ا. ايىمبەتوۆ ارال تەڭىزىنىڭ عارىشتان قاراعانداعى كورىنىسى تۋرالى ايتىپ بەردى

استانا. قازاقپارات - ق ر قارۋلى كۇشتەرىنىڭ اۋە قورعانىسى كۇشتەرىندە وتكەن كەزدەسۋدەن سوڭ جۋرناليستەردىڭ سۇراعىنا جاۋاپ بەرە وتىرىپ، قازاقستان عارىشكەرى، حالىق قاھارمانى ايدىن ايىمبەتوۆ حالىقارالىق عارىش ستانساسىندا جۇرگىزگەن زەرتتەۋلەرى تۋرالى ايتىپ بەردى.  

«قازاقستاننىڭ عىلىمي باعدارلاماسى وتە ۇلكەن باعدارلاما بولدى جانە ونى تولىق ورىنداپ شىقتىق. عىلىمي باعدارلاماعا سايكەس، شامامەن 20 ەكسپەريمەنت جۇرگىزىپ، ارال تەڭىزى مەن كاسپي تەڭىزىنىڭ مۇناي وشاقتارىنا مونيتورينگ جۇرگىزدىك. جالپى، عارىشتان قاراساق، ارال تەڭىزى قانداي ۇلكەن تەڭىز بولعانىن بايقايمىز. ءبىراق ءدال قازىرگى جاعدايىن ايتسام، تەڭىزدىڭ سۋى تارتىلىپ، سور توپىراق قۇممەن ارالاسىپ، ەلدى مەكەندەر مەن قۇنارلى جەرلەرگە جاقىنداپ كەلەدى. عارىشتان ارال تەڭىزىنىڭ قانشالىقتى كوپ تارتىلعانى انىق كورىنىپ تۇر»، - دەيدى ا. ايىمبەتوۆ.   

 سونداي- اق عارىشكەر حالىقارالىق عارىش ستانساسىنان جەردەگى مۇزدىقتار ەرىپ جاتقانىن انىق كورگەن ەكەن.   

 «عارىش ستانساسىندا مۇزدىقتاردى سۋرەتكە ءتۇسىردىم. مۇزدار ەرىپ، جەردى كوك ءتۇستى اتموسفەرا قورشاپ كەلە جاتقانى انىق كورىنەدى. جالپى، جەر پلانەتاسىن قورعاۋ كەرەك، سەبەبى، عارىش قانداي ادەمى بولسا، جەر شارى دا سونداي ادەمى. وسى تابيعاتتى، وسى عالامشاردى بالالارىمىزعا امانات ەتۋ كەرەك»، - دەيدى ا. ايىمبەتوۆ.   
 ايتا كەتەيىك، 2015 -جىلعى تاريحي وقيعالاردىڭ ءبىرى - تاۋەلسىز قازاقستاننىڭ ازاماتتارى اراسىندا تۇڭعىش رەت ايدىن ايىمبەتوۆ «سويۋز ت م ا-18م» زىمىرانىمەن عارىشقا ۇشتى. 9 كۇن 20 ساعاتتان استام ۋاقىت بويى حالىقارالىق عارىش ستانساسىندا جۇرگەن ول قازاقستاننىڭ بەس عارىش باعدارلاماسىن، سونىمەن قاتار 20 عىلىمي زەرتتەۋىن ويداعىداي جۇرگىزىپ كەلدى. عارىشتان امان- ەسەن ورالعان ا. ايىمبەتوۆكە ق ر پرەزيدەنتى ن. نازاربايەۆ «حالىق قاھارمانى» اتاعىن بەردى.