قازاقستاندىق بوكسشى رۋسلان ماديەۆ گولوۆكين- لەمە اندەركارتىندا جەڭىسكە جەتتى

 استانا. قازاقپارات - نيۋ- يوركتە Madison Square Garden ارەناسىندا ءوتىپ جاتقان گولوۆكين- لەمە اياسىنداعى شوۋدا جۇدىرىقتاسقان قازاقستاندىق بوكسشى رۋسلان ماديەۆ جەڭىسكە جەتتى.

 ءبىرىنشى جارتىلاي ورتا سالماقتا ونەر كورسەتەتىن 22 جاسار رۋسلان ماديەۆ 26 جاستاعى امەريكالىق وسكار سانتاناعا قارسى كەزدەسۋ وتكىزگەن بولاتىن. جەكپە- جەك بارلىق ءتورت راۋندقا سوزىلدى جانە قازىلاردىڭ شەشىمىمەن (40:35, 40:35, 39:36) اياقتالدى.

 وسىلايشا، قازاق بوكسشىسى ءوز مانسابىندا وتكىزگەن التى كەزدەسۋدە التىنشى جەڭىسىنە قول جەتكىزدى. ونىڭ ۇشەۋى - نوكاۋت. سانتانا ءۇشىن اتالمىش جەكپە- جەك العاشقى جەڭىلىس بولىپ وتىر.

ەسكە سالايىق، گولوۆكين - لەمە جەكپە- جەگىنە از ۋاقىت قالدى. بۇل كەزدەسۋدى تىكەلەي ەفيردە «قازاقستان» تەلەارناسى كورسەتەدى.