ت. دۇيسەنوۆا: «نۇرلى كوش» باعدارلاماسىنداعى الەۋمەتتىك پاكەتتەر «جۇمىسپەن قامتۋ» باعدارلاماسىندا تولىق قامتىلىپ وتىر
بۇگىن پارلامەنت سەناتىنىڭ جالپى وتىرىسىندا دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا وسىلاي ءمالىم ەتتى.
ەسكە سالايىق، جالپى وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى- قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى قابىلداندى.
ايتا كەتەرلىگى، قۇجاتتى تالقىلاۋ بارىسىندا سەناتورلار «نۇرلى كوش» باعدارلاماسى سەكىلدى باعدارلاما قابىلداۋ تۋرالى ماسەلە كوتەرگەن بولاتىن.
«نۇرلى كوش» باعدارلاماسى «جۇمىسپەن قامتۋ-2020» باعدارلاماسى قابىلدانعانعا دەيىنگى قۇجات ەدى. سوندىقتان دا، ءبىز قازىر سول بۇرىنعى «نۇرلى كوش» باعدارلاماسىندا قاراستىرىلعان الەۋمەتتىك پاكەتتى «جۇمىسپەن قامتۋ» باعدارلاماسىنا ەنگىزدىك. ءبىر ەرەكشەلىگى، اتالعان الەۋمەتتىك پاكەت ورالماندار ءۇشىن عانا ەمەس، وسىندا تۇرىپ جاتقان ازاماتتار ءۇشىن دە بىردەي بەرىلەتىن بولادى. ارينە، بۇل رەتتە بەلگىلى ءبىر تالاپتار ورىندالۋى كەرەك. ماسەلەن، ول ازاماتتار ۇكىمەت بەلگىلەگەن ەڭبەك رەسۋرستارى تاپشى وڭىرلەرگە بارىپ، سوندا قونىستانىپ تۇرۋى ءتيىس»، دەدى ت. دۇيسەنوۆا.
بۇدان بولەك، سەناتورلار «وڭتۇستىكتەن سولتۇستىككە» قونىستاندىرۋدىڭ كەشەندى باعدارلاماسىن قابىلداۋ تۋرالى ماسەلەلەر كوتەردى.
«ارينە، سولتۇستىك وڭىرلەردە جۇمىس ورىندارىن اشۋ مۇمكىندىگىنە قاراي ءبىرىنشى كەزەكتە وڭتۇستىكتەگى حالىق تىعىز ورنالاسقان ەلدى مەكەندەردەن سولتۇستىككە قونىستاندىرۋ قاراستىرىلادى. سونىمەن قاتار، ارنايى باعدارلاما جاساساق، ول بارلىق باعدارالامادا قامتىلعان دۇنيەلەردى قايتالايتىن ەدى. سول ءۇشىن ءبىز قولدانىستاعى باعدارلامالاردى وسىنداي وزگەرىستەرمەن تولىقتىردىق»، - دەدى مينيستر.
اۆتور: قانات مامەتقازى ۇلى