بەيجىڭدە «قازاقپاراتتىڭ» باس ديرەكتورى «ءبىر بەلدەۋ، ءبىر جول» بويىنداعى ب ا ق ىنتىماقتاستىعى فورۋمىنىڭ اشىلۋىندا ءسوز سويلەدى - فوتو

 بەيجىڭ. قازاقپارات - «قازاقپارات» حالىقارالىق اقپارات اگەنتتىگىنىڭ باس ديرەكتورى داۋرەن دياروۆ قۇرمەتتى قوناق رەتىندە «ءبىر بەلدەۋ، ءبىر جول» بويىنداعى ب ا ق ىنتىماقتاستىعى فورۋمىنىڭ اشىلۋىندا ءسوز سويلەدى.

ول شارا قاتىسۋشىلارىنا (59 ەلدەن 155 مەدياقۇرىلىم، سونداي- اق ب ۇ ۇ تىلشىلەر قاۋىمداستىعى) وسى جىلعى 30 - تامىز - قىركۇيەك اراسىندا وتكەن ق ر پرەزيدەنتى نۇرسۇلتان نازاربايەۆتىڭ ق ح ر- عا مەملەكەتتىك ساپارىنىڭ باستى قورىتىندىلارىنىڭ ءبىرى قازاقستاننىڭ «نۇرلى جول» جاڭا ەكونوميكالىق ساياساتىن قىتايلىق «ءبىر بەلدەۋ، ءبىر جول» باستاماسىمەن ءىس جۇزىندە ۇشتاستىرۋ كەزەڭىنە كوشۋ بولعانىن حابارلادى.

«پرەزيدەنت نۇرسۇلتان نازاربايەۆ ءوزىنىڭ ق ك پ و ك جانىنداعى پارتيا مەكتەبىنىڭ پروفەسسور- وقىتۋشىلارى مەن تىڭداۋشىلارى الدىندا سويلەگەن سوزىندە ايتقانداي، «ءبىر بەلدەۋ، ءبىر جول» باستاماسى ەلدەر اراسىنداعى ىنتىماقتاستىقتىڭ جالپى پەرسپەكتيۆالارىنا ساپالى جاڭا تۇرعىدان كەلۋ بولىپ تابىلادى»، - دەپ اتاپ ءوتتى د. دياروۆ.

 قازاقپارات باسشىسى ەۋروپالىق وداق پەن ازيا- تىنىق مۇحيت ايماعى ەلدەرىنىڭ اراسىندا جىل سايىن 6 ميلليونعا جۋىق كونتەينەر جەتكىزىلىپ تۇراتىنىن ەسكە سالدى. قازىردە وسى اعىننىڭ نەگىزگى بولىگى - 98 پايىزعا جۋىعى - شەتەل پورتتارىنا تەڭىز فلوتى ارقىلى تاسىمالدانادى. سونىمەن بىرگە، قازاقستان ارقىلى ترانزيتتىك قۇرعاقتاعى جولباعىت تەڭىز جولىنان اناعۇرلىم قىسقا. ەندى تاۋارلاردى ەكى اپتانىڭ ىشىندە تاسىمالداۋعا بولادى. بۇل ستراتەگيالىق ارتىقشىلىق استانا مەن بەيجىڭ اراسىندا ترانسۇلتتىق ترانزيتتىك- كولىكتىك اليانس قۇرۋ ءۇشىن باستى شارت بولماق.

«ءبىر بەلدەۋ، ءبىر جول» باعدارلاماسى ارقىلى قۇرعاقتا جاڭا «ەۋرازيالىق كوپىر» قۇرىلادى جانە «قىتاي- موڭعوليا- رەسەي»، «قىتاي- ورتالىق ازيا- باتىس ازيا» جانە «قىتاي- ءۇندى قىتاي» ەكونوميكالىق دالىزدەرى داميتىن بولادى.

 «الەمدىك قوعامداستىق تاپ بولىپ وتىرعان قازىرگى الەمدىك جانە ايماقتىق وزگەرىستەر، قاۋىپتەر مەن قاتەرلەر جاعدايىندا، ەڭ الدىمەن، ەركىن ساۋدا مەن اشىق ەكونوميكالىق جۇيەنىڭ جاھاندىق جۇيەسىن ساقتاۋ ماقساتى كوزدەلىپ وتىرعانى قۋانىشتى، سونداي- اق ول باستاماعا قاتىسۋشى ەلدەرمەن ءوزارا ءتيىمدى ىنتىماقتاستىقتى نىعايتۋعا جاردەمدەسۋى ءتيىس»، - دەدى د. دياروۆ.

قازاقپارات باس ديرەكتورى قازاقستاندىق- قىتايلىق قاتىناستاردى دامىتۋ جايى تۋرالى اڭگىمەلەدى. «2014 -جىلعى جەلتوقساننان بەرى ءبىزدىڭ ەلدەرىمىز اراسىندا يندۋستريالاندىرۋ جانە ينۆەستيتسيالار سالاسىنداعى ىنتىماقتاستىق كوكجيەگىن كەڭەيتە ءتۇسۋ جۇمىسى جۇرگىزىلۋدە. اتاپ ايتقاندا، 30 ميلليارد دوللاردان استام سوماعا 48 ينۆەستيتسيالىق جوبالار ىرىكتەلدى جانە قازاقستان مەن قىتاي اراسىندا يندۋستريالاندىرۋ جانە ينۆەستيتسيالار سالاسىنداعى ىنتىماقتاستىق تۋرالى مەموراندۋمعا قول قويىلدى. وسى وتكەن ساپار بارىسىندا 23 ميلليارد دوللارعا جۋىق سوماعا 25 قۇجاتقا قول قويىلدى»، - دەدى د. دياروۆ.

د. دياروۆ قازاقستاندىق «نۇرلى جول» باعدارلاماسىنىڭ باسىمدىقتارى - كولىكتىك- لوگيستيكالىق جانە يندۋستريالىق- ەنەرگەتيكالىق ينفراقۇرىلىمداردى دامىتۋ ەكەنىن باسا ايتتى. «ءبىزدىڭ باستى مىندەتىمىز قازاقستاندى ازيانىڭ ءىرى ىسكەرلىك، كولىكتىك- لوگيستيكالىق جانە قارجىلىق حابىنا اينالدىرۋ. ەۋرازيالىق ترانسۇلتتىق ءدالىز مۋلتيمودالدىق كولىك ماگيسترالىن قۇرۋ جوسپارلانۋدا. «استانا» حالىقارالىق قارجى ورتالىعىن قۇرۋ ۇدەرىسى ىسكە قوسىلدى. ءبىز ەكسپورتتىق تاۋارلارى ءوندىرىسى ءۇشىن وڭدەۋشى سەكتورعا كەمىندە 10 ترانس ۇلتتىق كورپوراتسيانى تارتۋدى كوزدەپ وتىرمىز»، - دەپ اتاپ كورسەتتى ول.

ونىڭ ايتۋىنشا، اڭگىمە ءۇش باعىت جونىندە بولىپ وتىر. ءبىرىنشى كەزەڭدە بۇل نەگىزىنەن ەكى باعىت: ترانزيتتىك- كولىكتىك ءدالىزدى دامىتۋ جانە جاڭا قازاقستاندىق- قىتايلىق يندۋستريالىق باعدارلاما.

كولىك ءدالىزى بويىنشا ءبىرقاتار جوبالار: اۆتوموبيل جولدارىن جانە كولىكتىك- لوگيستيكالىق ورتالىقتار سالۋ جۇمىستارى جۇزەگە اسىرىلۋدا. بۇل قازاقستان ءۇشىن ۇلكەن سالا جانە مۇندا قىتايمەن ىنتىماقتاستىقتىڭ وتە زور ماڭىزى بار.

 ەكىنشى باعىت - بىرلەسكەن يندۋستريالىق جوبالار. بۇل ەكىنشى يندۋستريالاندىرۋ بەس جىلدىعى مىندەتتەرى مەن باسىمدىقتارىنا ساي كەلەدى. قازاقستاندىق ەكىنشى بەس جىلدىقتىڭ باسىمدىقتارى مەتاللۋرگيا، حيميا، تىڭايتقىشتار ءوندىرىسى، ماشينا جاساۋ، كولىك، لوگيستيكا جانە باسقا دا سالالار. قازاقستاننىڭ بارلىق ايماقتارىندا دەرلىك جاڭا وندىرىستەر اشىلادى.

ءۇشىنشى پەرسپەكتيۆالى باعىت رەتىندە عىلىمدى قاجەتسىنەتىن سالالار مەن جوعارى تەحنولوگيالار سەكتورى سالاسىنداعى ىنتىماقتاستىقتى ايتۋعا بولادى.

«ءبىز عىلىمي ينستيتۋتتار مەن جوعارى وقۋ ورىندارى دەڭگەيىندە، سونداي- اق بىرلەسكەن جاڭا وندىرىستەر قۇرۋ سالاسىندا كووپەراتسيا جۇرگىزەتىن ءبىر- ەكى باعىتتى تاڭداۋدى تالقىلاۋدى باستايمىز»، - دەپ اتاپ ءوتتى د. دياروۆ.

 وسى جىلداردا قازاقستان مەن قىتاي جىلدار بويى ءتۇيىنى تارقاتىلماي كەلگەن كوپتەگەن ماسەلەلەردى شەشتى. بۇل ۇزىندىعى 1700 شاقىرىمدىق شەكارا ماسەلەسى، ونى قارسى تۇرۋ ەمەس، دوستىق پەن ىنتىماقتاستىق شەكاراسىنا اينالدىرۋ. «قازاقپارات» ح ا ا باس ديرەكتورىنىڭ ايتۋىنشا، الەمدىك دەڭگەيدەگى، ەكونوميكالىق ىنتىماقتاستىق، ءوزارا تۇسىنىستىك جانە دوستىق - بۇلاردىڭ ءبارى ءبىزدىڭ ەلدەرىمىز اراسىندا سەنىمدى نىعايتىپ، ەلدەرىمىزدى جاقىنداتا ءتۇستى. قىتاي حالىق رەسپۋبليكاسىمەن تاتۋ كورشىلىك جانە دوستىق قاتىناستاردى نىعايتۋ قازاقستاننىڭ سىرتقى ساياساتىنىڭ باسىم باعىتى بولىپ تابىلادى.

 «جوعارى دەڭگەيدە اتالىپ وتكەندەي، قازاقستان مەن قىتاي ازيا مەن الەمگە جاڭا مۇمكىندىكتەر مەن ىنتىماقتاستىققا كەڭىستىك، سونىڭ ىشىندە ەڭ الدىمەن، جىبەك جولى ەكونوميكالىق بەلدەۋى جانە تەڭىز جىبەك جولى اۋقىمىندا ىنتىماقتاستىق ءۇشىن كەڭىستىك بەرۋ ءۇشىن بىرلەسكەن كۇش- جىگەرىن جۇمسايتىن بولادى.

 «قازاقستاندىق جەتەكشى ب ا ق- تىڭ ءبىرىنىڭ باسشىسى رەتىندە مەن ءۇشىن، ارينە، ماسس- مەديا سالاسىنداعى ىنتىماقتاستىقتى تەرەڭدەتۋ قىزىعۋشىلىق تۋعىزادى. «قازاقپارات» ح ا ءا- عا 13- تامىزدا 95 جىل تولدى. بىزگە شەتەلدىك ارىپتەستەردىڭ كوپشىلىگىنەن، ەڭ الدىمەن، قىتايلىق ب ا ق- تاردان: «شينحۋا» جانە «شينحۋانەت» ، «قىتاي حالىقارالىق راديوسىنان» ، «جەنمينۆاننان»  (رىن ميىن ۋاڭ) جانە «تيانشان نەت»، «جەنمين حۋاباو» جۋرنالى باسپاسىنان قۇتتىقتاۋلار كەلىپ ءتۇستى.

 بارلىعىڭىزعا ۇلكەن راحمەت! وسى شارا ءبىزدىڭ ارامىزداعى ىنتىماقتاستىقتى ودان ءارى نىعايتۋعا جانە «ءبىر بەلدەۋ، ءبىر جول» تۇجىرىمداماسىن جۇزەگە اسىرۋعا جاردەمدەسەدى دەپ سەنەمىن»، - دەپ ءسوزىن تۇيىندەدى «قازاقپارات» ح ا ءا باس ديرەكتورى.

«ءبىر بەلدەۋ، ءبىر جول» بويىنداعى ب ا ق ىنتىماقتاستىعى فورۋمىن قىتاي كومپارتياسىنىڭ مەدياقۇرىلىمى - «جەنمين جيباو» (رىن ميىن رى باۋ) ۇيىمداستىردى. شاراعا قاتىسۋشىلار الدىندا قىتاي حالىقتىق ساياسي كونسۋلتاتيۆتىك كەڭەسى بۇكىل قىتايلىق كوميتەتى ءتوراعاسىنىڭ ورىنباسارى، ق ك پ وك حالىقارالىق ءبولىمىنىڭ مەڭگەرۋشىسى ۆان تسزياجۋي قۇتتىقتاۋ ءسوز سويلەدى.

 فورۋمعا سونداي- اق ق ح ر كوممەرتسيا ۆيتسە- ءمينيسترى، حىنان (گو گەنماو)، شانشي (چجان چجەنيۋن)، گانسۋ (ۆان سانيۋن) پروۆينتسيالارىنىڭ. لانجوۋ قالاسى (يۋي حايان)، شاندۋڭ پروۆينتسياسىنىڭ شيڭداۋ قالاسى (لي تسيۋن) ، لوياڭ قالاسى (چەن سيۋەفەن) پارتيا كوميتەتتەرىنىڭ حاتشىلارى، جياڭسۋ، گۋاڭدۇڭ جانە قىتايدىڭ باسقا دا پروۆينتسيالارى مەن ايماقتارىنىڭ اتقارۋشى ورگاندارى، قىتاي بانكتەرى، كورپوراتسيالارى جانە ب ا ق وكىلدەرى قاتىسۋدا.