قازاقستاندىق كولىكتەردىڭ بولشەكتەرى ەلىمىزدە شىعارىلماسا، كەلەشەكتە ونى وتكىزە الماۋىمىز مۇمكىن - م. پىشەمبايەۆ

 استانا. قازاقپارات - قازاقستاندا قۇراستىرىلاتىن كولىكتەردىڭ كەمىندە ەلۋ پايىز بولشەكتەرى ەلىمىزدە شىعارىلۋى ءتيىس. ايتپەسە كەلەشەكتە ولاردى وتكىزە الماۋىمىز مۇمكىن.

 بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگ بارىسىندا قازاقستان ماشينا جاساۋشىلار وداعى باسقارما ءتوراعاسى، ءماجىلىس دەپۋتاتى مەيرام پىشەمبايەۆ وسىلاي ءمالىم ەتتى.

 ەسكە سالا كەتەيىك، باسپا ءسوز ءماسليحاتى استانادا 1-2 - قازاندا ماشينا جاساۋشىلاردىڭ ءۇشىنشى حالىقارالىق فورۋمى تاقىرىبىنا ارنالعان بولاتىن.

«جالپىلاما الساق، وتكەن بەسجىلدىقتا (يندۋستريالاندىرۋ ساياساتىنىڭ بەسجىلدىعى- رەد.) ءبىز ماشينا جاساۋ سالاسىندا ەلىمىزدە بۇعان دەيىن شىعارىلماي كەلگەن ونىمدەردى ءوندىرۋدى قولعا العان بولاتىنبىز. بۇل ونىمدەر ىشكى نارىقتى عانا قاناعاتتاندىرىپ قويماي، ەكسپورتقا دا باعدارلاندى. ماسەلەن، استاناداعى تەپلوۆوزداردى الىڭىز. سوسىن ەلىمىزدە بۇعان دەيىن بولماعان ەلەكتروۆوزدار شىعارىلۋدا، تىكۇشاقتار قۇراستىرىلىپ جاتىر.

سونىمەن قاتار، وتكەن بەسجىلدىقتا ءبىزدىڭ ەلدە نەگىزىنەن بولشەكتەر ارقىلى كولىكتەر قۇراستىرۋ زاۋىتتارى بولسا، الداعى بەسجىلدىقتاعى ماقسات - شىعارىلىپ جاتقان اۆتوموبيلدەردىڭ، تراكتورلاردىڭ اۆتوقۇرامداس بولشەكتەرىن وزىمىزدە ەلۋ پايىزعا دەيىن جەتكىزۋگە ءتيىسپىز. ويتكەنى، ءبىز وزىمىزدە قۇراستىرىلاتىن اۆتوموبيلدەردىڭ كومپونەنتتەرىن ەلۋ پايىزعا جەتكىزە الماساق، ەاەو اياسىندا 2020 - جىلداردان كەيىن ءوزىمىزدىڭ ونىمدەرىمىزدى ساتا الماۋىمىز مۇمكىن»، - دەپ اتاپ ءوتتى مەيرام پىشەمبايەۆ.

 ونىڭ سوزىنە قاراعاندا، بۇگىنگى كۇنى اسىرەسە ە ا ە و اياسىندا ءونىمدى ءوتىمدى ەتكىزۋ ءۇشىن تراكتور، اۆتوكولىك قۇراستىرۋ سەكىلدى سالالارداعى بولشەكتەردىڭ باسىم بولىگىن قازاقستاندىق مازمۇنمەن تولىقتىرۋ باسىمدىق رەتىندە قاراستىرىلادى.

اۆتور: قانات مامەتقازى ۇلى