قاراعاندىنىڭ «جۇلدىزدار اللەياسىندا» ماقپال ءجۇنىسوۆانىڭ اتى جازىلعان جۇلدىزدى مەموريال اشىلدى
سالتاناتتى ءراسىم 18 -قىركۇيەكتە ساعات 19.00 دە باستالدى. كەنشىلەر قالاسىنا قايىرىمدىلىق كونتسەرتىمەن كەلگەن ماقپال ءجۇنىسوۆا جەرلەستەرىن انمەن تەربەتتى. ءانشاشۋ «جۇلدىزدار اللەياسىنىڭ» قۇرمەت كىتابىنا ءانشىنىڭ ەسىمىن جازۋدان باستالدى. جۇلدىزدى مەموريالدىڭ بەتىن اشۋ ءراسىمى ءارتىستىڭ قىزى مەرەي مەن وبلىس اكىمى نۇرمۇحامبەت ابدىبەكوۆكە بۇيىردى. ەڭبەگىنىڭ جوعارى باعالانعانىنا جانە حالىقتىڭ قولداۋىنا ريزا بولعان ءانشى ءتىپتى كوز جاسىن دا جاسىرمادى.
«كوپ راقمەت! قۇرمەتتى جەرلەستەرىم، قۇرمەتتى اعالار- اپالار، ءسىڭىلى- باۋىرلار! سىزدەردىڭ جۇرەكتەرىڭىزدە ەرەكشە ءبىر ورىن الدىم دەپ ويلايمىن. سودىقتان دا، ارينە ءوز ەلىمدە وسىنداي «جۇلدىزدار اللەياسى» بولا تۇرىپ، مەنىڭ اتىمنىڭ بولماي قالۋى مۇمكىن ەمەس ەدى. ەرتە مە، كەش پە ءبىر بەرەر دەگەن جۇرەكتە، ءوزىمنىڭ ويىمدا بولىپ ءجۇردى. ءبىراق، ەشقاشان ماعان جۇلدىز بەرىڭدەر اللەيادان دەپ ايتپاعان ەدىم. سىزدەرگە كوپ راقمەت. مەنى قۇرمەتتەپ، بەرگەندەرىڭىزگە!»، - دەگەن ءجۇنىسوۆا ءان سالدى.
سالتاناتتى كەشكە جۇلدىزدىڭ قىزى، اناسى، تۋىستارى قاتىستى. 13 جاستاعى مەرەيدىڭ ايتۋىنشا، بۇل ولاردىڭ وتباسى ءۇشىن كوپتەن كۇتكەن كۇن. اناسىنىڭ تانىمالدىلىعى مەرەيدى تەك قۋانتادى. «الايدا، كەي- كەزدە انامدى ۇزاق ۋاقىت كورمەيمىن. سەبەبى، ول كوپ جۇمىس ىستەيدى. مەن انامدى ماقتان تۇتامىن. ءبىراق، بولاشاقتا ءانشى بولعىم كەلمەيدى!»، - دەدى مەرەي.
ال، ءانشىنىڭ اناسى، سەكسەنگە تاياپ قالعان كەيۋانا قىزىنىڭ وسىنداي دارەجەگە كوتەرىلەتىنىن ءاۋ باستا اق بىلگەم دەيدى. «ماقپالىم جۇلدىز دەسە جۇلدىز. وسىعان ماقتانباعاندا، كىمگە ماقتانام. وسىنداي دارەجەگە جەتكىزىپ جاتقان قىزىم باقىتتى بولسىن! حالقىما، ەلىمە راقمەت ايتامىز. ەل- جۇرتىمىز امان بولسىن! قازاقستانىمىز امان بولسىن! وسىنداي انشىلەرىمىزدى دارىپتەپ جۇرەيىك!»، - دەپ اق جاۋلىقتى انا باتاسىن بەردى.
ماقپال ءجۇنىسوۆانىڭ جانكۇيەرلەرى ورتالىق ساياباق الانىنان كوپكە دەيىن تاراسپادى. كوبى ماقپالدى ءانشى دەپ سىيلاسا، ەندى بىرەۋلەرى جەرلەسىمىز دەپ ماقتان تۇتتى. ايتا كەتەيىك، ەسترادا جۇلدىزى ماقپال ءجۇنىسوۆا 1964 -جىلى 11 -قاڭتاردا قاراعاندى وبلىسى قارقارالى اۋدانى تەرەكتى اۋىلىندا دۇنيەگە كەلگەن.