قازاقتىڭ مۇددەسىن ءوز قايعىلارىنان جوعارى قويدى
قازاق تەاترىن قۇرعان جۇمات شانين الەكساندر زاتايەۆيچپەن تانىسادى. ءسويتىپ، سول كىسىنىڭ شاقىرۋىمەن جۇمات اتامىز قازاق دەلەگاتسياسىن ماسكەۋگە كونسەرت بەرۋگە الىپ بارعان. دەلەگاتسيا قۇرامىندا جۇمات شانين، امىرە قاشاۋبايەۆ، يسا بايزاقوۆ، قاليبەك قۋانىشبايەۆ، سەركە قوجامقۇلوۆ، قۇرمانبەك جانداربەكوۆ، قالي بايجانوۆ، عابباس ايتبايەۆ، ەلۋباي ءومىرزاقوۆ، جانبيكە شانينا (جۇماتتىڭ جۇبايى)، ءداليلا وڭعاربايەۆا بولعان.
ءدال وسى ساپار كەزىندە جانبيكە انامىز جولعا قۇنداقتاعى 6 ايلىق نارەستەسىن دە الا شىعادى. الايدا، ءسابي جولدا قاتتى اۋىرىپ، شەتىنەپ كەتەدى. بۇل قايعى جانبيكە اپامىزعا دا، جۇمات اتامىزعا دا وڭاي تيمەدى. جانبيكە جول بويى جىلاۋمەن بولدى. بالانىڭ شەتىنەگەنىن بايقاسا، بۇلاردى ماسكەۋگە قابىلدامايدى. سودان نە كەرەك، بۇل كونسەرت قازاق ءۇشىن اۋاداي قاجەت ەكەنىن تۇسىنگەن ءبىزدىڭ مىقتىلارىمىز ءسابيدىڭ دەنەسىن جاسىرۋعا تىرىسادى.
ەلۋباي ءومىرزاقوۆ پەن قۇرمانبەك جانداربەكوۆ جولدان ءتۇسىپ قالىپ، بالانى جەرلەپ، ارتتارىنان كەلمەك بولادى. ءبىراق، بۇعان جۇمات قارسى بولادى. سەبەبى، كەلىسىم بويىنشا بۇكىل قۇرام پويىزدان بىرگە ءتۇسۋ كەرەك.
سودان نە كەرەك، ءبارى بىرگە ماسكەۋگە جەتەدى. جانبيكە ءولى ءسابيدى وتىرىك الديلەگەن بولىپ، پويىزدان تۇسەدى. جۇمات، جانبيكە، ەلۋباي جانە قۇرمانبەك تورتەۋى قازپەردكە (ماسكەۋدەگى قازاق وكىلدىگى) بارىپ، بالانى جەرلەيتىن جەر سۇرايدى. ال قالعاندارى قوناقۇيگە ورنالاسادى.
ءسويتىپ، تاڭ اتىسىمەن ەلۋباي مەن قۇرمانبەك بالانى تاتار زيراتىنا اپارىپ جەرلەيدى. ال جۇمات پەن جانبيكە توپقا قايتا قوسىلۋعا ءماجبۇر بولادى. سەبەبى، ارالارىندا ورىسشا بىلەتىن جالعىز جۇمات ەكەن. وسى كەزدە قازاقتىڭ ونەرپازدارىن قارسى الۋعا زاتايەۆيچتىڭ ءوزى كەلەدى. ءبارى جينالىپ وسى سۋرەتكە تۇسكەن. ەلۋباي مەن قۇرمانبەك بالانى جەرلەۋگە كەتكەندىكتەن، سۋرەتكە تۇسپەي قالعان. قالعانىنىڭ ءبارى وسى سۋرەتتە بار.
وسىنداي جانقيارلىقتىڭ ارقاسىندا قازاق ونەرىن ماسكەۋدە كورسەتىلدى. ال شارادان كەيىن امىرە قاشاۋبايەۆ رەسەيدىڭ اتىنان پاريجدە ونەر كورسەتۋگە جولداما العان. كىم بىلەدى، ەگەر سول كەزدە جۇمات پەن جانبيكە وسالدىق تانىتقاندا قازاق ونەرى تانىلماس پا ەدى؟ امىرەنىڭ پاريجگە بارۋى ارمان بولار ما ەدى؟ بۇل كىسىلەر ءوز قايعىلارىنان قازاقتىڭ مۇددەسىن جوعارى قويدى. قازاقتى ءسۇيۋدى سولاردان ۇيرەنۋىمىز كەرەك ەكەن...
(بۇل وقيعا رىمعالي نۇرعاليەۆتىڭ جۇمات شانين جايلى كىتابىندا جازىلعان. «اق جەلكەن» جۋرنالىنا سۇحبات بەرگەن جۇمات ءشانيننىڭ نەمەرەسى بولات شانين دە وسىنى راستاعان بولاتىن)
islam.kz