اتا جۇرتقا ورالىپ قازاق ەلىنىڭ تۋريزم سالاسىنا وزىندىك ۇلەسىن قوسىپ جاتقان قانداسىمىز

استانا. قازاقپارات -  اتاجۇرتقا وزگە ەلدەن ورالىپ ءار سالادا ەڭبەك ەتىپ جاتقان قانداستارىمىز جەتەرلىك. سونىڭ ىشىندە ەل ەكونوميكاسىنىڭ دامۋىنا دا ۇلەس قوسىپ، ءوز ءناپاقاسىن دا ىسكەرلىكپەن تاۋىپ جۇرگەن كاسىپكەر قانداستارىمىز بار.

سولاردىڭ ءبىرى -  استانا قالاسىنداعى «TAMERLAN-NS»   تۋريستىك فيرماسىنىڭ ديرەكتورى تالعات ءلاززات. قىتايعا باراتىن قازاقستاندىقتارعا ۆيزالىق جانە كەڭەس- كومەك كورسەتىپ كەلە جاتقان جاس كاسىپكەر «EXPO-2017» كورمەسىن پايدالانىپ الداعى ۋاقىتتا قازاقستان تۋريزمىنىڭ دامۋىنا ۇلەس قوسۋدى كوزدەپ وتىرىپتى.

تالعات 1985 -جىلى 23 - تامىزدا ش ۇ ا ر تارباعاتاي ايماعىنا قاراستى شاعانتوعاي اۋدانىندا ومىرگە كەلگەن. مەكتەپتى بىتىرگەن سوڭ ۇرىمجىدەگى سپورت كوللەدجىندە گرەك- ريم كۇرەسى بويىنشا ءتالىم العان ول شىنجاڭ كاسىبي كۇرەس كومانداسىندا 2005 -جىلعا دەيىن ونەر كورسەتەدى. سونداي- اق، شىنجاڭ ۋنيۆەرسيتەتىندە سىرتتاي ءبىلىم الادى. دەنساۋلىعىنا بايلانىستى سپورتپەن قوشتاسقان جاس جىگىت ەڭ العاش 2005 -جىلى ۇرىمجىدە ەكسپورتتىق تاسىمالداۋ كومپانياسىن اشادى. جۇمىس بابىمەن قازاقستانعا ساپارلاي كەلگەن تالعات اتاجۇرتقا ءبىرجولاتا ات باسىن بۇرۋدى ۇيعارادى. ءسويتىپ بۇگىنگى كۇنى كەرەگەسىن كەڭگە جايعان تۋريستىك فيرماسىن قۇرىپ، جۇمىسىن باستاپ كەتەدى.

«ەڭ العاش 2009 -جىلى قازاقستانعا كەلدىم. سول ساپارىمدا اتاجۇرتتا قالۋ تۋرالى شەشىمىمدى قابىلدادىم. ءسويتىپ، ازاماتتىقتى الىپ، استانا قالاسىنا قونىستاندىم. مەن ۇرىمجىدە ەكسپورتتىق تاسىمالداۋ كومپانياسىن باسقارىپ تۇرعان كەزىمدە كوپتەگەن قازاقستاندىق قوناقتار ۇرىمجىگە كەلەتىن. سول ۋاقىتتا اعايىنداردىڭ كوپتەگەن قيىندىقتارعا كەزدەسەتىنىن بايقايتىنمىن. مىسالى، تاۋارلارىن تولىق الا الماۋ، اۋدارماشىلاردىڭ الداۋىنا ءتۇسۋ، ت. ب. سياقتى. سول ءۇشىن وسىندا كەلگەن سوڭ وسى باعىتتا جۇمىس ىستەگىم كەلدى. ءسويتىپ، 2010 -جىلى وسى تۋريستىك فيرمانى اشتىم. قىتايعا ۆيزا جاساۋ، ساياحاتتاۋ، ساۋدا جانە ەمدەلۋگە باراتىن قازاقستاندىقتارعا جول سىلتەپ، كومەكتەر كورسەتىپ كەلەمىز. ايىنا 500 دەي جولاۋشىعا ۆيزا جاساپ بەرەمىز. ونىڭ سىرتىندا ەلەكتروندى ۆيزا الاتىنداردىڭ سانى دا كوپ. بۇدان بولەك تە سۇرانىسقا ساي قىزمەت ەتەمىز. جۇمىستى ەڭ العاش باستاعان كەزدە قيىندىقتار كوبىرەك بولدى. ال قازىرگى تاڭدا ەلىمىزدىڭ كاسىپكەرلىكتى قولداۋ ساياساتى بويىنشا قۇجات جانە باسقا دا جۇمىستار كوپ جەڭىلدەدى دەپ ايتا الامىن» ، - دەيدى كومپانيا ديرەكتورى.

 الەم كوز تىككەن «EXPO-2017» كورمەسىن ۇتىمدى پايدالانۋ دا تالعاتتىڭ نازارىنان تىس قالماعان كورىنەدى. ول وسى ۇلكەن كورمەنى پايدالانىپ قىتايدان ينۆەستورلاردىڭ كوپتەپ كەلۋىنە جول اشپاق ەكەن. ونىڭ سىرتىندا ەلىمىزدىڭ ساياحات، دەمالىس ورىندارىنا تۋريستەر اپارۋدى جوسپارلاپ وتىرىپتى.

«EXPO-2017» كورمەسىن ءتيىمدى پايدالانۋ ءۇشىن قىتايدان كەلەتىن تۋريستەردىڭ كوبەيۋىنە جول اشساق دەپ وتىرمىز. ول جاقتان قازاقستانعا كەلۋ ءۇشىن ۆيزا الۋ قيىنداۋ بولعاندىقتان شاقىرتۋلار جىبەرىپ، ينۆەستورلاردى كوبىرەك تارتۋدى كوزدەپ وتىرمىز. سونىمەن قاتار، ەلىمىزدەگى دەمالىس، ساياحات ورىندارىنا ولاردى باستاپ بارۋ جۇمىستارىن ۇيىمداستىرىپ، قازاقستان ءتۋريزمىنىڭ دامۋىنا دا ءوز ۇلەسىمىزدى قوسساق دەگەن ماقساتىمىز بار» ، - دەگەن فيرما جەتەكشىسى ءوزى باستاعان قىتاي ءتىلىن جەتىك بىلەتىن مامانداردى وسى جۇمىستارعا جۇمىلدىرعىسى كەلەتىنىن جەتكىزدى.

 ءوز بيزنەسىن دوڭگەلەتىپ وتىرعان ءبىزدىڭ كەيىپكەرىمىز ءالى كۇنگە كۇرەس دەسە ىشكەن اسىن جەرگە قوياتىن جانكۇيەر جانە سپورتتىق ءىس- شارالاردىڭ دەمەۋشىسى. ول ءسوز اراسىندا قىتايدا باپكەر بولىپ جۇرگەن دوستارىمەن اراداعى بايلانىستى ۇزبەي، ءتىپتى قازاق كۇرەسىنىڭ جارىستارىن وتكىزۋگە كومەكتەر كورسەتىپ جۇرگەنىن ايتىپ قالدى.

«سپورتتى تاستاسام دا كۇرەستىڭ جانكۇيەرىمىن. قىتايداعى قازاق جاستارىنىڭ قازاق كۇرەسىنە دەگەن قىزىعۋشىلىعى ارتسىن دەگەن نيەتپەن ونداعى دوستارىممەن بىرلەسىپ قازاق كۇرەسى جارىستارىنىڭ وتۋىنە كومەكتەسىپ جۇرگەن جايىم بار. سونداعى دوسىم نۇرلان داۋلەتحان قىتايداعى قازاق كۇرەسىنە جاۋاپتى بولىپ كەلەدى. وتكەن جىلى قىتايدا ازيا چەمپيوناتى ءوتتى. سونداعى بالۋانداردى كيىممەن قامداپ بەردىم. قازىرگى تاڭدا قىتايدا قازاق كۇرەسى ەداۋىر دامىدى. ءتىپتى اۋىل- ايماقتاردا وتەتىن تويلاردىڭ وزىندە بالۋاندار بوز كىلەمدە بەلدەسىپ ءجۇر. سوعان قۋانامىن» ، - دەيدى ت. ءلاززات.

استانا قالاسىنداعى شەتەلدەن كەلگەن قازاق جاستارىنىڭ ۇيىمداسۋىمەن قۇرىلعان «استانا- قامقور» ەرىكتىلەر توبىنىڭ بار ەكەنىن ايتقان كاسىپكەر ازامات قايىرىمدىلىق جاساۋعا كوپ كوڭىل بولەدى ەكەن. ول داۋرەن مەرگانباي، كەنجەقان نىعىمەت، اسقار سۇلتانعازى قاتارلى ءوزى تەڭدەس جاستاردىڭ قۇرعان، قۇرامىندا 200 دەن اسا مۇشە بار بۇل توپتىڭ استانا ماڭىنداعى مۇقتاج جاندارعا كومەكتەر كورسەتىپ كەلە جاتقانىن جەتكىزدى.

 

مايگۇل سۇلتان،  سۋرەت اۆتوردىكى.

baq.kz