ۇيىمداستىرۋشىلار: قالاداعى قاپتاعان قوعامدىق ۇيىمداردىڭ - ءبىرى. تاقىرىبى - ايتا- ايتا ءتىلىمىز تەمىر تاتىپ كەتكەن (جۇماتاي سابىرجان ۇلى) «مەملەكەتتىك ءتىلدىڭ مەرەيىنە» قاتىستى دەلىندى.
سونىمەن جيىن باستالدى. اباي اتام ايتپاقشى: «جارتاسقا باردىم، كۇندە ايعاي سالدىم، ودان دا شىقتى جاڭعىرىق» . شەشەندەر مەن كوسەمدەر اعىل- تەگىل اقتارىلدى. جينالعانداردىڭ ىشىندە قوعامدىق ۇيىمداردىڭ وكىلدەرى دە بار ەكەن. جيىن قازاقشا وتە باستاعان تۇستا كەيبىر ۇلتتىق ورتالىقتاردان كەلگەن وكىلدەر شىعىپ جۇرە بەردى. ولارعا قاراپ جاتقان ءبىز جوق اۋىزدى كەرەقارىس اشىپ قويىپ، زارلاپ جاتىرمىز.
سودان ءبىر ۋاقتا، اياعىن انتەك- تانتەك باسىپ ارەڭ جۇرگەن، اق بالىقتىڭ قابىرشىعىنداي جۇقا عانا، ۇلتى باسقا جاپىراق سارى ستۋدەنت: «قازاق ءتىلى دەپ ايتا بەرگەننەن تۇكتە كوگەرمەيدى» دەگەن ماعىنا دا مىڭق ەتىپ بىردەمە ايتىپ قالدى. ىشىنە ابدەن ءتىلدىڭ شەرى قاتىپ، تىك ىشەگى مۇزداپ قالعان تانىمال پروفەسسور اعامىز تۇردى دا، الگى نەمەرەسىندەي جاپىراق سارىعا قاراتىپ، جارتى ساعات ورىسشا تۇسىندىرمە ايتىپ شىقتى. اياعىندا جىلارمان بولدى. اعامىزدى ارەڭ توقتاتىپ، الگى ستۋدەنتكە قاراساق ول جىرق- جىرق كۇلىپ، سوتكاسىمەن «زمەيكا» («جىلان جۇتقان» ) ويناپ وتىر.
جامىراي شۋلاپ جاتىپ، جيىندى ەندى اياقتاۋعا جاقىنداعان ساتتە، مانادان بەرى ءولى جانداي ءۇنسىز، مەڭىرەۋ ادامداي مۇلگىپ وتىرعان، كوممۋنيستتىك پارتيانىڭ استانا قالالىق وكىلى، سارى شال اقىرىپ ورتاعا شىقتى. ءجۇزى ءورت سوندىرگەندەي تۇتىگىپ كەتكەن. كوزىنە باياعىدا قامشى ءتيىپ جاسقانشاقتاپ قالعان ۇلكەن اعالارىمىز باسىن بۇركەپ الا قويدى.
ءبىر زاماندا، اشۋىن ارەڭ باسقان سارى شال: «بۇل نە سۇمدىق، زاڭدا ورىس ءتىلى، مەملەكەتتىك تىلمەن قاتار قولدانىلادى دەپ، جازۋلى تۇر، مەنىڭ قۇقىمدى نەگە تاپتايسىڭدار، جيىننىڭ كوبى قازاق تىلىندە ءوتتى، بۇنداي بەيباستىقتىققا مەن جول بەرە المايمىن» دەپ، شىرەنسىن كەلىپ. ونىمەن قويماي «ۇلتارالىق قاتىناسقا سىزات ءتۇستى» دەگەندە، جيىندى ۇيىمداستىرىپ وتىرعان وكىلدىڭ كوزى شاراسىنان شىعاپ كەتتى. الدىنداعى ستاكانداعى سۋدان جۇتىپ- جۇتىپ جىبەرىپ، قاقالىپ- شاشالىپ ءسوز باستادى.
سونىمەن قىسقاسى، ەل- جۇرت بولىپ ارەڭ دەگەندە سارى شالدىڭ اشۋىن باستىق. اقىرىندا، «بايقاماي قازاق تىلىندە جيىن وتكىزىپ قويىپپىز، قۇداي كەشسە، سىزدە كەشىرەرسىز!» دەدىك. ايتەۋ، ارەڭ قۇتىلدىق!
جيىن تارقاعاندا باسقارىپ وتىرعان ادام ورىندىعىنان ءۇش ۇمتىلىپ تۇرا الماي قالدى. سويتسەك، قورىققاندىقتان قول اياعىنان جان كەتىپ، ۇيىپ قالىپتى. ونى سۇيەمەلدەپ كومەكشىلەرى الىپ كەتتى.
«نامىس»