سىر ەلىندە «ۇلى دالا ەلى» ەكسپەديتسياسىنىڭ ساپارى جالعاسۋدا - ءتورتىنشى كۇن - فوتو
بۇل تۋرالى وبلىستىق اسسامبلەيا حاتشىلىعىنىڭ باسپا ءسوز قىزمەتى حابارلادى.
سىر بويى حالقى وقشى اتانى اۋليە سانايدى. وقشى اتا جونىندە ەل ىشىندە اڭىز اڭگىمەلەر وتە كوپ. شيەلى اۋداندىق مادەنيەت جانە تىلدەردى دامىتۋ ءبولىمىنىڭ قىزمەتكەرى ب. ءابۋوۆ وسى اڭىز اڭگىمەلەردىڭ ءبىرقاتارىن ەكسپەديتسياعا بايانداپ بەردى. بۇل قورىمدا وقشى اتامەن بىرگە اسان اتا، ەسابىز، عايىپ اتا، قىش اتا، دوسبول داتقا، بالا ءبي سياقتى ەل ارداقتىلارى ورنالاسقان.
كەلەسى نىسان شيەلى اۋدانىنداعى اق كۇرىشتىڭ اتاسى ىبىراي جاقايەۆ اتىنداعى كۇرىش ءوسىرۋ تاريحي مۋزەيى بولدى. مۋزەي ءۇش بولىمنەن تۇرادى: 1) «سىر وڭىرىندەگى كۇرىشتىڭ دامۋ تاريحى» . 2) «ىبىراي جانە ونىڭ جەتىستىكتەرى» . 3) «تاۋەلسىزدىك» ءبولىمى. ەكسپوزيتسياعا ارحەولوگيالىق، ەتنوگرافيالىق، ءمۇسىن، سۋرەتتەر، قۇجاتتار، كىتاپتار جانە قولونەر بۇيىمدارى قويىلعان. كۇرىش وسىرۋدەن دۇنيەجۇزىلىك رەكوردتىڭ يەسى بولعان ىبىراي اتانىڭ ءجۇرىپ وتكەن جولى - بۇگىنگى جاس ۇرپاققا ناعىز ەڭبەك ونەگەسى.
بۇدان سوڭ ەكسپەديتسيا مۇشەلەرى اۋدان ورتالىعىنداعى «نۇر وتان» پارتياسىنىڭ شيەلى اۋداندىق فيليالىنىڭ عيماراتىندا حالىقپەن كەزدەسۋ وتكىزىپ، شيەلى اۋدانى بويىنشا جۇمىسىن قورىتىندىلادى.
ەكسپەديتسيانىڭ قىزىلوردا وبلىسى بويىنشا اياقتالۋ نۇكتەسى - جاڭاقورعان ءوڭىرى.
قىپشاق يمپەرياسىنىڭ استاناسى بولعان ەجەلگى سىعاناق قالاسىنىڭ ورنىندا جەرگىلىكتى تۇرعىندار ەكسپەديتسيا مۇشەلەرىن ۇلكەن ىقىلاسپەن كۇتىپ الدى. بۇل كيەلى جەردە ارحەولوگيالىق قازبا جۇمىستارى بارىسىندا كوپتەگەن ەجەلگى ءداۋىر جادىگەرلەرى تابىلعان. سولاردىڭ بىرقاتارىمەن اۋىل اقساقالدارى جان-جاقتى تانىستىرىپ كەتتى.
جاڭاقورعان كەنتىنە كەلىپ، جەرگىلىكتى حالىقپەن، زيالى قاۋىم وكىلدەرىمەن، اقساقالدار، جاستارمەن كەزدەسۋ وتكىزىلدى. بۇل كەزدەسۋدىڭ ەرەكشەلىگى - جاڭاقورعان جەرىنىڭ تاريحي جەرلەرىن، نىساندارىن تانىستىرۋ ماقساتىندا كورسەتىلگەن سلايدتار بولدى. ەكسپەديتسيا تاراپىنان اۋدانداعى ءبىرقاتار ۇلى وتان سوعىسى ارداگەرلەرىنە تونومەترلەر بەرىلىپ، اۋداندىق كىتاپحاناعا كىتاپتار تابىستالدى.
ەكسپەديتسيا جۇمىسى قىركۇيەكتىڭ 30-ىندا حوراسان اتا مازارى مەن ەجەلگى ساۋران قالاشىعىندا اياقتالىپ، قورىتىندىلاندى.