قىرعىزستاننان قازاقستان ارقىلى ءۇشىنشى ەلدەرگە وتەتىن اۆتوكولىكتەر ترانزيتىنە رۇقسات تالاپ ەتىلەتىن بولادى

استانا. قازاقپارات - بۇگىن پارلامەنت سەناتى ەكونوميكالىق ساياسات، وڭىرلىك دامۋ جانە كاسىپكەرلىك كوميتەتىنىڭ كەڭەيتىلگەن وتىرىسى بولىپ ءوتتى.

وندا دەپۋتاتتار «2003-جىلعى 25- جەلتوقسانداعى قازاقستان رەسپۋبليكاسىنىڭ ۇكىمەتى مەن قىرعىز رەسپۋبليكاسىنىڭ ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن تالقىلادى.

حاتتاماعا 2014-جىلدىڭ 7- قاراشاسىندا استانا قالاسىندا قول قويىلعان.

قۇجاتقا سايكەس، قازاقستان مەن قىرعىزستان اراسىندا جۇكتەردى اۆتوكولىك قۇرالدارىمەن تاسىمالداۋ بارىسىندا، سونداي-اق ۋاقىتشا تىركەۋ نومىرلەرى بار، ايىرىم بەلگىلەرىنسىز بوس اۆتوكولىك قۇرالدارىن مەجەلى جەرگە ايداپ بارۋ كەزىندە رۇقسات بولماسا دا جۇزەگە اسىرىلادى.

ال جۇكتەردى ەكىنشى تاراپ مەملەكەتىنىڭ اۋماعىنان ءۇشىنشى ەلدەرگە تاسىمالداۋ جۇزەگە اسىرىلسا، ءتيىستى مەملەكەتتىك قۇزىرەتتى ورگاننان الىنعان رۇقسات قاجەت بولادى.

ايتا كەتەرلىگى، قازىرگى كۇنى قولدانىستاعى ۇكىمەتارالىق كەلىسىمگە سايكەس، قازاقستان مەن قىرعىزستاننىڭ ەكىجاقتى ترانزيتتىك تاسىمالدارى، سونداي-اق ءۇشىنشى ەلدەرگە تاسىمالدار رۇقساتسىز نەگىزدە رەتتەلىپ كەلەدى. الايدا، جۇك تاسىمالدارىنىڭ رۇقساتسىز جۇيەسى قازاقستاندىق تاسىمالداۋشىلارعا تەرىس اسەرىن تيگىزىپ وتىر. سوندىقتان دا جوعارىداعى كەلىسىمگە وزگەرىستەر جاسالىپ وتىر. بۇل رەتتە ءۇشىنشى ەلدەرگە تاسىمالعا رۇقسات جۇيەسى ەنگىزىلەدى. قۇجاتتى دايىنداۋشىلاردىڭ ايتۋىنشا، بۇل شارا قازاقستاندىق تاسىمالداۋشىلاردى قولداۋعا كومەكتەسەدى.

زاڭ جوباسى الداعى ۋاقىتتا وتەتىن پالاتانىڭ جالپى وتىرىسىنا شىعارىلادى.

اۆتور: قانات مامەتقازى ۇلى