«باتىس» وڭىرلىك قولباسشىلىعىنىڭ باسپا ءسوز قىزمەتىنەن تۇسكەن مالىمەتكە قاراعاندا، بەس كۇن بويى اسكەري كينولوگتار ءوز قىزمەتتىك يتتەرىمەن ءتۇرلى ءادىس- تاسىلدەردى كورسەتتى، كەدەرگىلەردەن ءوتىپ، جول بويىنان جانە باسقا جەرلەردەن ينجەنەرلىك قارۋ- جاراق پەن جارىلعىش زاتتاردى ىزدەستىردى.
تەرگەۋ امالدارىن جۇرگىزىپ، ماڭداي تۇستان شابۋىلداۋدى ۇشتادى، قاشقان زاڭ بۇزۋشىنى ۇستاپ، كۇزەتتى. كينولوگتاردىڭ باسشىلىققا العان قۇجاتتارمەن جۇمىسى دا ساراپقا سالىندى.
جارىستىڭ باس تورەشىسى، ق ر ۇلتتىق ۇلانى كينولوگيالىق قىزمەتىنىڭ باستىعى ۆاسيلي گوريۋنوۆتىڭ ايتۋىنشا، قىلمىستى اشۋ مەن كۇدىكتىنى قۇرىقتاۋدا قىزمەتتىك ءيتتىڭ دايىندىعى مەن نۇسقاۋشىنىڭ كاسىبيلىگى ەلەۋلى ءرول اتقارادى.
كوماندالىق بىرىنشىلىكتە «باتىس» وڭىرلىك قولباسشىلىعىنىڭ كينولوگتارى جەڭىمپاز اتانسا، «شىعىس» وڭىرلىك قولباسشىلىعى - ەكىنشى، استاناداعى 5573-اسكەري ءبولىم ءۇشىنشى ورىندى يەلەندى. جەكەلەي سىندا اقتوبە قالاسىنداعى 6655-اسكەري بولىمنەن كەلگەن اعا سەرجانت المات ورىنعاليەۆ ۇزدىك شىقتى. مينا ىزدەۋ قىزمەتىنەن ورالداعى 5517-اسكەري بولىمنەن سەرجانت قانات ءسالىموۆ الدىنا جان سالماسا، ەسىرتكى ىزدەۋدەن اتىراۋ قالاسىنداعى 5546-اسكەري بولىمنەن ستارشينا ۆاسيليي لاۆرەنتيەۆ وزدى.
جەڭىمپاز- جۇلدەگەرلەرگە كۋبوك، مەدالدار، گراموتالار مەن باعالى سىيلىقتار تابىس ەتىلسە، ولاردىڭ يتتەرى ازىقپەن ىنتالاندىرىلدى.
«باتىس» وڭىرلىك قولباسشىلىعىنىڭ شتاب باستىعى، پولكوۆنيك اسحات وماروۆتىڭ سوزىنە قاراعاندا، وسىنداي جىل سايىنعى جارىستاردا ۇزدىك يتتەر انىقتالادى.
ەڭ باستىسى، ماماندار تاجىريبە الماسىپ، ءبىلىم- بىلىگى مەن شەبەرلىگىن جەتىلدىرە ءتۇستى.