توقتار اۋباكىروۆ ايدىن ايىمبەتوۆتى ۋايىمداعانىن ايتتى
سول كەزدەسۋگە قازاقتىڭ تۇڭعىش عارىشكەرى توقتار اۋباكىروۆتە قاتىستى. كەزدەسۋدەن كەيىن توقتار وڭعارباي ۇلى تىلشىلەرگە ءوزىنىڭ ءىزباسارى ايدىن ايىمبەتوۆ تۋرالى پىكىرىمەن ءبولىستى.
- قازاقستاندىقتار وزدەرىن باقىتتى سانايدى. كوپشىلىكپەن كەزدەسۋدە مۇنى ءجيى بايقايمىن. نەگە دەسەڭىزدەر، عارىشتا ۇشقان كوسمانوۆتاردىڭ ىشىندە قازاقستان توعىزىنشى ورىن الادى. كەيبىر ەكونوميكاسى دامىعان الىپ ەلدەردىڭ ءوزى مۇنداي كورسەتكىشپەن ماقتانا المايدى. بيىل، مىنە، ايدىن ءىنىمىز عارىشقا بارىپ كەلىپ، ءبىزدىڭ سانىمىزدى كوبەيتتى. دارەجەمىزدى ءوسىردى. مىنانداي تىعىز ۋاقىتتا ەكىنشى رەت دايىندالىپ، عارىشقا بارىپ كەلگەنىنە قاتتى قۋاندىم. ءبىراق مەن ۇلكەن كىسى بولعان سوڭ، ىشىمنەن ءبىراز ۋايىمداپ جۇرگەن ەدىم. قايتىپ كەلگەندە سول ادامگەرشىلىگى قالادى ما؟ الدە وزگەرىپ كەتەدى مە؟ دەگەن ۋايىم بولدى. الايدا اينالايىن ءىنىم وزگەرگەن جوق. مىنەزى دە قالىپتى. باتىر بولساڭ، وسىنداي ايدىن سياقتى بولۋ كەرەك دەپ ايتقىم كەلەدى. كەيبىرەۋلەر اتاق-دارەجەنى كوتەرە الماي قالىپ جاتادى. ايدىن وندايلاردىڭ قاتارىنان ەمەس ەكەن. ءوزىم قاتتى رازى بولدىم، - دەيدى حالىق قاھارمانى توقتار اۋباكىروۆ.
Baq.kz