قازىر ونىڭ جاسىل ساباعى جەردىڭ بەتىنە شىعىپ، ءوزى توپىراقتىڭ استىندا ءوسىپ-ونەدى. ال بۇرىن ءبارى باسقاشا بولعان ەكەن...
كۇندەردىڭ كۇنىندە ءسابىز بالالىق قىزىعۋشىلىقپەن اڭداردىڭ قالاي ءومىر سۇرەتىنىن بىلگىسى كەلىپ، ورمانعا جول تارتادى. ۇزاق-ۇزاق جولداردان ارىپ-تالىپ، شارشاسا دا، ماقساتىنا جەتەدى.
كوز تويمايتىن ءتۇرلى-ءتۇستى گۇلدەرمەن كومكەرىلگەن ورمانعا كەلىپ، تابيعاتتىڭ تاماشاسىنا تاڭدانادى. ول گۇلدەردى تەرىپ الىپ، ولاردان شاشقا تاعاتىن ادەمى اشەكەي ورەدى. ءوزىنىڭ ۇلپىلدەگەن جاسىل شاشىنا تاعىپ الادى دا، ءوزىنىڭ شەبەرلىگىنە ريزا كەيىپپەن ارى قاراي سەكەڭدەپ جۇگىرە جونەلەدى.
الدىنان سىلدىراپ اققان سۇلۋ سىڭعىرلى بۇلاق كەزدەسەدى. بۇلاقتىڭ سۋىق سۋىنا جۋىنىپ، بوي سەرگىتىپ الادى دا، ارى قاراي جۇگىرىپ كەتەدى.
ورمان جولدارىمەن جۇگىرىپ-سەكىرىپ، ەشتەڭەدەن قورىقپاستان وتە بەرەدى. باتىل ءسابىز ايۋمەن، ونىڭ قونجىقتارىمەن تانىسادى، قاسقىرعا قوناققا بارادى، تيىنمەن بىرگە جاڭعاعىن ءبولىسىپ جەيدى. قۇستارمەن بىرگە قيقۋلاپ ءان سالىپ، تۇلكىمەن تانىسىپ، ءسابىز بەن تۇلكى ەكەۋىنىڭ قايسىسىنىڭ ءتۇسى اشىقتاۋ ەكەنىن سالىستىرادى.
ءسابىز قىدىرىپ، سەرۋەندەپ، قايتا ۇيىنە كەلە جاتادى. جولدا بيىك ءشوپتىڭ ۇستىندە تۇرعان سۇيكىمدى ۇيشىكتى كورىپ قىزىعادى. جاقىنداپ كەلىپ، ەسىگىن قاعادى، ءبىراق ەشكىم اشپايدى. ءسابىز سوندا دا ءوزى ۇيگە كىرۋدى ۇيعارادى.
ءۇيدىڭ قابىرعاسىندا ءىلۋلى تۇرعان سۋرەتكە قاراپ بۇل قوياننىڭ ءۇيى بولار دەپ جورامالدايدى. ءۇيدىڭ ءىشىن ارالاپ، اينالانى بارلاپ شىعادى. ءبىر كەزدە ۇستەل ۇستىندە تۇرعان ادەمى اشەكەيگە كوزى تۇسەدى دە، قىزىعىپ كەتىپ، العىسى كەلەدى. ناعىز توي ءسانى دەپ ويلايدى.
شاشىنا تاعىپ الىپ، ءوز كوركىنە ءوزى تويماي، اينانىڭ الدىنان كەتە الماي تۇرادى. كەنەت ءۇي يەسى قوياننىڭ كەز كەلگەن ساتتە كىرىپ كەلۋى مۇمكىن ەكەنى ەسىنە ساپ ەتە تۇسەدى. سول ساتتە ەسىك جاقتان اياق دىبىسى ەستىلىپ، جۇرەگى زىرق ەتە تۇسەدى.
ۇرى ءسابىز قورىققانىنان قالتىراپ، قايتەرىن بىلمەي قالادى. قوياننىڭ قاسىنان زىر ەتىپ ءوتىپ، زۋىلداي قاشا جونەلەدى. قويان ءوزىنىڭ اشەكەيىن ۇرلاپ بارا جاتقانىن كورەدى دە، ىزىنەن زىمىراي قۋا جونەلەدى. ءسابىز وعان جەتكىزبەي شاپشاڭ قاشىپ كەتەدى.
زۋىلداعان بەتىمەن جىلدام-جىلدام جۇگىرىپ، ءوز باقشاسىنا كەلىپ، جەر استىنا تىعىلىپ قالادى. قويان ونىڭ جاسىل شاشىنان ۇستاپ ۇلگەرەدى دە، ارى-بەرى جۇلقىلاي باستايدى. قويان ءوز اشەكەيىنە قول جەتكىزەدى.
ال ءسابىز جەر استىنا بەرىك ەنىپ كەتكەندىكتەن، ونى جۇلقىلاپ شىعارا المايدى. وسى كەزدەن باستاپ ءسابىز توپىراقتىڭ استىندا ءوسىپ، ساباعى جەردىڭ بەتىنە شىعىپ تۇراتىن بولعان ەكەن.
ال ءسابىز بىرەۋدىڭ ۇيىنە رۇقساتسىز كىرىپ، زاتتارىن ۇرلاۋعا بولمايتىنىن ءتۇسىندى. ۇرلىقتىڭ ارتى جاقسىلىققا اپارمايتىنىن ءبىلىپ، ەندى مۇنداي قادامعا بارمايتىن بولىپ شەشتى.
massaget.kz