شىمكەنتتە ءۇي جانۋارلارىنا ارنالعان مازارات بار
ونداعى مالىمەتتە مولادا جەرلەنگەن جانۋارلار سانىنىڭ ازدىعى ازىرگە زيراتتىڭ پايدا بولا باستاعانىنا كوپ ۋاقىت وتپەگەنىن اڭعارتادى دەپ جازىلعان. ءبىر قىزىعى، زيراتتا كومىلگەن جانۋارلارعا يەلەرى ەسكەرتكىش تاقتالار ورناتقان. تاقتادا: «ميلا، سپاسيبو، چتو بىلا!»، «بيم، سپاسيبو زا ۆەرنوست...»، «بۋچ - سامىي لۋچشيي درۋگ. مى ۆسەگدا بۋدەم پومنيت تەبيا» دەگەن سىندى جازبالار قاشالىپ جازىلىپتى.
سونداي- اق، مولا ىشىنەن كامپيتتەر مەن تاتتىلەر دە تابىلعان. دەمەك، جانۋارىنان ايىرىلعان يەلەرى مۇردەلەردى كۇتىپ- باپتايتىن سەكىلدى.
قالالىق تۇرعىن ءۇي-كوممۋنالدىق شارۋاشىلىق ءبولىمى سەكتور مەڭگەرۋشىسىنىڭ ورىنباسارى ەرلان ەسىركەپوۆتىڭ ايتۋىنشا، مازارات زاڭسىز اشىلعان.
«بۇل جەردى مازاراتقا ارناپ زاڭداستىرۋ بۇگىنگى تاڭدا اكىمدىكتىڭ كۇن تارتىبىندەگى ماسەلە بولىپ وتىر. بۇل ماسەلە جاقىن كۇندەرى شەشىمىن تاۋىپ، وعان ارنالىپ جەر بولىنەدى دەپ سەنەمىز» دەگەن مەملەكەتتىك قىزمەتكەر سايت تاراتقان اقپاردا.
ءبىر قىزىعى، سەكتور مەڭگەرۋشىسىنىڭ ورىنباسارى جانۋارلار مولاسىنا قاتىستى ماسەلەدەن حاباردار بولعانىمەن، باسشىلىق حابارسىز بولىپ شىقتى. شىمكەنت قالاسى اكىمىنىڭ باسپا ءسوز حاتشىسى ءارى شاھار باسشىسىنىڭ كەڭەسشىسى نۇرلىبەك جەڭىسبەك ۇلى: «باسشىلىق بۇل اقپارات تۋرالى بۇگىن عانا ءبىلىپ وتىر. ءقازىر اتالعان ماسەلەنى زەردەلەيتىن بولامىز. قوسىمشا اقپارات بەرىلەدى»، - دەپ جاۋاپ بەردى.