ءسوزىنىڭ ءالقيسساسىندا لۋكاشەنكو قازىرگى الەمدەگى اشىقتان- اشىق جاسالىپ جاتقان ساياسي ارسىزدىقتى، وتىرىك پەن ادامعا قارسى قىلمىستاردى ايتا وتىرىپ، سونى جاساپ جۇرگەن اتتوبەلىندەي ەلدەردىڭ باسشىلارىن سىنعا الدى. وسىعان وراي ول جاقىندا بولعان وقيعالاردى ەسكە ءتۇسىرۋدى ۇسىندى.
«يراكتا حيميالىق قارۋ بار دەگەن جەلەۋمەن ءبىرقاتار بەلگىلى مەملەكەتتەر ونى دەموكراتيالاندىرۋعا شەشىم قابىلدادى. ال قايدا قازىر سول حيميالىق قارۋ؟ نەمەسە قايدا ەلدىڭ دەموكراتيالانىپ كەتكەنى؟ يراكتىڭ پرەزيدەنتى نەگە ءولتىرىلدى؟ جالپى، قازىر قايدا بۇل ەل، يراك حالقىنىڭ بولاشاعى قانداي بولماق؟ ەندى وسى مەملەكەتتىڭ تەرريتورياسىندا تۇرىپ، ءومىر ءسۇرۋ جەڭىلدەپ كەتتى مە؟ جوق»، - دەدى لۋكاشەنكو.
«سىزدەر، وسىنىڭ بارىنە كىنالىلەر، قاتەلەسىپ كەتىپپىز دەدىڭىزدەر، سونىمەن ءبارىن توقتاتۋ كەرەك ەدى، ءبىراق ولاي جاساعان جوقسىزدار، مۇنىڭ ورنىنا ودان دا ارىگە كەتتىڭىزدەر. ەندى تۋنيستەن باستاپ، ليۆيامەن اياقتادىڭىزدار. ال سسەناريلەرىڭىز سول باياعىشا. پرەزيدەنت كاددافيدى قازىققا قاعىپ، مەملەكەتتى جويىپ جىبەردىڭىزدەر. وسىدان ليۆيا جاقسى بولىپ كەتتى مە؟ جوق. جالپى، قايدا قازىر تۇتاس مەملەكەت رەتىندەگى ليۆيا؟ » - دەپ اقتارىلدى بەلارۋس ليدەرى.
«مىرزالار، بالكىم، وسىمەن جەتەتىن شىعار؟ جوق، سىزدەر توقتاي قويمادىڭىزدار ، ەندى سيرياعا ۇمتىلدىڭىزدار. سوعان وراي: «نەگە» دەگەن سۇراق تۋادى. نەگە بوستان- بوسقا جۇرتتى قىراسىزدار، نەگە ەلدىڭ ءىس باسىنداعى پرەزيدەنتىن قۇرتۋعا اسىعىپ وتىرسىزدار، ول سىزدەرگە نەسىمەن جاقپاي قالدى؟ بۇعان قوسا، قاندى قىرعىندى ۇيىمداستىرۋ ارقىلى بۇل ەلدەگى سىزدەر مەن بىزدەردىڭ وركەنيەتىمىزدىڭ العاشقى بەلگىلەرىن جويىپ جاتىرسىزدار»، - دەپ توقتادى لۋكاشەنكو.
«ب ۇ ۇ باس اسسامبلەياسىنىڭ مىنبەسىن پايدالانا وتىرىپ، الەمدىك قوعامداستىققا ەندى نەنى ىستەگىلەرىڭىز كەلىپ وتىرعانىن جانە قالاي قاراي ۇمتىلىپ بارا جاتقاندارىڭىزدى ايتىپ بەرىڭىزدەر»، - دەپ تۇيرەدى سوسىن بەلارۋس باسشىسى. وسى ءسوزدىڭ جەلىسىندە الەكساندر لۋكاشەنكو ءوز سوزىمەن الەمدى بيلەپ وتىرعان كۇشتەردى ءبىر ويعا قۇلاق تۇرۋگە شاقىردى.
«قازىر سىزدەردى توقاتاتىن كۇشتىڭ جوق ەكەنى تۇسىنىكتى. ءبىراق وسىنشالىقتى جۇگەنسىزدىكتى جۇزەگە اسىرىپ جۇرگەن مەملەكەتتەر باسشىلارىنىڭ ءبارى دىنگە سەنەتىن، كوپشىلىگى، ءتىپتى، ەلدىڭ كوز الدىندا قۇلشىلىق ەتىپ تۇراتىن ادامدار عوي. سوندا قۇداي مۇنىڭ ءبارىن كورىپ وتىرعان جوق پا؟ ول قاشاندا ءادىل. ەگەر قاھارىنا مىنسە، ايىپتىلاردى جازالاپ تاستاماي ما؟ ال سىزدەردىڭ ارانداتۋشىلىق تىرلىكتەرىڭىز ءۇشىن ءوز حالىقتارىڭىز جازىقسىز جاپا شەگەدى. مەن سىزدەردىڭ ەندى توقتاۋلارىڭىز كەرەك دەپ ەسەپتەيمىن. كەدەي ەلدەردىڭ جۇرتتارىن كيىندىرىپ، ەمدەپ، ءبىلىم الىپ بەرۋىمىز كەرەك. اش ادامداردى تاماقتاندىرىڭىزدار، بالالاردى ولىمنەن قۇتقارىڭىزدار، سوندا سىزدەرگە دە جاقسى بولادى»، - دەپ ءسوزىن اياقتادى ول.
ايتا كەتۋىمىز كەرەك، وسىدان كەيىن ب ۇ ۇ- نىڭ ادام قۇقىقتارى جونىندەگى جوعارعى كوميسسارى زەيد رااد ءال- حۋسەينمەن كەزدەسكەن لۋكاشەنكو بۇدان دا قاتتى سوزگە ەرىك بەردى. «ءبىز وزىمىزگە ادام قۇقىعى دەگەن جەلەۋدى العا تارتىپ، ونى ساياساتتاندىرىپ جىبەرۋگە جول بەرمەيمىز»، - دەدى ول.
اقپارات كوزى : http://egemen.kz