يزرايلدە - داعدارىس، ەل ەكونوميكاسى تۇرالادى
بۇل تۋرالى جەرگىلىكتى ورتالىق ستاتيستيكالىق بيۋرو وكىلدەرى ءمالىم ەتتى، دەپ حابارلايدى 24.kz. سەبەبى سوڭعى ۋاقىتتا ەل ەكونوميكاسىنىڭ ءوسىمى كۇرت باياۋلاعان.
ەكىنشى توقسان قورىتىندىسى بويىنشا بۇل كورسەتكىش نەبارى %0,1 عا تۇراقتاپ، ەكونوميستەردىڭ بولجامىنان 3 ەسە از بولىپ شىقتى. ەل ەكونوميكاسىنىڭ تۇرالاپ قالعانى سونشالىق، قارىزعا بەلشەسىنەن باتقان گرەكيا ەكونوميكالىق ءوسىم جاعىنان يزرايلدەن وزىپ تۇر.
«يزرايل ەكسپورتى كۇرت تومەندەپ كەتتى. ەلدەگى اۋىر جاعدايدان، اسىرەسە كىشىگىرىم كاسىپكەرلەر وراسان زارداپ شەگىپ جاتىر. ال ءىرى ەكسپورتتاۋشىلار قايتا امالىن تاۋىپ، تىرشىلىك ەتۋدە. تۇتىنۋ كورسەتكىشتەرى دە تىم از. يزرايلدىكتەر شەتەلگە شىعىپ، دەمالۋدى ازايتپاعانمەن، ءوز وتانىندا باياعىداي ساۋدا-ساتتىق جاسامايتىن بولعان. وسى جايت ەل ەكونوميكاسىنا تاياق بولىپ ءتيىپ وتىر. كەلەر جىلعى جاعداي بۇدان دا قيىن بولۋى مۇمكىن»، - دەيدى ەكونوميست يۋري لەگكوۆ.