ك. ماركۋس قازاقستاندا تۇراتىن نەمىستەردىڭ باستى پروبلەماسىن ايتتى

استانا. قازاقپارات - قازاقستان تۇراتىن نەمىستەردىڭ باستى پروبلەماسى - انا تىلدەرىن جەتىك بىلمەۋى.

بۇل تۋرالى بۇگىن ەلوردادا وتكەن «قازاقستان نەمىستەرى: استانا مەن بەرلين اراسىنداعى كوپىر» تاقىرىبىنداعى حالىقارالىق عىلىمي- تاجىريبەلىك كونفەرەنسيانىڭ نەگىزگى سەسسياسى اياسىندا الماتى قالاسىنداعى نەمىس- قازاق ۋنيۆەرسيتەتىنىڭ وقىتۋشىسى كايزەر ماركۋس ايتتى.

«ءبىز بۇگىن قازاقستانداعى ءتۇرلى ەتنيكالىق توپتار اراسىنداعى قارىم- قاتىناستى تالقىلايمىز. سونىمەن قاتار وسى جەردە تۇرىپ جاتقان جانە گەرمانياعا قونىس اۋدارعان نەمىستەردىڭ دە وزەكتى پروبلەمالارىن كوتەرەمىز. بۇگىنگى كۇننىڭ وزەكتى پروبلەمالارىنىڭ ءبىرى نەمىس تىلىندە جاتىق سويلەيتىن ستۋدەنتتى تابۋى بولىپ وتىر. ءبىزدىڭ ستۋدەنتتەرىمىز باستاپقى 2 جىل ورىس تىلىندە وقىسا، ءۇشىنشى جىلى گەرمانيادان كەلگەن وقىتۋشىلار نەمىس تىلىندە ءدارىس بەرەدى. سول ۋاقىتقا دەيىن ستۋدەنتتەرىمىز نەمىس تىلىندە تازا سويلەۋى قاجەت»، - دەيدى ول.

ونىڭ اتاپ وتۋىنشە، اتالعان جوعارى وقۋ ورنىنىڭ ستۋدەنتتەرى 4- وقۋ جىلىندا گەرمانيادا ءبىلىمىن جالعاستىرىپ، ونى بىتىرگەننەن كەيىن قازاقستانعا دا، گەرمانياعا دا جارامدى ديپلوم الىپ شىعادى. «بۇرىندارى نەمىس ءتىلىن جاقسى بىلەتىن ستۋدەنتتى تابۋ قيىن بولمايتىن. سوڭعى ۋاقىتتا پروبلەمالار تۋىنداۋدا. ءبىز ءتىل ءبىلۋ سالاسىنداعى بۇل احۋالدى قالاي جاقسارتۋعا بولاتىنىن تالقىلادىق»، - دەدى ك. ماركۋس.

ەستەرىڭىزگە سالا كەتەيىك، ەلىمىزدە قازاقستان حالقى اسسامبلەياسى جىلى اياسىندا «قازاقستان نەمىستەرى: استانا مەن بەرلين اراسىنداعى كوپىر» تاقىرىبىندا حالىقارالىق عىلىمي- تاجىريبەلىك كونفەرەنسيا ءۇش كۇنگە سوزىلدى. ءبىرىنشى كۇنى حالىقارالىق شارا الماتى قالاسىندا ۇيىمداستىرىلسا، ودان كەيىن ەلوردا تورىندە ءوتتى. جالپى، بۇگىندە گەرمانيادا قازاقستاننان كوشىپ بارعان 800 مىڭعا جۋىق نەمىس تۇرىپ جاتىر.

اۆتور: مارلان جيەمباي