بۇگىن قازاقستاننىڭ سولتۇستىگىندە قار جاۋادى

استانا. قازاقپارات - قازاقستاننىڭ باسىم اۋماعىندا كۇن رايى قۇبىلمالى، كەي جەرلەردە جاۋىن جاۋادى، وڭتۇستىك-شىعىستا نوسەر جاۋىن جاۋىپ، جەل كۇشەيەدى، تەك ەلىمىزدىڭ باتىسى مەن وڭتۇستىگىندە كۇن اشىق.

تۇندە جانە تاڭەرتەڭ تۇمان تۇسەدى، دەپ حابارلايدى BNews.kz.

اقمولا، قوستاناي، قاراعاندى وبلىستارىندا كەي جەرلەردە 15-20 م/س جىلدامدىقپەن جەل سوعادى، تۇندە جانە تاڭەرتەڭ جەكەلەگەن اۋدانداردا تۇمان تۇسەدى. الماتى، سولتۇستىك قازاقستان، كۇندىز پاۆلودار وڭىرلەرىندە كەي بولىكتەردە جەلدىڭ جىلدامدىعى 15-22 م/س- قا دەيىن كۇشەيەدى. شىعىس قازاقستان، جامبىل وبلىستارىندا كەي جەرلەردە نايزاعاي جارقىلدايدى، 15-20 م/س جەل سوعادى.  قىزىلوردا، وڭتۇستىك قازاقستان، باتىس قازاقستان، قاراعاندى، قوستاناي وبلىستارىندا توتەنشە جوعارى ءورت قاۋپى ساقتالادى.

سونداي-اق «قازگيدرومەت» ر م ك ەلىمىزدىڭ بىرنەشە وبلىسىندا دابىلدى ەسكەرتۋ جاريالادى:

21- قىركۇيەكتە اقمولا، سولتۇستىك قازاقستان وبلىستارىندا جاۋىن جاۋىپ، ونىڭ ارتى قارعا ۇلاسادى، 22-23- قىركۇيەك كۇندەرى اۋا تەمپەراتۋراسى تۇندە 0-5 گرادۋسقا دەيىن تومەندەيدى.

22-23- قىركۇيەكتە پاۆلودار، شىعىس قازاقستان وبلىستارىندا جاڭبىردىڭ ارتى قارعا ۇلاسىپ، سىناپ باعاناسى تۇندە 0-5 گرادۋس ايازدى كورسەتەدى.

سونىمەن قاتار ءدال وسى كۇندەرى قوستاناي، قاراعاندى وڭىرلەرىندە كەي بولىكتەردە تەمپەراتۋرا 0-5 گرادۋسقا دەيىن تۇسەدى.