ءبىز بۇل مەرەكەنى تاريحىمىزدىڭ تەرەڭ ەكەندىگىن بۇكىل الەمگە تانىتۋ، وسكەلەڭ ۇرپاققا جەتكىزۋ ءۇشىن وتكىزىپ وتىرمىز - ن. نازاربايەۆ
قازاقستان پرەزيدەنتى ءراسىم اياسىندا مونۋمەنت تۇعىرىنا گۇل قويىپ، قۇتتىقتاۋ ءسوز سويلەدى.
مەملەكەت باسشىسى بارشا حالىقتى قازاق حاندىعىنىڭ 550 جىلدىعىمەن قۇتتىقتاپ، استانادان باستالىپ، تارازدا جالعاسىن تاپقان مەرەكەلىك شارالاردىڭ ماڭىزدىلىعىن اتاپ ءوتتى.
«وتكەن تاريحىمىزدى زەرتتەپ، مالىمەت جيناۋ ءۇشىن تاۋەلسىزدىك جىلدارىندا الەمنىڭ تۇكپىر-تۇكپىرىنە ەكسپەديتسيالار ۇيىمداستىرىلدى. ءبىزدىڭ تاريحىمىز باستاۋىن ساق، عۇن، تۇركىلەردەن الىپ، كەرەي مەن جانىبەك حانداردىڭ شۋ الابىنا كوشىپ، قازاق حاندىعىنىڭ تۋىن كوتەرۋىمەن جالعاسادى. ءبىز بۇل مەرەكەنى تاريحىمىزدىڭ تەرەڭ ەكەندىگىن بۇكىل الەمگە تانىتۋ ءۇشىن، وسكەلەڭ ۇرپاققا جەتكىزۋ ءۇشىن وتكىزىپ وتىرمىز»، - دەدى قازاقستان پرەزيدەنتى.
نۇرسۇلتان نازاربايەۆ قازاق حاندىعىنىڭ 550 جىلدىعى جالپى حالىقتىق مەرەكە ەكەنىن اتاپ ءوتتى.
«مەرەكەگە وراي تاراز قالاسىنىڭ دا كەلبەتى جاڭاردى. بۇعان قازاقستاننىڭ بارلىق وبلىسى اتسالىستى، سول ءۇشىن ولارعا العىس بىلدىرەمىز. وسىنىڭ ءبارى - ۇرپاقتىڭ اتا-بابالار اماناتىنا ادالدىعىنىڭ، ۇلى دالا تاريحىنا تاعزىمىنىڭ نىشانى. 17 ەلدەن كەلگەن قوناقتارعا العىس ايتامىن»، - دەدى مەملەكەت باسشىسى
قازاقستان پرەزيدەنتى جامبىل وبلىسىنىڭ قارقىندى دامىپ كەلە جاتقانىنا دا نازار اۋداردى.
«بيىل 170 مىڭ شارشى مەتر باسپانا سالىندى. جىل باسىنان بەرى 7 مەكتەپ، 3 بالاباقشا، اۋرۋحانا پايدالانۋعا بەرىلدى. يندۋستريالاندىرۋدىڭ ءبىرىنشى بەسجىلدىعى اياسىندا 33 نىسان ىسكە قوسىلدى، ەكىنشى ونەركاسىپتىك بەسجىلدىقتا 27 نىساندى ىسكە قوسىپ، 6000 جۇمىس ورنىن اشۋ قاراستىرىلعان. «باتىس ەۋروپا -باتىس قىتاي جوباسى» اياقتالىپ كەلەدى. وسى قالا ارقىلى تەمىرجول، گاز قۇبىرى وتەدى. مۇنىڭ ءبارى حالىقتىڭ يگىلىگى ءۇشىن جاسالۋدا. جامبىل وبلىسى ەلىمىزدىڭ باسقا دا وڭىرلەرى سياقتى ءوز دامۋى جولىندا جاڭا بيىكتەرگە جەتەتىن بولادى. ءبىز تابىستارىمىز ارقىلى الەمدەگى ەڭ دامىعان 30 ەلدىڭ قاتارىنا قوسىلۋ نيەتىندەمىز، بۇل «قازاقستان-2050» ستراتەگياسىنىڭ نەگىزگى ماقساتى بولىپ تابىلادى. سونىمەن قاتار، «نۇرلى جول» جانە يندۋستريالاندىرۋ باعدارلامالارى، سونداي-اق بەس ينستيتۋتسيونالدىق رەفورما دا ەلىمىزدىڭ بولاشاعىنا جول اشادى»، - دەدى نۇرسۇلتان نازاربايەۆ.
مەملەكەت باسشىسى جامبىل وبلىسىندا 100 دەن اسا ەتنوس وكىلدەرى دوستىق پەن كەلىسىمدە ءومىر ءسۇرىپ جاتقانىن ايتتى.
«ءبىز كەز كەلگەن مەرەكەنى حالىققا كوبىرەك يگىلىك جاساۋ ءۇشىن پايدالانامىز. الەمدە تۇراقسىزدىق، قاقتىعىستار مەن سوعىستار بولىپ جاتىر، ال ءبىزدىڭ ەلدە ءبارى تاتۋ ءارى ءوزارا سىيلاستىق نەگىزىندە ءومىر سۇرۋدە. قازاقستاندى الەمنىڭ وزگە ەلدەرى بىلەدى، قۇرمەتتەيدى. ەلىمىز قاقتىعىستاردى شەشۋ ىسىندە اراعايىندىق جاساپ، الەمدىك جانە ءداستۇرلى دىندەر كوشباسشىلارى سەزىن وتكىزىپ كەلەدى. وسىنىڭ بارىنە حالقىمىزدىڭ بىرلىگى ارقاسىندا قول جەتكىزدىك»، - دەدى قازاقستان پرەزيدەنتى.
سوڭىندا مەملەكەت باسشىسى كوپشىلىكتى تاعى دا قۇتتىقتاپ، يگىلىك پەن باق-بەرەكە، سونداي-اق ەلىمىزگە تىنىشتىق پەن بەيبىتشىلىك تىلەدى.
مونۋمەنتتى اشۋ راسىمىنە 5000 عا جۋىق ادام قاتىستى. ەسكەرتكىش ستەللاسىنىڭ بيىكتىگى 28 مەتردى قۇرايدى، ونىڭ تۇعىرىندا بيىكتىگى 4,2 مەتر بولاتىن كەرەي مەن جانىبەك حانداردىڭ مۇسىندەرى قويىلعان.