكەندەيدى. سولاردىڭ ءبىرى - جاۋگەرشىلىگىمەن، باتىرلىعىمەن اتى شىققان مەركىت رۋى. ساۋىردى ەن جايلاعان وسى رۋدىڭ باسشىسى ءارى اقىلگوي قامقورشىسى تۇرعانباي دەگەن ءبي بولىپتى. كەڭەس ۇكىمەتى ورناعاننان كەيىن ەلدىڭ ىشىندەگى باس كوتەرەر سەركەلەرىن تۇتقىنداۋ، سوتتاۋ كوبەيىپ، زاڭ كۇن وتكەن سايىن قاتايا باستايدى. حالىق قاسقىردان ۇرىككەن قويداي ءۇرپيىپ: «ەندى نە بولار ەكەن؟ ەرتەڭ كىمدى تۇتقىندار ەكەن؟» - دەگەن ۇرەيمەن تاڭىن اتىرىپ، كۇنىن باتىرىپ جاتادى.

كۇندەردىڭ كۇنى ەل اراسىندا: «تۇرعانباي باستاعان بىرنەشە ەل جاقسىلارىن ۇستايتىن بولىپتى»، - دەگەن سىبىس شىعادى. مۇنى استىرتىن بىرەۋلەر ارقىلى ەستىگەن ولار اقپان-ناۋرىز ايلارىندا قىتاي اسپاققا بەكىنەدى. وكىنىشكە قاراي، ولاردىڭ بۇل ارەكەتتەرىن ۇزىنقۇلاقتان ەستىپ-بىلگەن قىزاي ىرگەبايەۆ دەگەن ساتقىن قارۋلى وتريادقا حابارلاپ قويادى. شاعانوبا، قىزىلقيا، اققولقا دەگەن شەكارا زاستاۆتارىنان 40-50 دەن اسكەر شىعىپ، كوشتىڭ الدىن ورايدى. قار قالىڭ، بۇلتارىس- قالتارىسى كوپ تاۋ جولىنان مال وزدىگىنەن وتە المايدى.

ادامدار اسۋ سايىن قاردىڭ ۇستىنە كيىز توسەپ، مالدارىن زورعا دەگەندە وتكىزىپ وتىرادى. كۇن سۋىق، مال ارىق. وسىلايشا جۇرىستەرى ماندىماي، اۋىر ازاپپەن كەلە جاتقان كوشتى سولداتتار قاماپ الىپ، اتقىلاي باستايدى. ءبىراز ادام ءولىپ، مالدىڭ كوبى قىرىلادى. سولداتتاردان جانساۋعالاپ امان قاشىپ قۇتىلعان تۇرعانباي ءبي باستاعان 18 ادام ءبىر جەرگە جينالادى. الگىلەردىڭ اراسىندا ءالىباي مەرگەن دە بار ەكەن. اۋىر ازاپپەن ساسىق بۇعى دەگەن اسۋعا كەلىپ جەتەدى.

ساسىق بۇعىنىڭ اسۋى قىس تۇگىلى جازدا اتپەن جۇرۋگە قاۋىپتى، تىم شاتقالدى، قىساڭ قيالى جەر ەكەن. ابىروي بولعاندا بارلىعىنىڭ استارىندا تەڭدەپ العان كيىزدەرى بار. بۇعان دەيىن دە تالاي جولسىز جەرلەردەن جول تاپقان ءالىباي باتىر بۇل جولى دا قيا شاتقالدان جول تاۋىپ، قاسىنا ەرگەندەردى تەرەڭ شاتتىڭ ىشىنە تۇسىرەدى. نەشە كۇننەن بەرى ارىپ-اشقان ازاماتتار كەلگەن بەتتە جوتاعا ءبىر جىگىتتى قاراۋىلعا قويىپ، وزدەرى شاي قامىنا كىرىسەدى.

وسى كەزدە ءالىباي:

- ءبي اعا، مەنىڭ جۇرەگىم توقتاماي وتىر. قاراۋىلعا جان-جاقتى باقىلاي الاتىنداي ەتىپ ءۇش-ءتورت جىگىت قويمادىق پا؟ - دەيدى. سوندا تۇرعانباي:

- ءاي ءالىباي، قايداعى جوقتى ايتپاي وتىر. الاتىن مالدى دا، جاندى دا الدى ەمەس پە؟ ءبىز شىبىن جانىن الىپ قاشقان تورعايلارمىز عوي. ءبىزدى قۋىپ مىنا قيىن شاتقالدان نە ىزدەيدى؟ - دەيدى باسۋ ايتىپ.

سوندا دا تىنىم تاپپاعان ءالىباي ءىنىسى الىبەكتى قاسىنا شاقىرىپ الىپ: «قارۋىڭدى بەلىڭە ءىلىپ ساق وتىر. ارتىمىزدان قۋسا، مىنا كەزەڭنەن شىعادى. وندا اناۋ تۇرعان تاسقا جۇگىرىپ جەت، سول ساعان پانا بولادى. ەگەر الدىمىزدى وراعان بولسا، انا تۇرعان مويناقتان شىعۋلارى ءتيىس. وندا مىنا جارتاستىڭ تۇبىندەگى ۇستىنە تاسجارعان شىققان ۇلكەن ساندىقتاي تاس ەكى كىسىگە پانا بولادى. تەز جۇگىرىپ سوعان جەتۋىمىز كەرەك. ايتقانىمدى ىستەپ، ساق وتىر»، - دەيدى.

شاي دا كەلەدى. ءبىر ساپتاياق شايدى ەندى الا بەرگەندەرى سول ەدى، الدىدان وراپ كەلەتىن مويناقتىڭ استىنان تارس-تۇرس مىلتىق اتىلا باستايدى. ءالىباي شالت قيمىلداپ بەلگىلەگەن جەرىنە تەز جەتىپ پانالايدى دا، ءىنىسى ايتقان جەرگە جەتە الماي، ءۇش ادىم جەردەگى ءبىر ساندىقتاستىڭ تۇبىنە جاتا كەتەدى. اتىس باستالىپ، بوراعان وق باس كوتەرتپەي قالعان ەكەن.

ارنايى دايارلىقتان ءوتىپ، ساقاداي سايلانىپ كەلگەن قارۋلى اسكەر قويا ما؟ ارادا كوپ ۋاقىت وتپەي-اق، 16 ادام قان جوسا بوپ تۇگەل قىرىلادى. سولداتتار ەكى جاعى تەرەڭ جىرالى جەردەن جول تاۋىپ ءبىر-بىرلەپ تومەن تۇسە باستايدى. وسى كەزدە الىبەك كەلە جاتقان سولداتتاردىڭ ۇشەۋىن اتىپ تۇسىرەدى. ءالىباي ىنىسىنە: «بەكەر-اق كىسى اتتىڭ-اۋ، قولعا تۇسسەك قيىن بولادى عوي»، - دەيدى كەيىستىك ءبىلدىرىپ.

سوندا ءىنىسى: «ءاي اعا، انا جاتقان 16 ادامنىڭ بىرەۋى قيمىلدامايدى. كوشتە قانشا ادام ءولدى. شاما كەلسە، قانعا قان الا بەرۋ كەرەك. قولعا تۇسسەك، ءبىزدى ءتىرى قالدىرماسى انىق. انالاردىڭ قاسىنا اپارىپ، وق شىعارماي-اق شاپقىلاپ ولتىرە سالادى»، - دەيدى دە، تاعى ءبىر سولداتتى دومالاتىپ تۇسىرەدى. ارتىنشا دالدەپ اتقان وقتىڭ ءبىرى الىبەكتىڭ وزىنە ءدوپ تيەدى دە، «اعا قوش!» دەۋگە عانا شاماسى كەلگەن جاس جىگىت سول جەردە جانتاسىلىم ەتەدى. ءالىبايدىڭ وڭ جاق كوزى شەل قاپتاعان سوقىر ادام ەكەن. جالعىز كوزىنەن قاندى جاس توگىپ ءبىر جىلاپ الادى دا، كەك الۋعا كىرىسەدى. جۇرەگىنە كەك تۇنعان ول كوزىنە كورىنگەن سولداتتى ءبىر-بىردەن اتا بەرەدى. امالى تاۋسىلعان سولداتتار قاشۋعا بەكىنگەنمەن، قالىڭ قاردان وڭايشىلىقپەن وتە الماي، قامالىپ قالادى. بۇل ولاردى ءالىبايعا بايلاپ بەرگەنمەن بىردەي ەدى. قاردان وتەم دەگەندەردىڭ ءتىرى قالعانى جوق...

كولپاكوۆتى قالپاقتاي ۇشىرعان قازاق

ولاردىڭ باسشىسى كاپيتان كولپاكوۆ لەنينگرادتان بەرى قاراي ات ۇستىندە جۇرگەن، سوعىستا ۇنەمى جەڭىسپەن اتى شىققان وتە اككى ادام ەكەن. كولپاكوۆ بۇل جولى دا وققا ىلىنبەي، اتىمەن قارعىپ، وتكەلدەن ءوتىپ كەتەدى. ءالىبايدىڭ اتقان ەكى وعى دا دارىماپتى. ەندى تاجىريبەلى ورىس وفيتسەرى مەن قازاق مەرگەنىنىڭ اراسىندا كادىمگىدەي اڭدىسقان اتىس باستالادى. ءبىر تاستان سوڭ، ءبىر تاستى پانالاي ءجۇرىپ اتىسقان ءالىباي ءتۇس اۋا شاتقالدىڭ تۇبىنە ازەر جەتىپ، سول جەردى پانالايدى.

وقتى ورىنسىز شىعىنداماس ءۇشىن ەكى جاق تا وڭتايلى ءساتتى كۇتىپ، ۇزاق ۋاقىت ءۇنسىز قالاتىن كورىنەدى. تالاي سويقاندى كورگەن قاندىقول كولپاكوۆ ءالىبايدىڭ تىعىلعان جەرىن بايقاپ قاپ، تۋرا ۇستىنەن ءتونىپ كەلەدى. مۇنى كولەڭكەسىنەن بايقاپ قالعان مەرگەن وقىس اينالا بەرىپ اتىپ جىبەرگەندە، وق جەڭىلىپ كورمەگەن جىرىندىنىڭ ءدال ماڭدايىنان تيەدى. قۇداي جار بولعاندا، كولپاكوۆ ءالىبايدىڭ ۇستىنە كەپ قۇلايدى. ءالىباي ونىڭ مىلتىعىن، ونە بويىنداعى بارلىق وق-ءدارىسىن سىپىرىپ الىپ، دەنەسىن اياق جاعىنا تەۋىپ تاستايدى. وعى كوبەيىپ، جاڭا مىلتىق قولىنا تيگەن مەرگەن ەندى كوزىنە قىلت ەتىپ كورىنگەن سولداتتى اتا بەرەدى. سولداتتار باس كوتەرە الماعان كۇيى تىرپ ەتپەي جاتىپ، اقىرى كۇن باتىپ، قاراڭعىلىق تۇسەدى.

قاراڭعىلىقتى پايدالانعان ءالىباي ولگەندەردى ءبىر جەرگە جيىپ، باستارىن قۇبىلاعا قاراتىپ، بەتتەرىن جاۋىپ جەرلەۋدىڭ ىرىمىن جاسايدى. ءبىر كۇندە 17 قانداسىنان ايىرىلىپ، قان جىلاپ جالعىز قالعان مەرگەن ەندىگى جەردە ەش نارسەدەن تايىنباسقا بەل بۋعان...

تاڭ بىلىنە سولداتتار كەلگەن تاۋعا ورلەپ، جوتاعا شىقسا، بۇكىل سولدات كەتىپ قالعان ەكەن. ەل شەتىندە دولانالى دەگەن جەر بار. سوندا جەتىپ بەكىنگەن مەرگەن كۇنى بويى اينالانى باقىلاپ، قاراڭعى تۇسە ەكى اتتى ارقانداپ، قاجەتتى زاتتارىن تىعادى دا، قارۋ-جاراعىن اسىنىپ، ءبىر اتپەن ءوز اۋىلىنا كەلەدى. وزىمەن بىرگە وسكەن سەنىمدى ءبىر-ەكى ادامىنا جولىعىپ، قىرعىننىڭ بولعانىن، ون سەگىز ادامنان جالعىز قالعانىن جەتكىزەدى.

«ەندى سەندەر ولگەن ادامداردىڭ دەنەسىن جەرلەۋگە كىرىسىڭدەر»، - دەيدى. سونداي-اق، ءالىباي وتباسىن الىپ كەتۋ نيەتىندە ەكەندىگىن دە جاسىرمايدى. ءبىراق ءوزى قايدا بەكىنگەنىن، قاشان كەلەتىندىگىن اشىپ ايتپايدى. تەك، ءوزىن ىزدەپ اۋرە بولۋدىڭ قاجەتى جوق ەكەندىگىن ەسكەرتەدى.

سولداتتار ولگەندەرىن تۇگەل جيناپ اكەتە الماسا دا، كولپاكوۆ پەن تاعى ەكى وفيتسەردىڭ جانە ءبىراز سولداتتىڭ دەنەسىن زايسان قالاسىنىڭ قاق ورتاسىنا اكەپ جەرلەيدى. قالعان سولداتتاردىڭ دەنەلەرىن جيىپ الىپ، جانجىگىت دەگەن جەردە ورتەپ جىبەرەدى.

وسىدان سوڭ ورايلى ءساتى كەلگەندە ءالىباي قىتاي جەرىنە ءوتىپ كەتەدى. شەكاراعا جاقىن جەرگە توقتاماي، ارعى قوبدا تاۋىن مەكەندەگەن موڭعولداردىڭ ىشىنە قاراي بارادى. ءبىراز ۋاقىت سول تورعاۋىتتاردىڭ ىشىندە ءجۇرىپ، ەلىن ساعىنىپ توقتاي الماي، اقىرى ەل ىشىنە كوشىپ كەلەدى. ەلدە تىنىشتىق جوق. وسپان باتىردىڭ قىتايعا قارسى كوتەرىلىسىنىڭ جەلىگىمەن كۇندە قاشىپ، ۇرىككەن ەل. گوميندانشىل قىتايلاردىڭ كۇندە اتىسىپ-شابىسقانىنان حالىقتىڭ مازاسى ابدەن كەتكەن.

سونىمەن، 1944-جىلى قازاقتار مەن موڭعولدار سوۆەت جەرىنە كوشىپ وتەدى دە، وسى كوشپەن ءالىباي دا اتاجۇرتقا ورالىپ، ەجەلدەن اتا-بابالارىنىڭ قونىسى بولعان سارىبۇلاق دەگەن جەرگە كەلىپ قىستايدى.

ۇلىقتاردىڭ زارەسىن ۇشىرعان ەكى وق

سودان اقپان ايىنىڭ اياعىنا تامان ءالىبايدىڭ ۇيىنە ءتورت اتتى ادام ساۋ ەتە قالادى. ولار ەكى ورىس، ەكى قازاق وفيتسەرى. ەكى قازاقتى مەرگەن بىردەن تانيدى. ولار مەنتايەۆ سەرىكبولسىن مەن باياعى ساتقىن قىزاي ىرگەبايەۆ (سىرگەبايەۆ بولۋى دا مۇمكىن) ەكەن. سول جەردە سەرىكبولسىن ءالىبايعا:

- ءاي، سەن كىمسىڭ؟ - دەيدى جورتا تانىماعانسىپ.

- ءيا، تانىماي تۇرسىڭ با؟ سەن سەرىكبولسىڭ، اناۋ قىزاي، ال مەن ءالىباي. ۇشەۋىمىز دە شىنتاعىمىزعا دەيىن قانعا مالىنعان قاندىقولدار ەمەسپىز بە؟ تابىسپايتىن جەرىمىز جوق ەكەن-اۋ، ءسىرا. ءبارىمىز دە ەلگە بەلگىلى ادامدار ەمەسپىز بە؟ - دەيدى ءالىباي. سەرىكبولسىن:

- تىلىڭە شوق تۇسكىر ءالىباي، مىنا كىسىلەر سەنىمەن اڭگىمەلەسپەك. اتىڭدى ەرتتە، بىزبەن بىرگە جۇرەسىڭ، - دەيدى ءسوزىن نىعارلاي سويلەپ.

- ە- ە، بۇلار مەنەن كەك قايتارۋعا كەلگەن ەكەن، - دەپ توپشىلاعان ءالىباي ۇيدەگىلەرمەن تەگىس قوشتاسىپ، ۇستىنە جامان-جۇتىق كيىمىن كيىپ، تاياۋ جەردە تۇرعان ارىق بيەسىنە ەسكى ەردى ەرتتەيدى دە، القالاي تۇرعان ەلىمەن قوشتاسىپ، كەلگەندەرگە ىلەسىپ كەتە بەرەدى.

اۋىلى تۇگەل شۋلاپ، قوش-قوش ايتىپ قالادى. بۇلار سول جۇرگەننەن مول ءجۇرىپ، زايسان قالاسىنا كەلەدى. قالانىڭ ورتاسىندا كولپاكوۆقا ورناتىلعان ەسكەرتكىش- بەيىتكە جاقىن كەلگەندە سەرىكبولسىن:

- ءاي، ءالىباي مىناۋ نە، بىلەسىڭ بە؟ - دەيدى، مۇرتىنا مىسقىل ءۇيىرىپ.

- بۇل ەستۋىمشە، ماعان مىلتىعىن سىيلاعان كولپاكوۆتىڭ جەرلەنگەن جەرى بولسا كەرەك، - دەيدى مەرگەن دە ءمان بەرمەگەنسىپ. سول بەتى بۇلار وتريادتىڭ اۋماعىنا ەنەدى. ەكى وفيتسەر ءالىبايدى ءبىر ۇيگە اكەپ كىرگىزەدى دە، سىرتىنان بەكىتىپ كەتەدى.

ءۇيدىڭ ءىشى جارىق، جىلى ەكەن. بۇرىشقا ءبىر كىشكەنە ستول قويىلىپ، توسەك سالىنىپتى. ازدان سوڭ ەسىك اشىلىپ، ءبىر قازاق جىگىتى اكەلگەن ىستىق شاي مەن تاماقتى ۇستەلگە قويىپ: «اقساقال، كەل شاي ءىشىڭىز، ەشتەڭەدەن قورقىپ، سەسكەنبەڭىز. بۇگىنشە وسىندا بولاسىز، ەرتەڭ ءبىراز ءسوز سۇراپ، ۇيىڭىزگە قايتارادى. ەرتەڭ سوزىڭىزگە اۋدارماشى مەن بولام. وتكەن وقيعادان ءبىر ءسوز قالتىرماي نەمەسە قوسپاي ناعىز شىندىقتى ايتىڭىز. سول ۋاقىتتاعى وقيعا كنيگادا تۇگەل جازۋلى تۇر. ءسوزىڭىز سونىمەن بىردەي شىقسا، قايتالاپ سۇرامايدى»، - دەپ ءمان-جايدى تۇسىندىرگەن ءتىلماش ۇلكەن كىسىگە الاڭداماي جاتىپ، دەمالىڭىز دەپ شىعىپ كەتەدى.

ەرتەڭگىسىن ءالىبايدى تەرگەۋگە شاقىرادى. ورتاداعى ۇلكەن ۇستەلدى اينالا وتىرعان وڭشەڭ سارى الا كيىمدى وفيتسەرلەرگە باسىن ءيىپ سالەمنىڭ يشاراسىن جاساعان ءالىبايعا ەسىكتىڭ اۋزىنداعى سولدات ۇستەلدىڭ ءبىر جاق شەتىندە تۇرعان ورىندىقتى نۇسقاپ، «وتىر!» دەيدى.

وفيتسەرلەردىڭ ءبىرى ءسوز باستاپ:

- ءبىز ءسىزدى سوتتايىق نەمەسە جازالايىق دەپ شاقىرعان جوقپىز. ونسىز دا 15 جىل جەر اۋىپ، سوتتالىپ ءجۇرسىز. ءبىز تەك بولعان وقيعانى ءوز اۋزىڭىزدان ەستىگىمىز كەلەدى. قانداي وقيعا بولعانىن بۇكپەي ايتىپ بەرىڭىز، - دەيدى.

ءالىباي اۋەل باستا ەلدىڭ شوشىنىپ كوشكەنىنەن باستاپ، ءۇتىر-نۇكتەسىنە دەيىن قالدىرماي بايانداي كەلە، اقىرى ەلگە كوشىپ كەلىپ، قازىر سارىبۇلاقتا قىستاپ وتىرعانىنا دەيىن تۇگەل ايتىپ بەرەدى. ءوز تىلدەرىندە ءوزارا ءبىراز سويلەسكەن ورىس وفيتسەرلەرى تاراپىنان قوسىمشا سۇراق بولمايدى.

وسى كەزدە وفيتسەرلەردىڭ تاعى ءبىرى:

- جارايدى، ءبارىن ەش قوسپاسىز تۇگەل ايتتىڭىز. ول كەزدە قاتەلەسۋ كوپ بولعان. باسشىلاردا دا قاتەلەسۋ كوپ بولدى. حالىق تا تۇسىنبەستىكتەن اۋا كوشىپ، وسىنداي ارانداتۋلار ءجيى ورىن الدى. ءسىز بولعان ءىستى تۇگەل ايتىپ بەردىڭىز، ەندى تۇستەن كەيىن ۇيىڭىزگە قايتاسىز. قازىر ءسىزدى نىسانا اتاتىن جەرگە اپارسا، نىسانا اتۋعا قالايسىز؟ - دەيدى. ساسقالاقتاپ قالعان مەرگەن:

- كارتەيىپ قالدىم عوي، دەگەنمەن كورەيىن، - دەپتى امالى تاۋسىلىپ. ءوزى ىشىنەن: - «ە، بۇلار مەنى نىسانا كوزدەيتىن جەرگە اپارىپ اتاتىن بولدى-اۋ، شاماسى»، - دەپ ويلايدى.

سولداتتار جاتتىعاتىن جەردەگى ورىندىقتارعا ءبىراز ۇلىق جايعاسقان ەكەن. ولاردىڭ ءبىرى ءالىبايعا كەلىپ: «اناۋ تۇرعان كىسىدەي تاقتايدى، ورتاسىنداعى قارايعاندى كوردىڭىز بە؟ سول قارايعاندى كوزدەپ اتىڭىز!» - دەيدى.

مەرگەن قولىنداعى بەساتارعا بەس وق سالادى دا، وتىرا قالىپ، كوز ىلەسپەس شاپشاڭدىقپەن قاتارىنان ءۇش وق اتادى. اتقان وقتارىنىڭ ۇشەۋى دە نىسانانىڭ ءدال ورتاسىنا تيەدى. ءبىر ءسات تىنىشتىق ورناعاندا ورنىنان تۇرەگەلگەن باتىر بۇكىل دەنەسىمەن بۇرىلىپ ارتىنا قارايدى. سويتسە، قاز-قاتار تىزىلگەن ۇلىقتاردىڭ وڭدەرى قاشىپ، تىلدەرى بايلانىپ قالىپتى. ولاردىڭ ارت جاعىندا تۇرعان ءتىلماش ەرنىن جىمىرىپ الىپ، باسىن شايقاي بەرىپتى. قالعان ەكى وقتى دالاعا اتا سالعان مەرگەن: «نەگە ءويتتىڭىز؟» - دەگەن ورىستارعا، «مىناۋ جالعىز كوز جاساۋراپ، بۋالدىرلانىپ كورە الماي قالدىم»، - دەپتى.

ورىس وفيتسەرلەرى ءالىبايدىڭ مەرگەندىگى مەن شىنشىلدىعىنا رازى بولىپ، باتىرعا 50 كەلىدەي ءبيداي، ءبىر كەلى شاي جانە 15 مەتر بۇل بەرىپ:

- اقساقال، رەنجىمەي قايتىڭىز! - دەپ، اۋىلىنا شىعارىپ سالعان كورىنەدى.

P. S. تاريحتا قۇرالايدى كوزگە اتقان مەرگەندىگىمەن اتى قالعان سول ءالىبايدىڭ سۇيەگى قايدا جەرلەنگەنىن كوپ ەشكىم بىلمەيدى. ال قاندىقول كالپاكوۆ وسى كۇنگە دەيىن زايسان قالاسىنىڭ تورىندە جاتىر.

سەرىك قۇسانبايەۆ

didar-gazeti.kz