بەلارۋس جانە رەسەي كاسىپكەرلەرى تاۋارلارىن قازاق ويۋ-ورنەكتەرىمەن بەزەندىرىپ، ەلدى جاڭىلىستىرىپ ءجۇر

استانا. قازاقپارات - بەلارۋس جانە رەسەي كاسىپكەرلەرى تاۋارلارىن قازاق ويۋ-ورنەكتەرىمەن بەزەندىرىپ، ەلدى جاڭىلىستىرىپ ءجۇر.

بۇل تۋرالى بۇگىن استانادا وتكەن حالىقارالىق كونفەرەنتسيادا ەۋرازيالىق ەكونوميكالىق كوميسسيانىڭ (ە ە ك) باسەكەلەستىك جانە مونوپولياعا قارسى رەتتەۋ جونىندەگى ءمينيسترى نۇرلان الدابەرگەنوۆ ءمالىم ەتتى.

«قازىرگى ۋاقىتتا كوميسسيا بەلارۋس ەلىندە شىعارىلعان، ءبىراق «ق ا ز ءونىم» دەپ بەلگىلەنگەن ءسۇت، كەسپە، قانت ونىمدەرىن انىقتادى»، - دەيدى ن. الدابەرگەنوۆ.

ونىڭ سوزىنە قاراعاندا، بۇل ونىمدەردە قازاق ويۋ-ورنەكتەرى، كەيبىرىندە ءتىپتى قازاقستاننىڭ مەملەكەتتىك سيمۆوليكاسى بەلگىلەنگەن.

«اسىرەسە ول بەلارۋس كومپانيالارىنا قاتىستى. بىزدە قازىر وسى جاعدايعا قاتىستى كەلىسسوزدەر جۇرگىزىلۋدە. ەگەر الەۋمەتتىك سۇراۋ بارىسىندا حالىق بۇل ويۋ-ورنەكتەر ولاردى جاڭىلىستىراتىنىن ايتاتىن بولسا، كومپانياعا ايىپپۇل سالىنادى»، - دەدى  ن. الدابەرگەنوۆ.

اتالمىش وقيعاعا قاتىستى الەۋمەتتىك زەرتتەۋدى ەۋرازيالىق ەكونوميكالىق كوميسسيا جۇرگىزەدى.

«ەگەر تاۋاردا «قازاقستان» دەپ تايعا تاڭبا سالعانداي جازىلىپ تۇرسا، قازاق ويۋ-ورنەكتەرىمەن بەزەندىرىلگەن بولسا، جەرگىلىكتى حالىق بۇل وتاندىق تاۋار ەكەن دەپ، جاڭىلىسىپ سول تاۋاردى ساتىپ الاتىنى انىق. شەت مەملەكەتتەردە بۇنداي وقيعانى زاڭ بۇزۋشىلىق دەپ تانيدى جانە ارنايى انتيمونوپوليالىق ورگان بۇل ماسەلەمەن اينالىسادى. ەۋرازيالىق ەكونوميكالىق وداق اياسىنداعى كومپانيالارعا بۇل تۋرالى ناقتى ايتىلدى. ماركىلەۋ جانە تاۋاردى بەزەندىرۋ تالاپتارعا ساي بولۋى ءتيىس. تۇتىنۋشىلاردى جاڭىلىستىراتىنداي انىق بۇزۋشىلىقتار بولماۋى كەرەك. بۇل جاعىنان ءبىز مۇقيات بولعانىمىز ابزال»، - دەپ اتاپ ءوتتى ول.

اۆتور: جاسۇلان جولدىبايەۆ