استانا اكىمى قالالىق سەنبىلىككە قاتىسىپ، شىرشا كوشەتىن وتىرعىزدى - فوتو

استانا. قازاقپارات - بۇگىن استانا قالاسىنىڭ اكىمى ادىلبەك جاقسىبەكوۆ «ءبىز تازا قالا ءۇشىن» اتتى قالالىق سەنبىلىككە قاتىسىپ، «حازىرەت سۇلتان» مەشىتى جانىنا شىرشا كوشەتىن وتىرعىزدى.

«قازىرگى ۋاقىتتا ءبىزدىڭ قالامىزدا ەكولوگيالىق ايلىق ءجۇرىپ جاتىر. بۇل ۋاقىتتىڭ ىشىندە قالانىڭ كوشەلەرىن تازارتىپ، اعاش وتىرعىزامىز. بۇگىنگى شاراعا ءجۇز مىڭنان استام ادام قاتىسۋدا. ولاردىڭ ىشىندە پارلامەنت دەپۋتاتتارى، مەملەكەتتىك مەكەمەلەردىڭ قىزمەتكەرلەرى، مەكتەپ وقۋشىلارى مەن ستۋدەنتتەر بار. مۇنداي شارالاردىڭ تاجىريبەلىك ءمانى زور»، - دەدى قالا باسشىسى ب ا ق وكىلدەرىنە بەرگەن سۇحباتىندا.

ايتا كەتەرلىگى ەكولوگيالىق ايلىق بارىسىندا قالا كوشەلەرى مەن جول جيەكتەرى، اۋلا ىشتەرى تازارتىلىپ اعاش وتىرعىزىلۋدا. سونىمەن قاتار جاڭبىر سۋى اعاتىن جەلىلەر، ارىقتار تازارتىلىپ، ساياباقتار مەن گۇل باقتارىنداعى جاسىل كوشەتتەردى كۇتۋ بويىنشا ماۋسىمدىق اگروتەحنيكالىق جۇمىستار جۇرگىزىلۋدە.

سەنبىلىك كەزىندە استانالىقتار تال، ۇيەڭكى، قاراعاي، شىرشا، شەگىرشىن، تەرەڭتەردىڭ 4 مىڭعا جۋىق كوشەتىن وتىرعىزادى. سونداي- اق مەكتەپ، بالاباقشا، مەديتسينالىق مەكەمەلەردىڭ اۋلارىنا 3 مىڭنان استام اعاش ەگىلەدى.

مۇنان بولەك، شارا اياسىندا ستۋدەنتتەر، ەرىكتىلەر مەن اسكەريلەردىڭ قاتىسۋىمەن ەسىل، اقبۇلاق، سارىبۇلاق وزەندەرىنىڭ ارناسى مەن جاعالاۋى قوقىس پەن تۇرمىستىق قالدىقتاردان تازارتىلادى.

 

 اۆتور: مارلان جيەمباي