تارازدا قاسيەتتى قۇربان ايت مەرەكەسى ۇلتتىق ءداستۇر نەگىزىندە ءوتتى
دەپ حابارلادى وبلىس اكىمىنىڭ باسپا ءسوز قىزمەتى.
كەشە قاسيەتتى مەرەكەدە وبلىس باسشىسى كارىم كوكىرەكبايەۆ بارشا مۇسىلمان قاۋىمىن قۇربان ايت مەيرامىمەن قۇتتىقتادى. ءوز سوزىندە بارلىعىمىزعا بەيبىتشىلىك، جاقسىلىق جانە وتباسىمىزعا اماندىق تىلەي كەلە، ءوزارا ءدىني جانە كونفەسسيونالدىق تاتۋلىقتىڭ ماڭىزىن اتاپ ءوتتى.
مۇسىلمان قاۋىمى مەرەكەلىك ايت نامازىنان سوڭ، مەشىت الاڭىنداعى ارنايى جەردە «قۇربان شالۋ» جوراسىن جاساۋعا شىقتى. العاشقى «قۇربان شالۋدى» وبلىس باسشىسى كارىم كوكىرەكبايەۆ باستادى.
بۇل جىلى قاسيەتتى مەرەكە ۇلتتىق ءداستۇر نەگىزىندە وتكىزىلدى. وسى كۇنى ورتالىق مەدرەسە جانىنا كيىز ءۇي تىگىلىپ، ساحنا مەن بالالارعا ارنالعان ويىن- ساۋىق الاڭقايلارى ورناتىلدى جانە ساحنالىق قويىلىمدار قويىلىپ، سپورتتىق جارىستار (كۇرەس، قول كۇرەس، ارقان تارتۋ، اسىق اتۋ، گىر كوتەرۋ) وتكىزىلدى. جەڭىمپازدارعا ارنايى سىيلىقتار دايىندالدى. سونىمەن قاتار قوناقتارعا تەگىن ءتاتتى تاراتىلدى.
تاراز قالاسىندا بىرنەشە قايىرىمدىلىق ءىس- شارالارى ءوتتى. سونداي- اق جامبىل وبلىستىق «ھيباتۋللا تارازي» مەشىتى مەرەكەلىك داستارقان جايدى جانە تۇرمىسى تومەن وتباسىلارعا كومەكتەستى.