قازاقستان- قىتاي مەملەكەتتىك شەكاراسىنىڭ رەجيمى تۋرالى زاڭ جوباسى قارالدى
2006 - جىلعى 20 - جەلتوقساندا بەيجىڭ قالاسىندا جاسالعان كەلىسىم اۋماقتارعا قول سۇعىلماۋشىلىقتى قامتاماسىز ەتۋ، قۇقىققا قارسى ارەكەتتەردىڭ جولىن كەسۋ، شەكاراداعى توسىن وقيعالاردى شەشۋ جولدارىن بەلگىلەۋ جانە ەكى مەملەكەتتىڭ شەكارا وكىلدەرىنىڭ ءوزارا ءىس- قيمىل ءتارتىبىن رەتتەۋگە باعىتتالعان. كەلىسىمدى راتيفيكاتسيالاۋ قازاقستان مەن قىتاي اراسىنداعى تاتۋ كورشىلىك قارىم- قاتىناستى ودان ءارى نىعايتۋعا جانە ەكى جاقتى ىنتىماقتاستىقتى دامىتۋعا ىقپال ەتەتىن بولادى.
كوميتەت وتىرىسىندا «قوعامدىق كەڭەستەر تۋرالى» زاڭ جوباسى دا قارالدى. قۇجات قوعامدىق ماڭىزى بار ماسەلەلەر بويىنشا ازاماتتىق قوعامنىڭ پىكىرىن ءبىلدىرۋ ماقساتىندا قۇرىلاتىن قوعامدىق كەڭەستەردىڭ قۇقىقتىق مارتەبەسىن، ولاردىڭ قىزمەتىن قالىپتاستىرۋ جانە ۇيىمداستىرۋ ءتارتىبىن ايقىنداۋعا باعىتتالعان. قوعامدىق كەڭەستەر ەكى دەڭگەيدە - رەسپۋبليكالىق جانە جەرگىلىكتى دەڭگەيلەردە قۇرىلادى.
زاڭ جوباسىندا قوعامدىق كەڭەستى قالىپتاستىرۋ ءتارتىبى مەن ونىڭ ساندىق قۇرامى، سونداي- اق ونىڭ مۇشەلەرىنە قويىلاتىن بىلىكتىلىك تالاپتارى تۋرالى ەرەجەلەر كوزدەلگەن.
قابىلداناتىن ەرەجەلەر مەملەكەتتىك ورگاندار قابىلدايتىن شەشىمدەرىنە ازاماتتىق قوعام ينستيتۋتتارىن كەڭىنەن قاتىستىرۋدى قامتاماسىز ەتۋگە باعىتتالعان. جوبا قوعامدىق مونيتورينگ، قوعامدىق تىڭداۋلار، قوعامدىق ساراپتاما، مەملەكەتتىك ورگاندار جۇمىسىنىڭ ناتيجەلەرى تۋرالى ەسەپتى تىڭداۋ سەكىلدى قوعامدىق باقىلاۋ تۇرلەرىن رەتتەيدى.
ودان باسقا، كوميتەت وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قوعامدىق كەڭەستەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ىلەسپە زاڭ جوباسى قارالدى. بيۋدجەت كودەكسىنە جانە ءبىرقاتار زاڭدارعا ەنگىزىلەتىن وزگەرىستەر «قوعامدىق كەڭەستەر تۋرالى» زاڭ جوباسىنىڭ ەرەجەلەرىنە سايكەس كەلتىرۋ ماقساتىندا ازاماتتاردىڭ قۇقىقتارىنا، بوستاندىقتارى مەن مىندەتتەرىنە قاتىستى ماسەلەلەردى رەتتەيدى.
زاڭ جوبالارى پالاتانىڭ قاراۋىنا جىبەرىلدى.
اۆتور: سەرىك قاراجان