اقتوبەنىڭ قىز-كەلىنشەكتەرى ساپاربايەۆقا عاشىق بولىپ قالدى
بۇل تۋرالى NUR. KZ پورتالىنىڭ اقتوبەدەگى مەنشىكتى ءتىلشىسى حابارلايدى.
اقتوبە حالقىنىڭ كوزقاراسى 180 گرادۋسقا وزگەردى. قالادا بيلىككە سەنىممەن قارايتىنداردىڭ سانى ارتقان. ايماقتا جاسالىپ جاتقان قىزۋ تىرلىك سوزبەن ەمەس، ىسپەن دالەلدەنىپ جاتىر. كولىك كەپتەلىسى اۋزى-مۇرنىنا شىعىپ تۇراتىن بازارلاردىڭ ماڭى ءاپ-ساتتە تازاردى، سەنبى سايىن مەكەمە قىزمەتكەرلەرى كوشە تازالاپ جۇرەدى.
قازىر اقتوبەدە ۇيىمداستىرىلاتىن رەسمي جيىندار مەن شارالاردىڭ دا ءوتۋ ءتارتىبى وزگەرگەن. قاراپايىمدىلىق باسىم.
« كەشە مۇگەدەكتەردىڭ كورمەسىنە اكىم كەلگەندە اڭگىمەسىنەن ءىشىم جىلىپ قالدى. قازاقىلىعى باسىم، كادىمگىدەي جاتىق سويلەيدى ەكەن. ول كورمەنىڭ وزىندە كوپ ادامعا كوڭىل اۋداردى. اكىمنىڭ حالىققا جاقىن بولعانى جاقسى ەمەس پە؟»، - دەيدى « قوس شىنار» قوعامدىق بىرلەستىگىنىڭ باسشىسى عالىمجان بايدەربەس.
قازىر وبلىس اكىمىنىڭ ورىنباسارلارى دا مۇلدە وزگەرىپ كەتتى، وزدەرىن باسقاشا ۇستايتىن بولعان. بۇرىن اكىممەن بىرگە جۇرەتىن، شاراعا تۋرا كەلىپ، تۋرا كەتەتىن قىزمەتكەرلەردىڭ بۇگىنگى كەلبەتى باسقا. ۇيىمداستىرىلاتىن كەز-كەلگەن جيىنعا اكىمنەن ەرتە كەلەدى، اينالامەن تىلدەسىپ جۇرەدى.
اكىمگە قاتىستى قىزىق مۇنىمەن شەكتەلمەيدى. قازىر اقتوبەلىكتەر كوشەگە شىقسا، جان-جاعىنا ەلەڭدەپ قارايتىن بولعان. ءارقايسىسىنىڭ كوڭىلىندە « اكىمدى كوشەدەن كورىپ قالام با؟» دەگەن ءۇمىت بار. بىرنەشەۋى كوردى دە. سىرتىنان سۋرەتكە ءتۇسىردى، الەۋمەتتىك جەلىلەرگە سالدى.
«جاڭا الدىمنان تانىس بىرەۋدى كوردىم. قاراپايىم كۋرتكامەن قولىن قالتاسىنا سالىپ العان، كەتىپ بارا جاتىر. مىنا ادامدى قايدان كوردىم دەپ كوپ قاراپ تۇردىم. سويتسەم اكىم ەكەن عوي»؛ « اكىم قاسىنا كومەكشىسىن ەرتىپ الىپ جۇرەدى ەكەن. كوشەدەن بىرنەشە رەت كوردىم»؛ «اكىم اۆتوپارككە بارعان ەكەن، كۇزەتتەگىلەر قۇجاتىڭدى كورسەت دەپ، كىرگىزبەي قويىپتى»؛ «اكىم كەشە پالەنشە دەگەن مەكتەپكە بارىپتى. ەسىكتىڭ الدىندا جۇرەتىندەر «ىشتە ديرەكتور جوق، كەيىن كەلىڭىز، قازىر شىعىڭىز» دەپ يتەرىپ جىبەرىپتى مىس...».
حالىق اۋزىندا «اكىم...» دەپ باستالاتىن، سان-ساققا جۇگىرگەن اڭگىمە كوپ.
«اكىم سونداي جاقسى ادام. ونى جاقسى كورمەيتىن ادام جوق شىعار. جىميىپ جىلى كۇلەدى. ول كىسى باسقا جەرلەردى ارالاعان كەزدە الدىنان قىز-كەلىنشەكتەر شىقسا، قىزعانىپ قالامىن»، - دەيدى ءوزىنىڭ اتىن اتاماۋدى وتىنگەن اكىمدىك قىزمەتكەرلەرىنىڭ ءبىرى.
ساپاربايەۆتىڭ باتىر بەينەسىن جاساپ ۇلگەرگەن اقتوبەلىكتەر ەندى اكىم وزگەرسە، قابىلداۋ قيىن بولادى-اۋ دەپ قورقادى.