پايعامباردىڭ ساقال ءشاريفى كوكشەتاۋداعى مەشىتكە اكەلىندى - فوتو

كوكشەتاۋ. قازاقپارات - بۇگىن پايعامباردىڭ ساقال ءشاريفى كوكشەتاۋداعى ناۋان حازىرەت مەشىتىنە اكەلىندى.

ەسكە سالا كەتسەك، يسلام الەمى ءۇشىن قاستەرلى دە اسىل قۇندىلىق سانالاتىن پايعامباردىڭ ساقال ءشاريفى وتكەن جىلى اتباسار وڭىرىنەن تابىلعان ەدى.

ءوز بابالارىنان اماناتتاپ، كوزدىڭ قاراشىعىنداي ساقتاپ كەلگەن 85 جاستاعى ءفاتيما اجەمىز وسى ءبىر اسىل جادىگەردى باس ءمۇفتي ەرجان قاجى مالعاجى ۇلىنا تاپسىرعان ەدى.

مۇباراك ءبىر تال قارا ساقالدىڭ پايعامبارىمىز مۇحاممەدكە (س. ع. س.) ءتان ەكەنىن ايعاقتايتىن ارنايى 8 ءمور باسىلعان تاريحي قۇجاتى دا بار. وندا: «مۇحاممەد پايعامباردىڭ ءبىر تال ساقالى 1956-جىلدىڭ 12- قىركۇيەگىندە مەككەگە جينالعان مۇسىلمان قاۋىمىنىڭ قاتىسۋىمەن شەيح احماددينگە بەرىلگەن بولاتىن. مەن بۇل مۇباراك ساقالدى 1921-جىلى مارت ايىندا يۋرتەكە قاجىدان الدىم. العان ادامنىڭ اتى - بوكەي قاجى ساندىباي ۇلى. بوكەي قاجى قايتىس بولعاننان كەيىن ونىڭ ۇلى ابدىبەك الدى. بوكەي قاجىنىڭ قايتىس بولعان جىلى 1924-جىلدىڭ اقپان ايى»، - دەلىنگەن.

ءدىني باسقارمانىڭ عالىمدارى وسى قۇجاتتى قازاق جانە ورىس تىلدەرىنە اۋدارعان ەكەن. ساۋد ارابياسىنىڭ ءبىر توپ ساراپشىلارى دا پايعامبارىمىزدىڭ (س. ع. س.) ساقالى ەكەنىن راستاپتى. ءبىر تال ساقال شىنى ىدىستىڭ ىشىنە ساقتالىپ، ەكى جاعى كۇمىسپەن كۇپتەلگەن. ۇزىندىعى 3 سانتيمەتردى قۇرايدى

مىنە، وسى ءبىر باعا جەتپەس جادىگەر جاڭادان سالىنعان ناۋان حازىرەت مەشىتىنە اكەلىنىپ وتىر.

اقمولا وبلىسى بويىنشا باس يمام قانات قىدىرمين باعا جەتپەس جادىگەردى قاستەرلەپ، ساقتاپ كەلگەن اجەگە العىسىن ءبىلدىرىپ، مەككەگە بارىپ قايتۋعا جولدامانى تاپسىردى، سونداي-اق، اجەمىز وتباسىمەن بىرگە بۋرابايداعى ساۋىقتىرۋ ورنىندا ەم-شيپا الاتىن بولدى.