پاۆلودار ءوڭىرىنىڭ قىمىزى شەت ەلدەرگە ەكسپورتتالا باستادى

استانا. قازاقپارات - پاۆلودار ءوڭىرىنىڭ قىمىزى شەت ەلدەرگە ەكسپورتتالا باستادى. بۇل تۋرالى بۇگىن وسى وبلىستىڭ اكىمى قانات بوزىمبايەۆ ءمالىم ەتتى.

«قىمىز ءوندىرۋ ونەركاسىپتىك نەگىزدە قولعا الىندى. بۇگىندە بۇل سۋسىن شىنى جانە پلاستيكالىق ىدىستارمەن بىرنەشە ەلگە ەكسپورتتالىپ جاتىر»، - دەدى وبلىس اكىمى.

بۇدان بۇرىن حابارلانعانداي، بۇگىن ەلوردادا استانا اكىمدىگى مەن پاۆلودار وبلىسىنىڭ اكىمدىگى اراسىندا ساۋدا-ەكونوميكالىق قاتىناستى جۇزەگە اسىرۋ جونىندەگى مەموراندۋمعا قول قويىلدى. بۇل قۇجاتتى استانا اكىمى ادىلبەك جاقسىبەكوۆ پەن پاۆلودار وبلىسىنىڭ اكىمى قانات بوزىمبايەۆ بەكىتتى.

«بۇل كەلىسىم ەڭ الدىمەن ىشكى نارىقتى دامىتۋ، سونداي-اق وتاندىق ازىق-تۇلىك ونىمدەرىن جەتكىزۋ بويىنشا ىنتىماقتاستىقتى كەڭەيتۋ تۇرعىسىندا ەلباسىنىڭ تاپسىرماسىن ورىنداۋعا باعىتتالعان»، - دەدى ەلوردا اكىمى ادىلبەك جاقسىبەكوۆ.

اۆتور: رۋسلان عابباسوۆ