ەجەلگى ەسكەرتكىشتەر زەلەنوۆ اۋدانىندا دا از ەمەس - فوتو
كونفەرەنسياعا قاتىسۋشىلار الدىمەن «ۇلى دالا تاريحى» اتتى كورمەنى تاماشالادى. اۋدان اكىمى كارىم جاقىپوۆ قازاق تاريحىنىڭ تەرەڭدە جاتقانىن بۇگىنگى ۇرپاققا، سونىڭ ىشىندە سان الۋان ۇلت وكىلدەرىنە ۇعىندىرا ءتۇسۋ ءۇشىن بىلىكتى عالىمداردىڭ قاتىسۋىمەن وسىنداي شارالاردى وتكىزۋدىڭ ءمان-ماڭىزى زور ەكەندىگىن اتاپ كورسەتتى.
م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى تاريح كافەدراسىنىڭ مەڭگەرۋشىسى، تاريح عىلىمدارىنىڭ دوكتورى، پروفەسسور تۇياقباي رىسبەكوۆ «قازاق حاندىعىنىڭ 550 جىلدىعى جونىندەگى نەگىزگى دەرەكتەر» اتتى بايانداماسىندا قازاق حاندىعىنىڭ قالىپتاسۋ، دامۋ كەزەڭدەرىن عالىمداردىڭ پىكىر-پايىمدارىن كەلتىرە وتىرىپ، تالداپ بەردى.
ب ق و تاريح جانە ارحەولوگيا ورتالىعىنىڭ ديرەكتورى، تاريح عىلىمدارىنىڭ دوكتورى، پروفەسسور مۇرات سىدىقوۆ «قازاقستان تاريحىنىڭ ءتۇيىندى ماسەلەلەرى» دەگەن بايانداماسىندا ەل تاريحىنىڭ سارمات، ساق داۋىرلەرىنەن باستاۋ الاتىنىن، قازاق ۇلتىنىڭ نەگىزىن قۇرايتىن تايپالاردىڭ ءومىر سۇرگەندىگىن دالەلدەيتىن ەجەلگى ەسكەرتكىشتەردىڭ زەلەنوۆتا دا از ەمەستىگىن ايتا وتىرىپ، وڭىردەگى ارحەولوگيالىق ورىنداردى زەرتتەۋدى جالعاستىرۋ جاڭا پايىمداۋلارعا جول اشاتىنىن تىلگە تيەك ەتتى.
باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ پرورەكتورى، فيلولوگيا عىلىمدارىنىڭ دوكتورى، پروفەسسور مۇرات سابىر «قازاق جۇرتىنىڭ ءبىر حاندىققا ۇيىسىپ، ەل بولۋىنداعى ءتىلدىڭ ەتنو-مادەني ءرولى» تۋرالى بايانداما جاساپ، قازاق ءتىلىنىڭ ۇلت تاريحىنداعى ورنىنا توقتالدى.
م. وتەمىسوۆ اتىنداعى ب ق م ۋ- دىڭ اعا وقىتۋشىسى، تاريح عىلىمدارىنىڭ كانديداتى جاڭابەك جاقسىعاليەۆ «ءاز-جانىبەك حان تاريحىنداعى اقتاڭداقتار» حاقىندا ءوز وي-تولعامدارىمەن ءبولىسىپ، ءاز-جانىبەكتىڭ التىن وردا حانى جانىبەك ەكەندىگى جونىندە دالەلدەرىن كەلتىردى. سونداي-اق جانىبەك پەن كەرەي حانداردىڭ قازاقستاننىڭ باتىس وڭىرىنەن كوشۋ مۇمكىندىگىن جوققا شىعارماي، زەرتتەي ءتۇسۋ كەرەكتىگىن ايتتى. وسى وقۋ ورنىنان تاريح عىلىمدارىنىڭ كانديداتى الفيا بايبولسىنوۆا ەل تاريحىندا انىقتالماي جاتقان، ناقتىلاۋدى قاجەت ەتەتىن تۇستاردىڭ از ەمەستىگىن جەتكىزدى.
شارا سوڭىندا اۋداندىق «اۋىل تىنىسى» گازەتىنىڭ رەداكتورى نۇرجان ءدۇزباتىروۆ اۋدان كولەمىندە وتكەنىمىزدى بۇتىندەپ، بۇگىنىمىزدى كەمەل ەتۋ باعىتىندا اتقارىلىپ جاتقان ىستەردەن، سونىڭ ىشىندە كونە قورىمدار نازارعا الىنىپ، قۇلپىتاستاردى زەرتتەۋ باستالعاندىعىنان حاباردار ەتتى.