الماتىداعى ءىرى كولىك اپاتى: عالامتوردا جۇرگىزۋشى بوس ترامۆايدى «قۋىپ» بارا جاتقان ۆيدەوروليك جاريالاندى - كەسكىن
بۇعان دەيىن حابارلاعانىمىزداي، الماتىدا جانتۇرشىگەرلىك جول اپاتى بولدى. ترامۆاي بايتۇرسىنوۆ كوشەسىمەن قۇلديلاعان كۇيى جولىنداعى 14 ماشينانى ءسۇرىپ كەتتى.
وقيعانى ءوز كوزىمەن كورگەن «زا رۋلەم» جۋرنالىنىڭ باس رەداكتورى الەكسەي الەكسەيەۆتىڭ ايتۋىنشا، كولىك تىزگىنىندە ستاجەر وتىرعان. بۇل تۋرالى كولىكتىڭ ماڭدايشاسىندا جازىلعان.
«وقيعا ورنىنداعى كۋاگەرلەر كورگەندەي، ترامۆاي جۇرگىزۋشىسى تەمەكى شەگۋگە، بولماسا رەلستى ورنىقتىرۋعا شىعىپ كەتكەن. سول كەزدە تاجىريبەنىڭ ازدىعىنان تەجەگىشكە قويۋدى ۇمىتىپ كەتكەن. ترامۆاي وزدىگىنەن بايتۇرسىنوۆ كوشەسىنە بۇرىلىپ، تومەن قاراي قۇلديلاي جونەلگەن. ونى جۇرگىزۋشى قۋىپ جەتە المادى. نيكولسكي بازارىنىڭ تۇسىنا كەلگەندە اۋىر ماشينا جوعارى جىلدامدىقپەن جولىنداعى كولىكتەردى جايپاپ ءوتتى. ولاردىڭ كەيبىرى كونسەرۆ بانكىسىنە ۇقساپ قالدى. كەيبىرى اۋدارىلىپ ءتۇستى»، - دەدى كۋاگەر الەكسەي الەكسەيەۆ ءوزىنىڭ فەيسبۋكتاعى پاراقشاسىندا.
ايتا كەتۋ كەرەك، جول كولىك وقيعاسى قازىر ق ر ق ك 345-بابىنىڭ 1-تارماعى بويىنشا ءبىرىڭعاي سوتقا دەيىنگى تەرگەۋ ءىسى رەەسترىنە تىركەلدى. تەرگەۋ امالدارى جالعاسۋدا.
وقىس وقيعا سالدارىنان 4 ادام جاپا شەكتى.
جول اپاتىنىڭ ءمان- جايى ارنايى ساراپتامالاردىڭ قورىتىندىسىنان كەيىن بەلگىلى بولادى.
اۆتور: گۇلميرا عوسمانالي