«ءبىزدىڭ ەلىمىزدە پاتريوتتار فورۋمىن وتكىزىپ، باتىرلارىمىزدى قۇرمەتكە بولەۋ ۇلكەن داستۇرگە اينالدى. «ماڭگىلىك ەل» يدەياسى بىرلىككە، وتانسۇيگىشتىككە ۇندەيتىن جول. ءبىزدىڭ پرەزيدەنت حالىقتى ۇيىستىرىپ، ۇلتارالىق ارازدىقتاردىڭ بولماۋىنا كۇش سالۋى بەكەر ەمەس. مەن، ماسەلەن، تاتۋلىقتى بوكسپەن سالىستىرا الامىن. بەس ساۋساق بەس جاققا بولىنسە - وسالدىق، جۇمىلسا - كۇش، بىرلىك. ەگەر بىرلىك بولماسا، جەتىستىك بولمايدى. بارلىعىنا جەتىستىك تىلەيمىن، ءبىزدىڭ ءاربىر ازاماتىمىز ەل يگىلىگى ءۇشىن قىزمەت ەتسە، ءوز- ءوزىن دامىتسا، سپورتپەن شۇعىلدانسا دەيمىن»، - دەدى س. ساپيەۆ.
ونىڭ اتاپ كورسەتكەنىندەي قازاقستاندا جاستاردىڭ وتانسۇيگىشتىگىن دامىتۋعا ۇلكەن ىستەر جاسالۋدا.
«بىزدە «جاس وتان»، «جاس كەڭەس»، قازاقستان جاستارى كونگرەسى» سىندى ۇيىمدار بار، ونداعى بەلسەندى دە جەتىستىككە جەتكەن جاستار ءوز قاتارلارىنا ءالى ولار سياقتى كورسەتكىشتەرگە جەتپەگەن جاستاردى تارتۋمەن اينالىسادى. وسىلايشا مەملەكەت جاس بۋىنعا قامقورلىق جاساپ كەلەدى، سونىڭ ارقاسىندا العا جىلجىپ كەلەمىز»، - دەپ ءتۇيدى ءسوزىن بوكسشى.
اۆتور: جاسۇلان جولدىبايەۆ