تارازدا قازاق حاندىعىنىڭ مەرەيتويلىق شارالارىندا ءۇش ءتىلدى ەرىكتىلەر قىزمەت كورسەتەدى

تاراز. قازاقپارات - تارازداعى قازاق مەملەكەتتىلىگىنىڭ مەرەيتويىنداعى سالتاناتتاردا قوناقتاردى ەرىكتىلەر - جامبىلدىق جوعارى وقۋ ورىندارىنىڭ ستۋدەنتتەرى قارسى الىپ، قىزمەت كورسەتەدى، دەپ ءمالىم ەتتى باسپا ءسوز ءماسليحاتىندا جامبىل وبلىسى اكىمىنىڭ ورىنباسارى ەرقانات ءمانجۋوۆ.

«بۇگىندە جاستارسىز ەشبىر شارا وتپەيدى، - دەدى ول. - بۇگىنگى تاڭدا ءبىزدىڭ جوعارى وقۋ ورىندارىمىزدىڭ 400 دەن استام ستۋدەنتى ەرىكتىلەر قاتارىنا جازىلدى، ولاردان وتىنىشتەر ءالى دە كەلىپ تۇسۋدە. ولاردىڭ كوپشىلىگى ءۇش ءتىلدى - قازاق، ورىس، اعىلشىن تىلدەرىن مەڭگەرگەن. ءبىز تاياۋ جانە الىس شەتەلدىك قوناقتارىمىزعا نەعۇرلىم جايلى بولۋى ءۇشىن قولدان كەلگەننىڭ ءبارىن ىستەيمىز».

جامبىل وبلىسى اكىمىنىڭ ورىنباسارى وبلىس ورتالىعىنىڭ قازىرگى ينفراقۇرىلىمدىق جاي-كۇيى مەرەكەلىك شارالار كەزىندە قوناقتاردىڭ جايلى تۇرۋىن قامتاماسىز ەتەتىنىنە سەندىردى.

ەسكە سالا كەتەيىك، قازاق حاندىعىنىڭ 550 جىلدىعىن مەرەكەلەۋ بيىلعى جىلى ەلدىڭ بارلىق وڭىرلەرىندە وتۋدە. بۇدان 550 جىل بۇرىن جايساڭ شاتقالىندا، تالاس جانە شۋ وزەندەرىنىڭ ارالىعىندا كەرەي جانە جانىبەك سۇلتاندار قازاق حاندىعىنىڭ ىرگەسىن قالاعان بولاتىن، جامبىل وبلىسىندا، 7، 8، 9- قازان كۇندەرى وسى ايتۋلى مەرەكە كەڭ اۋقىمدا اتالىپ وتەدى.