سەناتورلار زاڭسىز ساۋدامەن كۇرەستە اجەلەرگە تيىسپەۋدى سۇرادى
بۇگىن سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ساۋدا قىزمەتىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن تالقىلاۋ كەزىندە كوميتەت ءتوراعاسى ءوز باۋ- باقشاسىنان كوكونىس اكەلىپ، كوشەدە ساتىپ وتىراتىن اجەلەر مەن قاريالاردى قورعاپ، ءسوز سويلەدى.
«مۇندا، استانادا، سۋپەرماركەتتەردىڭ ماڭىندا زاڭسىز ساۋدا ءجۇرىپ جاتىر. ءبىراق ولار ءوز ىسىنە ادال، تازا اجەلەر مەن قاريالار، ولار تاۋارىن ءوز باقشاسىنان اكەلەدى. ولار بازاردان زاڭدى تۇردە ورىن الا المايدى، سەبەبى قىمبات. بۇل اجەلەرگە ارنايى ورىن بەرۋ زاڭدا قاراستىرىلماي ما؟ سەبەبى ءبىز الەۋمەتتىك باسپانا تۋرالى ايتىپ وتىرمىز، ال مۇنى الەۋمەتتىك بازار دەسە دە بولادى، ولارعا ارنايى ورىن بولسەك، وتە ارزان باعاعا، ءتىپتى تەگىن ساۋدا جاسايدى. (...) مىسالى، مەن ءۇشىن بازاردان ەمەس، وسى اجەلەردەن زات ساتىپ الۋ كوڭىلگە قونىمدى. وندا تازالىقتىڭ، ۇقىپتىلىقتىڭ، ءتارتىپتىڭ بار ەكەنىن جانە ارزان ەكەنىن بىلەمىن»، - دەدى سەنات كوميتەتىنىڭ ءتوراعاسى تالعاتبەك ابايدىلدين.
بۇعان ۇلتتىق ەكونوميكا ءمينيسترىنىڭ ورىنباسارى تيمۋر جاقسىلىقوۆ باۋ- باقشا ءونىمىن ساتۋشىلاردىڭ «كاسىپكەرلىك قىزمەت تۋرالى» زاڭدا قارالعانىن جانە اجەلەرگە ارنايى بولىنگەن ورىنداردىڭ قاراستىرىلعانىن ايتىپ، جاۋاپ قاتتى.
«تۇراقتى ەمەس ساۋداگەرلەردىڭ ماسەلەسى ۇكىمەت قاۋلىسىنىڭ دەڭگەيىندە قاراستىلىرىپ، شەشىلىپ قويعان. بىرىنشىدەن، جارمەڭكەلەر وتكىزۋ مۇمكىندىگى بار. جارمەڭكە وتكىزۋدىڭ ورنى انىقتالىپ جاتىر، جەرگىلىكتى اتقارۋ ورگاندارىمەن كەلىسىلىپ جاتىر، وعان قاتىسۋعا تولەم الىنبايدى. وسى اجەلەرگە، باۋ- باقشا ءونىمىن ساۋدالايتىندارعا تۋرا وسىنداي ورىن بەرۋ ماسەلەسى جەرگىلىكتى اتقارۋ ورگاندارىمەن كەلىسىلىپ جاتىر، ولار ساۋدا ورىندارىمەن قامتاماسىز ەتىلۋى ءتيىس. وندا ينفراقۇرىلىس پەن تۇرمىس بويىنشا تالاپتار جەڭىلدەتىلۋى ءتيىس جانە بۇل زاڭ ارقىلى رەتتەلگەن»، - دەدى جاقسىلىقوۆ.