الپىستاعى اپاعا ايشىلىق جول باستىرعان ءبىر اۋىز ءسوز
سوندا: «ايەل زاتىنىڭ قىرىق، ەلۋ جاسقا كەلگەنىنە، ءتىپتى كەمپىر بولعانىنا دا قاراماي «قىز» اتالاتىن ءبىر جاعدايى بار. ونى دا ەسكەرە كەتەلىك. باسىندا «قىز» اتاۋى بار كۇنىندە (ون توعىز جاستان بۇرىن) تۇرمىسقا شىعىپ كەتكەن ايەلدى توركىنى ءومىر بويى «قىز» دەپ اتايدى ەكەن. ويتكەنى، ول وسى اۋلەتتەن «قىز» قالپىندا ۇزاتىلدى. وسى اۋلەتتە جۇرگەندە وعان باسقاشا ات تاڭىلعان جوق. ەندى، توركىنى وعان دەگەن قۇرمەتى رەتىندە ونى ءومىرباقي «قىز» دەپ وتپەك! نە دەگەن قۇرمەت بۇل! مۇنداي قۇرمەتكە يە بولۋ قانداي باقىت دەڭىز!» دەيتىن جولدار بار ەدى. وسىعان بايلانىستى مانات اتتى ءبىر وقىرمان ءوز ويىن ايتا كەلىپ، تومەندەگىدەي ءبىر بولعان جايدى جازىپ جىبەرىپتى. سونى سىزدەرمەن بولىسكەندى ءجون كوردىك.
قىز ۇزاققا ۇزاتىلاتىن كەز ەكەن. ۇزاق دەپ دەگەنىمىز الىس جولدارعا اتپەن قاتىنايتىن ۋاقىتتى ايتىپ وتىرعانىمىز. ول كەزدە ۇزاتىلعان قىز توركىنىنە اراعا جىلدار سالىپ، ساعىنىپ، زارىعىپ كەلەدى عوي. الىسقا ۇزاتىلعان ءبىر قىز جاسى الپىستى ارالاعان ۋاقىتىندا ايشىلىق جولدى باسىپ توركىنىنە كەلىپتى. (ۇزاتىلعاننان بەرى ءبىرىنشى كەلگەنى ەمەس ەندى) . اۋىلدىڭ بەركە- ۇيتقىسى بولعان ۇلى كارىلەردىڭ كوزى جوق، كوڭىلى قوڭىلتاقسيدى. ونى الدىن الا ءبىلىپ كەلگەن ادام عوي، ەشتەڭە دەمەي قوناق بولىپ جاتا بەرەدى. كۇن ارتىنان كۇن ءوتىپ، اپتا اپتاعا جالعاسادى. اپامىز ءالى جاتىر. ءجۇزى جۇدەۋ. پالەن كۇنى كەتەم دەگەن كەسىمدى ءسوزى دە جوق. اعا- باۋىرلارى «قاشان كەتەسىڭ» دەمەيدى عوي، دەسە دە «بۇ كىسىگە نە بولعان» - دى ارا- تۇرا ايتىسىپ قالادى. سونىمەن ءبىر كۇنى ءوزى دە اق شىلاۋىشتى اجەگە اينالعان اپامىزدىڭ ءبىر جەڭگەسى كەلىپ «قىز- اۋ، نە شارۋامەن كەلدىڭ، ايتا وتىر، قام قىلايىق» دەيدى. مىنە، قىزىق! كەلگەلى بەرى قاباعى كىربىڭ تارتقان اپامىزدىڭ ءجۇزى جايناپ سالا بەرىپتى. «راحمەت، التىن جەڭگەم، شارۋام وسى ەدى، ەندى جينالايىن» دەگەن ەكەن.
سوندا سونشالىق جەردەن اڭساپ، ەستىگىسى كەلگەنى «قىز- اۋ» دەگەن جالعىز اۋىز ءسوز ەكەن. جانى وسىنداي جالعىز اۋىز سوزدەن قۋات الاتىن كىسىلىكتىڭ ءزاۋ بيگىندەگى وسىنداي اجەلەر بولمىسىنا تاعى دا ءبىر تامساندىق. ءبىز ءسوز دەيمىز، انىعىندا ول ادام ساناسىنداعى ۇعىم بولىپ تۇر عوي.
ۇلاربەك نۇرعالىم ۇلى
namys.kz