الماتىدا ۆەلوسيپەد جۇرگىزۋشىسى پوليتسەيلەرگە تاس اتقان - كەسكىن

الماتى. قازاقپارات - الماتى پوليتسەيلەرى ۆەلوسيپەد جۇرگىزۋشىسىن ۇستاۋ سەبەبىن ءتۇسىندىردى.

بۇل تۋرالى قالالىق ءى ءى د باسپا ءسوز قىزمەتىنەن حابارلادى.

 ءىىد رەسمي وكىلى سالتانات ازىربەكتىڭ ايتۋىنشا، جۇرگىزۋشى جول پوليتسياسىنىڭ جول قاۋىپسىزدىگىن قامتاماسىز ەتۋ بارىسىندا «توقتا» دەگەن امىرىنە قۇلاق اسپاعان.

«تيميريازيەۆ كوشەسىمەن كەلە جاتقان ۆەلوسيپەدشى پوليتسەيلەردىڭ ەسكەرتۋىنە قۇلاق اسپاستان، جىلدامدىعىن ازايتپاعان كۇيى ءوتىپ كەتكەن. وسىلايشا، ول كوشەدەگى كولىكتىڭ استىنا تۇسە جازداپ، ءوزى دە اپاتتى جاعدايدىڭ تۋۋىنا سەبەپشى بولدى»، - دەدى س. ازىربەك.

 بەينەروليكتە كورسەتىلگەندەي، 23 جاستاعى ەر ادام ءتارتىپ ساقشىلارىنا تاس لاقتىرىپ، بەيادەپ سوزدەرمەن سىباي جونەلگەن. تابانىن جالتىراتپاق بولعان ەر ادامدى پوليتسەيلەر ۇستاپ الدى. قازىر ول بوستاندىق اۋدانى ءى ءى ب- نا جەتكىزدى.

بيلىك وكىلدەرىنىڭ امىرىنە قۇلاق اسپاعانى ءۇشىن ۆەلوسيپەدشى ق ر ق ك 379 بابىنىڭ 1-تارماعى بويىنشا زاڭ الدىندا جاۋاپ بەرەتىن بولادى.