قانات يسلام تۋعان مەكەننەن تاعى ءبىر قازاق باتىرى شىقتى - فوتو

استانا. قازاقپارات - قانات يسلام تۋعان قىتايدىڭ التاي ايماعى قابا اۋدانىنان تاعى ءبىر قازاق باتىرى شىقتى.

ول بىردەن كاسىپقوي بوكستا باعىن سىناپ، فيليپپين، تايلاند، قىتاي ەلدەرىنىڭ ساڭلاقتارىن سان سوقتىرىپ، ميللياردتاردىڭ نازارىن وزىنە اۋدارا باستادى.

بۇل قازاق باتىرىنىڭ ەسىمى بەيسەنبى ءناسيوللا ۇلى. 1994-جىلى قابا اۋدانىندا دۇنيەگە كەلگەن.

ول بيىل قىتايدىڭ ىشكى قالالارىندا ۇيىمداستىرىلعان ازيالىق كاسىپقوي جارىستارعا بەس رەت قاتىسىپ، بارلىعىندا جەڭىسكە قول جەتكىزدى. ونىڭ بىرەۋىندە عانا (6 راۋند) ۇپاي سانىمەن باسىم تۇسسە، قالعان تورتەۋىندە جارىستى مەرزىمىنەن بۇرىن اياقتاعان.

بەيسەنبى سوڭعى جەكپە-جەگىن وسىدان 5 كۇن بۇرىن، ياعني قاراشانىڭ 4- كۇنى وتكىزدى. تۇڭعىش رەت 8 راۋندتىق باسەكەدە قارسىلاسىن 1 مينۋت 20 سەكۋندتا سۇلاتىپ تاستادى.

بەيسەنبى قازىر قىتايدىڭ ىشكى قالالارىنىڭ بىرىندەگى «جوڭ- ۆەي» كومپانياسىمەن كەلىسىمشارتقا وتىرىپ، ليابىڭ دۇڭ ەسىمدى فيليپپيندىك باپكەردىڭ قول استىندا جاتتىعىپ، شەبەرلىگىن شىڭداپ ءجۇر. سالماعى - 147,4 فۋنت (66,8 كەلى)، بويى 180 سانتيمەتر. قازىر ول جالپى رەيتينگتە وسى سالماق دارەجەسىندە دۇنيەجۇزى بويىنشا 467- ورىندا بولسا، قىتاي ەلى بويىنشا 2- ورىندا تۇر.

ءبىز اتا-جۇرتىنان الىستا جۇرسە دە، الاشتىڭ ابىرويىن اسىرىپ جۇرگەن قانداسىمىزعا تەك ساتتىلىك جولداس بولسىن دەيمىز. وسى قارقىنىنان تايماي، الەمدىك دودالاردا اسىعى الشىسىنان تۇسە بەرۋىنە تىلەكتەسپىز.

كۇنسۇلتان وتارباي