قازاقستاندا گوليۆۋد، نيۋ- يورك كينو اكادەمياسى سىندى الەمدىك ورتالىقتارمەن بىرلەسىپ، كينو مەكتەبىن اشۋىمىز قاجەت - ا. مۇحامەدي ۇلى
بۇل تۋرالى بۇگىن «ك ت ك» تەلەارناسىنىڭ «حالىق قىزمەتشىسى» باعدارلاماسىنا سۇحبات بەرگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى ءمالىم ەتتى.
«قازىرگى ۋاقىتتا بىزدە كينو سالاسىندا ناقتى قادامدار جاساۋىمىزدى تالاپ ەتەتىن جوسپارلار بار. ءبىز كەشەندى جۇمىستار جۇرگىزۋگە ءتيىسپىز. گوليۆۋد، نيۋ- يورك كينو اكادەمياسى سىندى الەمدىك ورتالىقتارمەن بىرلەسىپ، كينو مەكتەبىن اشۋىمىز قاجەت»، - دەپ اتاپ ءوتتى مينيستر.
سونىمەن قاتار ول جىل سايىن بىرەن- ساران قازاقستاندىق شەتەلدىك جەتەكشى كينو ورتالىقتارىندا بىلىمدەرىن جەتىلدىرىپ، بىلىكتەرىن ارتتىرىپ قايتاتىندىعىن ەسكە سالىپ ءوتتى.
«ەكىنشىدەن، ارينە، بىزدە كينو تۋرالى جەكە زاڭ بولۋى ءتيىس. وندا الدىن الا تولەم قالاي جۇرگىزىلەدى، اۆتورلىق قۇقىق قالاي قورعالادى دەگەن سىندى ماسەلەلەر ناقتى جازىلۋى كەرەك. ەڭ باستىسى، قارجىعا كىم جاۋاپتى بولاتىندىعى ايقىن كورسەتىلۋى قاجەت. بىزدەر باسقا دەڭگەيگە كوتەرىلۋگە ءتيىسپىز»، - دەدى ا. مۇحامەدي ۇلى.
مينيستر سۇحبات بارىسىندا كينو تۇسىرىلىمىنە مەملەكەت تارابىنان بولىنگەن قارجىعا باقىلاۋدىڭ تومەن بولىپ وتىرعاندىعىنا توقتالا كەلە، ەندىگى ۋاقىتتا قاداعالاۋدىڭ كۇشەيتىلەتىندىگىن باسا اتاپ ءوتتى.
اۆتور: مارلان جيەمباي