قازاقستان مەن موڭعوليا ماماندارى گەندەرلىك ساياسات ماسەلەسىن تالقىلادى
2015 -جىلعى 6 - قازاندا ۇلان- باتور قالاسىندا موڭعوليانىڭ يندۋستريا جانە ساۋدا ۇلتتىق پالاتاسىنىڭ عيماراتىندا «قازاقستان- موڭعوليا: ايەلدەردى مەملەكەتتىك، جەكە جانە ازاماتتىق سەكتورلاردا ىلگەرىلەتۋ بويىنشا ەكى ەلدىڭ تاجىريبەسى» تاقىرىبىندا حالىقارالىق كونفەرەنتسيا وتكىزدى، - دەپ حابارلايدى baq.kz سايتى
كونفەرەنسيانىڭ ماقساتى - وڭىرلىك ىنتىماقتاستىقتى دامىتۋ، ايەلدەردى ساياسي جانە ەكونوميكالىق ىلگەرىلەتۋ ماسەلەلەرىن، «جاسىل ەكونوميكانى» ، قولونەرشىلىكتى دامىتۋ پەرسپەكتيۆالارىن جانە «ەكسپو-2017» حالىقارالىق مامانداندىرىلعان كورمەسىنە قاتىسۋ ماسەلەلەرىن تالقىلاۋ.
كونفەرەنسيانى اشقان موڭعوليا ۇلتتىق ساۋدا- ونەركاسىبى پالاتاسىنىڭ ءتورايىمى ماگۆان ويۋۋنچيمەگ كونفەرەنسيانىڭ كورشىلەس ەكى ەل ايەلدەرىنىڭ باسىن قوسقان تۇڭعىش ءىس- شارا ەكەندىگىن اتاپ كورسەتىپ، وسىنداي باستاما جاساعانى ءۇشىن قازاقستان تاراپىنا ريزاشىلىعىن ءبىلدىردى. ءوز سوزىندە ول بيزنەستە، تاۋ- كەن ءوندىرىسى، كاسىپكەرلىك، ساۋدا سالالارىندا بىرلەسە اتقاراتىن كوپتەگەن جوبالاردى قولعا الىپ، ىنتىماقتاستىقتا جۇمىس ىستەۋگە بولاتىنىنا سەنىم ءبىلدىردى.
كونفەرەنسياعا قازاقستان رەسپۋبليكاسىنىڭ موڭعولياداعى توتەنشە جانە وكىلەتتى ەلشىسى ق. ي. قوبلاندين قاتىسىپ، قۇتتىقتاۋ سوزىندە مۇنداي ءىس- شارالار ەكى ەلدىڭ اراسىندا قالىپتاسقان تاتۋ كورشىلىك قاتىناستاردى نىعايتا تۇسەدى دەپ اتاپ كورسەتتى.
قازاقستان دەلەگاتسياسىن باستاپ بارعان قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ ءتورايىمى، ۇلتتىق كوميسسيانىڭ مۇشەسى، گەنەرال س. م. ايتبايەۆا كونفەرەنتسيا قاتىسۋشىلارىنا قۇتتىقتاۋ ءسوز سويلەپ، «قازاقستاندا ايەلدەردىڭ ەكونوميكالىق جانە ساياسي ىلگەرىلەتىلۋى جانە قۇقىقتارى مەن مۇمكىندىكتەرىنىڭ كەڭەيتىلۋى» تاقىرىبىندا بايانداما جاسادى.
موڭعوليانىڭ حالىق جاعدايىن دامىتۋ جانە الەۋمەتتىك قورعاۋ مينيسترلىگىنىڭ باسقارما باسشىسى نوەن ح. بااۆگاي «م ح ر ايەلدەرىنىڭ قازىرگى جاعدايى جانە ولاردىڭ ەلدىڭ دامۋىنا قوساتىن ۇلەسى» تاقىرىبىندا بايانداما جاساپ، بۇگىندە ءۇش باعىتتا جۇمىس جۇرگىزىلۋ كوزدەلەتىن باعدارلاما قابىلدانىپ، جۇمىس جۇرگىزىلىپ جاتقانى تۋرالى باياندادى. ولار: «دامۋعا ايەلدەر قوسقان تاريحي ۇلەس» ، «ايەلدەردىڭ قازىرگى كەزدەگى جاعدايى» جانە «بۇگىنگى كۇننىڭ وزەكتى پروبلەمالارى» دەپ اتالادى.
بۇدان كەيىن جۇمىس باعدارلاما بويىنشا جۇرگىزىلىپ، ەلدى دامىتۋعا ايەلدەردىڭ ۇلەس قوسۋى، بيزنەستە ايەلدەردى ىلگەرىلەتۋ، ىقپالداستىقتىڭ ماڭىزدى فاكتورى - ءداستۇرلى قولونەرشىلىك تاقىرىپتارى بويىنشا سەسسيالىق پىكىر الىسۋلار باستالىپ، قاتىسۋشىلار ءوز سالالارى بويىنشا باياندامالار جاساپ، تانىستىرىلىمدار وتكىزدى.
سەسسيا جۇمىستارى كەزىندە ايتىلعان ەكى ەلدەگى مەملەكەتتىك قىزمەتتە، كاسىپكەرلىكتى دامىتۋدا گەندەرلىك تەڭگەرىمدى ساقتاۋ بويىنشا وزىق تاجىريبەلەردى ءوز ەلدەرىندە ىسكە اسىرۋ قاجەتتىگىن اتاپ كورسەتتى.
جيىنعا مونعولياداعى قازاق ايەلدەرىنىڭ «ارۋ جۇلدىزدار» قوعامدىق بىرلەستىگىنىڭ مۇشەلەرى، بۇقارالىق اقپارات قۇرالدارىنىڭ وكىلدەرى كەلىپ قاتىستى.
كونفەرەنتسيا اياسىندا ەكى تاراپ قولونەرشىلەرى شىعاراتىن تاۋارلاردىڭ كورمەسى وتكىزىلدى.
سونداي- اق ۇلان- باتورداعى ايەلدەر باسقاراتىن كاسىپورىندارعا بارىپ، ولاردىڭ قىزمەتىمەن تانىسۋ جوسپارلانعان.