قوستانايدا «اللا» دەگەن جازۋى بار قۇلىن ءوسىپ كەلەدى

استانا. قازاقپارات - تاران اۋدانىنىڭ نابەرەجنىي اۋىلىندا تۇراتىن جۇبانىشيەۆتاردىڭ شارۋاشىلىعىندا «اللا» دەگەن جازۋى بار قۇلىن ءوسىپ كەلەدى.

 وسىدان ءتورت اي بۇرىن بيەسى قۇلىنداعان كەزدە موينىنداعى اعارعان بەلگىگە وتاعاسى كەنجەتاي دا، بالالارى دا اسا ءمان بەرمەپتى. قۇلىن وسە كەلە الگى اق جولاق اراب جازۋىنا ۇقسايدى. ونى كەنجەكەڭ سۋرەتكە ءتۇسىرىپ الىپ، اۋىل مەشىتىنىڭ يمامىنا كورسەتەدى. يمام الگى جازۋدان «اللا» ءسوزىن وقيدى. كەنجەتاي جۇبانىشيەۆ وتباسىنىڭ بۇل اۋىلدا تۇرىپ جاتقانىنا ءبىراز جىل بولىپتى. العاشىندا اۋىلداعى جەكەنىڭ مالىن باعادى، ودان كەيىن وزدەرى جىلقى ءوسىرىپ، «قۇلىنشاق» اتتى جەكە شارۋاشىلىق قۇرادى. كەنجەكەڭ تاڭبالى قۇلىننىڭ اسىل تۇقىمدى جىلقىنىڭ تۇقىمى ەكەنىن ايتىپ وتىر.

-  وسى اۋىلدا الەكسەي دەگەن دوسىم بار ەدى. جارىقتىق ورىس بولسا دا جىلقىنى جاقسى كورەتىن كىسى ەدى. ىلعي اسىل تۇقىمدى جىلقىلاردى بالاداي ماپەلەپ ۇستايتىن. سول قاتتى اۋىرىپ جۇرەتىن. بىردە ماعان تەز كەلسىن دەپ حابار ايتىپتى. ناشارلاپ جاتىر ەكەن، ول وزىندەگى اسىل تۇقىمدى جىلقىنىڭ بارلىعىن ساتىپ الۋىمدى امانات ەتتى. اسىل زاتتىڭ قور بولماۋىن ويلادى ما ەكەن، كىم ءبىلسىن. سودان مەن دوسىمنىڭ اماناتىن ورىنداۋ ءۇشىن قولىمداعى بار مالىمدى ساتىپ، كەلگەنىنشە 7-8 باس جىلقىسىن ساتىپ الدىم. ءۇش باس جىلقىعا ءبىر اسىل تۇقىمدى جىلقىدان كەلدى. وعان دا ءتورت جىل بولدى. مىنا قۇلىن سول اسىل تۇقىمدى جىلقىلاردان تاراعان، -  دەيدى كەنجەتاي. قازىر جيرەن قۇلىن شاپقىلاپ ءجۇر. وسى قۇلىننىڭ الدىندا جۇبانىشيەۆتار وتباسىندا ۇلكەن قۋانىش بولادى -  كەنجەتايدىڭ ۇلى بەرىكتىڭ ءۇش قىزدان كەيىنگى كۇتتىرگەن ۇلى دۇنيەگە كەلىپتى. كەلىنىنىڭ اياعى اۋىر كەزدە كەنجەتاي ءتۇس كورەدى.

-  تۇسىمدە نەمەرەمدى قولىما الىپ جاتىر ەكەنمىن، موينىندا اق تاڭباسى بار ما دەيمىن. كەيىن ءتۇسىمنىڭ ءدال كەلگەنىنە تاڭعالامىن. كەلىنىم امان- ەسەن بوسانىپ، نەمەرەلى بولدىق، اتىن ىرىسحان قويدىق. اللانىڭ قۇدىرەتىن قاراڭىز، نەمەرە ۇلىمنىڭ موينىندا ءدال تۇسىمدەگىدەي اق تاڭباسى بار، -  دەيدى كەنجەكەڭ. ءسويتىپ، قوس قۇلىن بۇل كۇندە تەل ءوسىپ كەلەدى. مۇنى كەزدەيسوق سايكەستىك پە، الدە جاراتقان يەمىزدىڭ ءبىر قاسيەتتى بەلگىسى ما، ول جاعى جۇبانىشيەۆتار وتباسىنا دا بەيمالىم. ايتەۋىر ءوز ەڭبەكتەرىمەن كۇن كورگەن، ەشكىمگە جاماندىق جاساپ كورمەگەن، اينالاسىنا ءوز قادىر- قاسيەتى مول جاندار مۇنى جاقسىلىققا جوريدى. ال تاڭبالى قۇلىندى قىزىقتاۋشىلار دا، ونى ساۋدالاۋشىلار دا كوپ ەكەن. الدى قۇلىن ءۇشىن كەنجەكەڭە 15 ميلليون تەڭگە ۇسىنىپتى. ءبىراق، ەرەكشە قۇلىندى ساتۋ ولاردىڭ ويىندا جوق. ءۇش ۇل، ءبىر قىز وسىرگەن كەنجەتاي مەن ىرىسكۇل بالالارىنىڭ دا، قۇلىننىڭ دا اماندىعىن تىلەيدى.

نازيرا جارىمبەتوۆا، «ەگەمەن قازاقستان» .