جارمەڭكە بارىسىندا مەشىتتىڭ ايەل ۇستازدارى مەن ءدىني ساۋات اشۋ كۋرسىنىڭ نازىكجاندى شاكىرتتەرى وزدەرى ازىرلەگەن تاعام تۇرلەرىن ساۋداعا شىعارىپ، ساۋاپتى ىسكە ءوز ۇلەستەرىن قوسۋعا تىرىستى.
ىستىق تاعام ازىرلەپ، ءتۇرلى تاتتىلەر دايىنداپ تۇنىمەن تىنىم تاپپاعان قىز- كەلىنشەكتەردىڭ ەڭبەگى ەلەنىپ، ايت نامازىنان سوڭ مەشىت اۋلاسىنداعى قازاق ءۇيى الدى قاراقۇرىم حالىققا تولدى. ساۋدادان تۇسكەن قاراجاتتىڭ قايىرىمدىلىق شاراسىنا جۇمسالاتىنىن ەستىگەن جاماعات تا جومارتتىق تانىتىپ، ساۋدا كورىگىن قىزدىرا ءتۇستى.
«ازىرەت سۇلتان» مەشىتىنىڭ ءدىني ساۋات اشۋ كۋرسىندا وقيتىن قىز- كەلىنشەكتەر مەن مەشىت قىزمەتكەرلەرىنىڭ بۇل باستاماسىنا «ازىرەت سۇلتان مەشىتىنىڭ اجەلەرى» اتانعان ءبىر توپ اقجاۋلىقتى اپالارىمىز كەلىپ، العىستارىن ايتىپ، باتالارىن ارنادى.
اتالمىش جارمەڭكەدەن تۇسكەن قاراجاتتىڭ بارلىعىنا الدىمىزدا كەلە جاتقان حالىقارالىق مۇگەدەكتەر كۇنىنە وراي استانا قالاسىنداعى كەمتار جاندارعا كومەك كورسەتىلەتىن بولادى.