قاشاعان جوباسىنىڭ ءوزىن اقتاۋى مۇنايدىڭ الەمدىك باعاسىنىڭ وزگەرىستەرىنە تىكەلەي بايلانىستى - ۇ. قارابالين

 استانا. قازاقپارات - «قاشاعان» جوباسىنىڭ ءوزىن اقتاۋى مۇنايدىڭ الەمدىك باعاسىنىڭ وزگەرىستەرىنە تىكەلەي بايلانىستى.

 بۇگىن استاناداعى «KAZENERGY-2015» ونىنشى ەۋرازيالىق فورۋمى اياسىنداعى مۇناي- گاز كونفەرەنتسياسى جۇمىسىنا وراي وتكەن باسپا ءسوز ءماسليحاتىندا ەنەرگەتيكا ءمينيسترىنىڭ ورىنباسارى ۇزاقباي قارابالين وسىلاي مالىمدەدى.

ەسكە سالايىق، فورۋم اياسىنداعى مۇناي- گاز كونفەرەنسياسى «ەۋرازيا وڭىرىندەگى ەنەرگيا قاۋىپسىزدىگى: جاڭا ىنتىماقتاستىق مەحانيزمى» تاقىرىبىندا وتكەن بولاتىن.

 مينيستر ورىنباسارى قاشاعان جوباسىنىڭ قۇنى قانشاعا باراتىنىن ءبىلۋ ءۇشىن ەڭ الدىمەن ونداعى مۇنايدى ءوندىرۋ كەرەك ەكەنىن ەسكە سالدى. «نەگىزىنەن باعالاۋلار ول ۋاقىتتاردا جاعداي قالاي بولاتىنىنا جانە ينۆەستيتسيانىڭ قايتارىمدىلىعىنا بايلانىستى بولاتىنى ءسوزسىز. «قاشاعان» سەكىلدى قىرىق جىلدىق كەلىسىمشارتتىق كەزەڭگە جاسالاتىن الەمدەگى ەڭ ءىرى جوبالاردى تولىق يگەرۋ ۇلكەن جەتىستىك بولۋى مۇمكىن. شىندىعىندا، بۇنداي جوبالاردى يگەرۋ شيكىزاتقا باعانىڭ تۇراقتى كەزەڭىندە ەشۋاقىتتا بولماعان»، - دەدى ۆيتسە- مينيستر.

 ونىڭ ايتۋىنشا، جوبانى يگەرۋگە كەتەتىن 40 جىل ىشىندە شيكىزات قۇنى بىرەسە جوعارىلاپ، بىرەسە قۇلدىرايدى. «سوندىقتان دا، «قاشاعاندى» دامىتۋ قاجەت پە دەگەنگە بىردەن «ول قازىر دە دامىپ جاتىر» دەپ ايتا الامىن. دەگەنمەن، باسقا ءبىر ماسەلە ينۆەستورلار وزدەرىنىڭ سالىمىن قالاي، قانشالىقتى تەز قايتارىپ الۋ مۇمكىن؟ بۇل رەتتە ايتارىم جوبانىڭ اقتالۋى بۇل شيكىزاتقا باعانىڭ قۇلدىراۋى مەن كوتەرىلۋى سەكىلدى قۇبىلۋلارعا تىكەلەي بايلانىستى» - دەدى ۆيتسە- مينيستر.

اۆتور: قانات مامەتقازى ۇلى