قازاق باتىرلارىنا ارنالعان ينتەراكتيۆتى ويىن
«Dostyk Plaza» ويىن- ساۋىق ورتالىعىنىڭ الدىندا قوناقتارعا ارنالعان كيىز ءۇي ورناتىلىپ، قازاق ءۇيدىڭ ءىشى سىمسىز كينەتيكالىق مەدياقابىرعالارمەن قامتاماسىز ەتىلگەن تەحنولوگيالىق كەڭىستىك تۇرىندە جابدىقتالعان. كەرەي مەن جانىبەك حاندار وزبەك حانى ءابىلحايىردان ءبولىنىپ شىعىپ، موعولستان بيلەۋشىسى ەسەنبۇعادان كومەك سۇرايتىنى تاريحتان بەلگىلى. ويىننىڭ بارىسى بويىنشا سول ەسەنبۇعانىڭ حان ورداسىنا كومەك سۇراۋ تۋرالى جازىلعان حاتتى جەتكىزۋ قازاق باتىرىنا تابىستالادى. زاماناۋي تەحنولوگيالىق ويىنداردىڭ كومەگىمەن بالاقايلار باتىردىڭ كەيپىنە ەنىپ، قازاق حاندارىنىڭ اماناتىن كەلەسى حاندىققا جەتكىزۋ كەرەك بولادى. ول كەڭىستىكتەگى ادام قوزعالىسىن سەزەتىن سەنسوردىڭ كومەگىمەن جۇزەگە اسادى.
Nazarbayev University Research and Innovation System (NURIS) جانە Success K ستراتەگيالىق كوممۋنيكاتسيالار اگەنتتىگىنىڭ قاتىسۋىمەن ازىرلەنگەن جوبانىڭ باستى مىندەتى - جاستاردىڭ بويىنا پاتريوتتىق سەزىم ۇيالاتۋ جانە تامىرى تەرەڭ قازاق تاريحىنا دەگەن قىزىعۋشىلىعىن ارتتىرۋ. «بۇل جوباعا تەك جاڭا تەحنولوگيالاردى پايدالاندىق. كەيبىر بۇرىن- سوڭدى قولدانىستا بولماعان تەحنولوگيالار العاش قولدانىلىپ تۇرعاننان كەيىن ءبىراز تەحنيكالىق قيىندىقتار بولدى» دەپ اتاپ ءوتتى NURIS عىلىمي قىزمەتكەرى قايرات ايتپايەۆ.
بۇعان دەيىن استانا، قاراعاندى قالالارىندا تانىستىرىلىمى وتكەن جوبا الماتىداعى ويىن- ساۋىق ورتالىعىنىڭ الدىندا ءۇش كۇن بويى تۇرادى. ۇيىمداستىرۋشىلاردىڭ سوزىنە سەنسەك، وسى جوباعا قىرۋار قاراجات كەتكەن. الداعى ۋاقىتتا بۇل ينتەراكتيۆتى اكسيا- ينستاللياتسيانىڭ باسقا قالالاردا ءوتۋى ءۇشىن دەمەۋشىلەردىڭ كومەگى كەرەك. بالالارعا ارنالعان وتاندىق ينتەراكتيۆتى ويىنداردىڭ كوبىرەك جاسالعانى دۇرىس. ءبىراق جاسالعان دۇنيە قولدانىسقا ەنسە نۇر ۇستىنە نۇر بولمايتىن با ەدى؟ ايتپەسە، قىرۋار قاراجات جۇمسالعان جوبالاردىڭ بار عۇمىرى ءۇش كۇننەن ءۇش قالادا تانىستىرىلىم وتكىزۋگە عانا جاراعانى ما؟
ايكو توكەن، Success K ستراتەگيالىق كوممۋنيكاتسيالار اگەنتتىگىنىڭ ديرەكتورى:
- بۇگىنگى بالالار تاريحي كىتاپ وقىپ، تاريحقا قاتىستى دەرەكتى فيلمدەر كورگەننەن گورى ءارتۇرلى كومپيۋتەرلىك ويىندار ويناپ، تەلەديدارعا تەلمىرگەندى كوبىرەك قالايدى. ءبىراق ۇلتتىق تاريح قاشاندا كەلەر ۇرپاققا ءجىتى ۇيرەتىلۋى قاجەت. بيىل جىل باسىنان بەرى اتالىپ ءوتىپ جاتقان قازاق حاندىعىنىڭ 550 جىلدىعىنا وراي وسكەلەڭ ۇرپاقتىڭ پاتريوتتىق سەزىمى مەن تاريحقا دەگەن قىزىعۋشىعىن وياتار، ونىڭ ۇستىنە كىتاپ نەمەسە دەرەكتى فيلم ەمەس، زاماناۋي دۇنيە جاساۋدى جوسپارلاعان بولاتىنبىز. نازاربايەۆ ۋنيۆەرسيتەتى جانىنداعى NURIS- پەن بىرىگىپ جاسوسپىرىمدەر مەن بالالارعا ارنالعان بارلىق جاڭا زاماناۋي تەحنولوگيالار قولدانىلعان وتاندىق ينتەراكتيۆتى ويىن جاساپ شىعاردىق. بۇل ويىن ارقىلى كەز كەلگەن بالا ءوزىن باتىر سەزىنە الادى، سونداي- اق، ميسسيانى ورىنداۋ بارىسىندا ءبىرقاتار تاريحي مالىمەتتەر بىلەتىن بولادى.
ايدانا نۇرمۇحان
«ايقىن»