پاريجدە تەمەكى تۇقىلىن جەرگە تاستاساڭىز 68 ەۋرو ايىپپۇل تولەيسىز. ويتكەنى فرانسيا استاناسىندا ساياباقتارمەن كوشەلەردەن جىلىنا 350 توننا، ياعني 30 ميلليارد دانا تەمەكى تۇقىلىن جينايدى ەكەن. قوقىس جاشىگىنىڭ سىرتىنا تۇسكەن ءبىر-ءبىر تەمەكى تۇقىلى 500 ليتر سۋدى لاستايدى، ال جەردە جاتىپ ءىرىپ- شىرۋىنە 12 جىل كەرەك. ونىڭ وزىندە دەنساۋلىققا زيان كادمي مەن قورعاسىن سىندى اۋىر مەتالداردى تۇزەدى. وسى ستاتيستيكا بيلىك وكىلدەرىنىڭ ايىپپۇلدى ەكى ەسەگە كوتەرۋىنە نەگىز بولدى.
ماو پەنينۋ، پاريج مەرىنىڭ ورىنباسارى:
- 68 ەۋرو - شامامەن 10 قوراپ تەمەكىنىڭ قۇنى. ءبىز جەرگە تاستالعان ءبىر تەمەكى تۇقىلىن وسىلاي باعالاپ وتىرمىز. سول ارقىلى ادامداردىڭ تازالىققا دەگەن مادەنيەتىن قالىپتاستىرعىمىز كەلەدى.
قالا باسشىلارىنىڭ تەمەكى تۇقىلىنىڭ ماسەلەسىنە كوڭىل بولۋىنە جىل سوڭىندا پاريجدە وتەتىن ەكولوگيالىق ماسەلەلەرگە ارنالعان دۇنيەجۇزىلىك فورۋمى دا تۇرتكى بولدى. وسىعان دەيىن پاريج كوشەلەرىنە كۇلسالعىشى بار 30 مىڭ ارنايى قوقىس جاشىگى قويىلعان. الايدا ازىرگە ونىڭ دا قالانى قوقىستان ارىلتۋعا كومەگى بولماي تۇر.
ليونەل جورنەل، تازالىق ينسپەكتورى:
- بۇل وتە كۇردەلى ماسەلە. تازالىق ساقتامايتىنداردىڭ ءبىرى - ءيت يەلەرى. ولار ءبىزدىڭ جۇمىس ۋاقىتىمىزدى ءبىلىپ العان. ءبىز جوق كەزدە يتتەرىن قىدىرتادى. ال ولاردىڭ لاستاعان جەرىن ەشكىم تازالاعىسى كەلمەيدى.
سەگولەن رۋايال، فرانسيانىڭ ەكولوگيا ءمينيسترى:
- جەرگىلىكتى باسشىلار وزدەرىنىڭ قۇزىرىنداعى ماسەلەلەرمەن اينالىسۋى كەرەك. قوقىس قالدىقتارىنىڭ كولەمىن 2020 -جىلعا دەيىن 0 عا تومەندەتىپ، ارنايى قىزمەتتى رەتتەۋلەرى ءتيىس. بۇل ۇكىمەتتىڭ اينالىساتىن جۇمىسى ەمەس. كورسيكادا قوقىس پوليگونىن جاساعىلارى كەلەدى، الايدا وعان تيىم سالاتىن زاڭدى وزگەرتۋ مۇمكىن ەمەس. ونى باسقا جولمەن شەشۋ كەرەك. مەن وسى ماسەلەنى ەكولوگيالىق تۇرعىدا ساۋاتتى شەشۋ ءۇشىن تەكسەرىس جۇرگىزۋدى تاپسىردىم.
فرانسيادا 130 ميلليون توننا قوقىستىڭ تەك 40 ميلليون تونناسى عانا قايتا وڭدەلىپ، شيكىزاتقا اينالادى. بۇل دەگەنىمىز - الەمدەگى ەڭ ۇزدىك كورسەتكىشتىڭ ءبىرى. الايدا كورسيكاداعى جاعداي جۋىق ارادا شەشىمىن تاپپاسا فرانتسيانىڭ تازالىق كورسەتكىشىنە نۇقسان كەلتىرۋى مۇمكىن.
www.24.kz