الماتىعا «قىتاي-قازاقستان» دوستىق جانە ىنتىماقتاستىق كەرۋەنى كەلىپ جەتتى
جۇك ارتىلعان 136 تۇيەنى جانە اربا جەگىلگەن ونشاقتى اتتى باسقارىپ كەلە جاتقان 100 گە تارتا كەرۋەنشى جانە كەرۋەنباسى مادەنيەت جانە دەمالىس ورتالىق ساياباعىنىڭ الدىنا كەلىپ توقتادى.
ولاردى الماتى قالاسى اكىمىنىڭ ورىنباسارى زاۋرەش امانجولوۆا مەن باسقا دا مەملەكەتتىك قۇرىلىمداردىڭ باسشىلارى، قازاقستان حالقى اسسامبلەياسىنىڭ وكىلدەرى، قالاداعى جوعارى ورىندارىنىڭ ستۋدەنت جاستارى جانە قالا حالقى زور قۋانىشپەن قارسى الدى.
«قازاقتا «قۇتتى قوناق كەلسە، قوي ەگىز تابادى» دەگەن ءسوز بار ەمەس پە!؟ مىنە بۇگىن قالا كۇنى مەرەكەسى اتاپ ءوتىپ جاتقان الماتى قالاسىنا «قىتاي-قازاقستان» دوستىق جانە ىنتىماقتاستىق كەرۋەنى كەلىپ جەتتى.
ول بۇدان ءبىر جىل بۇرىن قىتايدىڭ شانچي پروۆينتسياسىنىڭ ورتالىعى - چيان قالاسىنان جولعا شىققان بولاتىن. كەشە، 19- قىركۇيەكتە كەرۋەننىڭ جولعا شىققانىنا ءدال ءبىر جىل تولدى. كەرۋەندە 100 گە تارتا ادام، 136 تۇيە جانە اربا جەگىلگەن ونشاقتى ات بار. كەرۋەن ءبىر جىل بويى توقتاۋسىز ءجۇرىپ وتىرىپ، بۇگىن مىنە الماتا قالاسىنا كەلىپ جەتتى. بۇل ۇلكەن شارانىڭ باستى ماقساتى - ۇلى جىبەك جولىن قايتا جاڭعىرتۋ، ونى جاڭا ءمان-ماعىنامەن، جاڭا جوبالارمەن تولىقتىرۋ. قازاقستان مەن قىتاي حالىقتارى اراسىنداعى مادەني، عىلىمي، ساۋدا جانە ەكونوميكالىق بايلانىستاردى ودان ءارى نىعايتۋ. بۇل كەرۋەن - ەكى حالىقتىڭ ءوزارا ىنتىماقتاستىعىنىڭ جارقىن كورىنىسى ىسپەتتەس. ويتكەنى، كەرۋەننىڭ جولىندا جەرگىلىكتى تۇرعىندار ءبىزدى زور قۋانىشپەن قۇشاق جايا قارسى الىپ جاتتى. مەنىڭشە، ءبىز ءوز ماقساتىمىزعا جەتتىك قوي دەپ ويلايمىن»، - دەدى ءوز سوزىندە وسى كەرۋەندى باستى ۇيىمداستىرۋشى ۇيىمداردىڭ ءبىرى - قازاقستان دۇنگەندەرى قاۋىمداستىعىنىڭ پرەزيدەنتى حۋسەي داۋروۆ.
ونىڭ ايتۋىنشا، كەرۋەن بۇگىن الماتى قالاسىنىڭ دوستىق جانە اباي داڭعىلدارىمەن ءجۇرىپ وتكەن سوڭ، كەشكە قاراي ق ر پرەزيدەنتى نۇرسۇلتان نازاربايەۆتىڭ تۋعان جەرى - الماتى وبلىسىنىڭ قاراساي اۋدانىندا ورنالاسقان ءۇشقوڭىر ەلدى مەكەنىنە بارادى.
«بۇل كەرۋەن قىتاي حالىق رەسپۋبليكاسىنىڭ ءتوراعاسى، قىتاي كوممۋنيستىك پارتياسى ورتالىق كوميتەتىنىڭ باس حاتشىسى شي جيپيننىڭ تۋىپ وسكەن قالاسى - چيان قالاسىنان شىقتى عوي. ەندى ءبىز ق ر پرەزيدەنتى، ۇلت كوشباسشىسى نۇرسۇلتان نازاربايەۆتىڭ تۋعان اۋىلى ءۇشقوڭىر (بۇرىنعى شامالعان) اۋىلىنا بارىپ، شي جيپيننىڭ مىرزانىڭ جەرلەستەرىنىڭ سالەمىن ەلباسى نۇرسۇلتان نازاربايەۆتىڭ جەرلەستەرىنە جەتكىزەمىز»، - دەدى ءوز سوزىندە ح. داۋروۆ.
ايتا كەتەلىك، «قىتاي-قازاقستان» دوستىق جانە ىنتىماقتاستىق كەرۋەنى ءۇشقوڭىر اۋىلىنان كەيىن كونە ۇلى جىبەك جولى بويىنداعى ءىرى ورتالىقتاردىڭ ءبىرى بولعان - تاراز قالاسىنا اتتانادى. جوسپار بويىنشا 7- قازانعا دەيىن كەلىپ جەتۋى ءتيىس. ويتكەنى، 8- قازاننان باستاپ، تاراز قالاسىندا قازاق حاندىعىنىڭ 550 جىلدىعىنا ارنالعان كەڭ كولەمدى مەرەكەلىك شارالار باستالادى. كەرۋەن ادەتتەگىدەي كۇنىنە 25 شاقىرىمنان ءجۇرىپ وتىرادى.
اۆتور: جاپپاربەرگەن ايبوتا