اڭىزعا اينالعان وربۇلاق شايقاسى تۋرالى تاريحي قويىلىم وتپەك - الماتى وبلىسى - فوتو
اتالعان جيىنعا الماتى وبلىسىنىڭ جاستار ساياساتى ماسەلەلەرى باسقارماسىنىڭ باسشىسى ر. الپىسبايەۆ، «Kazakh Union Action Team» كاسكادەرلىك توبىنىڭ جەتەكشىسى ب. ابىشيەۆ، اكتەر م. بيسەمبين جانە وسى كاسكادەرلىك توپتىڭ مۇشەسى، اكتەر ا. وتەپبەرگەنوۆ قاتىستى.
كەزدەسۋ بارىسىندا باسقارما باسشىسى ر. ءالي ۇلى مەن كاسكادەرلىك توپتىڭ وكىلدەرى قازاق حاندىعىنىڭ 550 جىلدىعىنا ورايلاستىرىلعان وبلىسىمىزداعى ءىرى شارانىڭ ءبىرى وربۇلاق شايقاسىنا قاتىستى جينالعان جۇرتشىلىقتىڭ سۇراقتارىنا جاۋاپ بەرىپ، ءوتۋ بارىسىنا قىسقاشا توقتالدى.
2015 -جىلدىڭ 2 -قازانىندا ءوتىلۋى جوسپارلانعان شارانىڭ ۇيىمداستىرۋشىلارى ءوز قوناقتارىنا تاريحي قويىلىمنان وزگە ءارتۇرلى ويىن-ساۋىقتار مەن ءتۇرلى كورمەلەر ۇيىمداستىرىلاتىندىعى جونىندە اتاپ ءوتتى.
اتاپ ايتقاندا: ۇلتتىق سپورت تۇرلەرىنەن جارىستار، دالا كاۋابى مەن پالاۋىنىڭ فەستيۆالى، باۋىرساق-party، قازاقتىڭ ۇلتتىق اشەكەي بۇيىمدارىنىڭ كورمەسى، مودەلدەردىڭ ەتنوۇلگىدەگى كيىم- كەشەكتى كورسەتۋى، زاماناۋي اسكەر تۇرلەرىنىڭ قارۋ- جاراقتارى مەن كيىم ۇلگىلەرىنىڭ كورمەسى، وسىنىڭ بارلىعى كەرەمەت كونتسەرتتىك باعدارلامامەن ۇلاسىپ، جينالعاندارعا ەستەن كەتپەستەي اسەر قالدىرادى دەگەن سەنىمدە.
باسقارما باسشىسى ر. الپىسبايەۆتىڭ ايتۋىنشا اشىق اسپان استىندا وتكىزىلگەلى جاتقان بۇل شارانىڭ نەگىزگى ماقساتى ۇلتتىق قۇندىلىقتاردى جانداندىرۋ، تاريحتى ەسكە ءتۇسىرۋ، جاستارعا پاتريوتتىق تاربيە بەرۋ، بويىنداعى رۋحتى كوتەرۋ. شارانىڭ ەڭ قىزىقتى ءساتى شايقاس قويىلىمىنا 100 ارنايى ۇيرەتىلگەن جىلقى، 100 اتتى اسكەر، 500 جاياۋ اسكەر قاتىسۋى جوسپارلانۋدا.
وسى شاراعا رەسپۋبليكامىزدىڭ بارلىق وڭىرلەرىنەن قوناقتاردىڭ قاتىسۋى جوسپارلانۋدا.
ەستەرىڭىزگە سالا كەتسەك، وربۇلاق شايقاسى - قازاق حالقىنىڭ جوڭعار شاپقىنشىلىعىنا قارسى ۇزاققا سوزىلعان ازاتتىق سوعىسىنىڭ ءبىر ۇزىگى. بۇل سوعىس 1643 -جىلدىڭ جازىندا جاڭگىر سۇلتان باسقارعان 600 قازاق جاۋىنگەرى مەن 50 مىڭ جوڭعار قولىن باسقارعان ەردەني باتىر اراسىنداعى شايقاس.