قازاقستاندا جاسالعان: الماتى وبلىسىندا قۇرعاتىلعان ازىق شىعاراتىن زاۋىتتىڭ ءونىم كولەمى ارتىپ كەلەدى

استانا. قازاقپارات - الماتى وبلىسى تالعار اۋدانىنداعى «كازكورم» كومپانياسى مەملەكەت قولداۋىنا يە بولدى.

بۇل سەرىكتەستىك ءيت، مىسىق، بالىقتارعا ارناپ تۇيىرشىكتەلگەن قۇرعاق ازىق شىعارادى.

ەلىمىزدەگى بىرەگەي ءوندىرىس ورىندارىنىڭ ءبىرى رەتىندە سانالاتىن زاۋىت شەتەلدىك تەحنولوگيا بويىنشا جۇمىس ىستەيدى.

ايتا كەتەيىك، ءونىمنىڭ توقسان بەس پايىزى وتاندىق شيكىزاتتان جاسالىنعان. ساپاسى بارلىق تالاپقا ساي كەلەدى. ءبىر سوزبەن ايتقاندا، شەتەلدىكىنەن ەشبىر كەم ەمەس. باعاسى دا قولجەتىمدى. ءوندىرىس وشاعى بۇگىندە مەملەكەت قولداۋىمەن جاڭا ساتىعا كوتەرىلە باستادى.

گوللانديا ەلىنىڭ ساراپشىسى «بيزنەستىڭ جول كارتاسى-2020» باعدارلاماسى نەگىزىندە ساپانى جاقسارتۋ بويىنشا ءوندىرىستى ءبىر جۇيەگە كەلتىرۋگە كومەك قولىن سوزعان.

سەرىكتەستىك باسشىسىنىڭ ورىنباسارى ارمان راكيشيەۆتىڭ ايتۋىنشا، ەلدە العاش رەت قۇرىلعان مۇنداي كاسىپورىن تاجىريبەلى مامانداردى قاجەت ەتەتىن كورىنەدى.

وسى ورايدا، «دامۋ» قورىنىڭ ىسكە اسىرۋىمەن «اعا سەنەرلار» جوباسى اياسىندا شەت ەلدەن ماماندار تارتۋعا مۇمكىندىك العان.

مامانداردىڭ پىكىرىنشە، وندىرىستە شىعارىلاتىن ونىمدەر جانۋارلار اعزاسىنا پايدالى ەكەن. ويتكەنى وندا تاعامدىق قۇندىلىق بارىنشا ساقتالىپ، قۇرامىنداعى دارۋمەندەر مەن مينەرالدار جوعالمايدى. ءونىم قازاقستان نارقىنا «اكۆاكورم» تاۋار بەلگىسىمەن شىعارىلا باستادى. قازىرگى كەزدە الماتى قالاسى مەن ەلدىڭ باسقا دا اۋماقتارىنا تارالۋدا. بيىل ءونىم كولەمىن مىڭ تونناعا دەيىن جەتكىزۋ كوزدەلىپ وتىر، دەپ جازادى «جەتىسۋ» گازەتى.