حالىقارالىق ساياتشىلىق جارسىنا قىتايدان ارنايى كەلگەن بۇركىتشى نۇرعالىم مۇسا ۇلى «تاڭشولپاڭعا» سۇحبات بەردى - كەسكىن
قاتىسۋشىلار 10 مەملەكەتتەن كەلگەن بۇركىتشىلەر.
ايتۋلى شاراعا وراي بۇگىن قازاقستان ۇلتتىق تەلەارناسىنىڭ «تاڭشولپان» باعدارلاماسىندا الماتى وبلىسىنىڭ ساياتشىلىقتان اعا جاتىقتىرۋشى، بۇركىتشى ءجۇنىس توقتاسىن ۇلى، قۇسبەگى نۇرعالىم مۇسا ۇلى جانە اقىن ۇلاربەك نۇرعالىم ۇلى قوناقتا بولدى.
قىتايدان ارنايى كەلگەن قۇسبەگى نۇرعالىم مۇسا ۇلى: «مەن 16 جاسىمدا بۇركىت سالدىم. قازىر جاسىم 70 كە تاياپ قالدى، قۇسبەگىلىكپەن ءالى اينالىسامىن. قىتايدا دا بۇركىت تارتىستار ءوتىپ تۇرادى قازاقتىڭ اتا مۇراسىن ناسيحاتتاپ كەلەمىز. بۇل ءداستۇردىڭ جاستارعا بەرەرى مول. سەبەبى، جاس كورگەنىنە ەلىكتەيدى» ، - دەيدى.
ال، اقىن ۇلاربەك نۇرعالىم ۇلى 10- سىنىپتا جۇرگەندە- اق «قىران» دەگەن ولەڭ جازعان ەكەن. ءوزى: «بۇركىتشىنىڭ بالاسى بولعاندىقتان، مۇنداي ولەڭ جازباۋ مۇمكىن ەمەس» ، - دەيدى. اقىن ولەڭىن ستۋديادا وقىپ بەردى.
قىران
قىپ- قىزىل تۇلكى سىتىلىپ شىعىپ بارادى،
سارشا قۇس بارىپ جازىققا قوندى، جارالى...
قۇلقىننىڭ قۇلى تاۋەكەل، وقىس ۇستاپ ەد،
ءالسىزدىڭ اتى ءالسىز عوي، راس، باياعى.
قۇزعىندار قانداي جەمتىكتى دايىن اڭدايدى،
ءومىرى ءسويتىپ وزەگىن ارەڭ جالعايدى.
كارى قۇماي مەن تازقارالار دا دامەتىپ،
قىزىل تۇلكىگە بارمايدى، ءبىراق قالمايدى.
جالپ ەتىپ قوندى جاداعاي جەرگە كۇشىگەن،
شىقپاعان تۇلكى وسى ەكەن ونىڭ تۇسىنەن.
قىبىرسىز جاتقان قىزىلعا عانا مىقتى عوي،
سىلەكەيى اققان ونىڭ دا جايىن تۇسىنەم.
قاراداي جەلمەن قاعىنىپ شىعىپ قارعالار ،
قارقىلداپ ۇشىپ قاناتى بارعا ءماز بولار.
تۇلكىگە اجال شاقىرىپ ىشتەن كۇبىرلەپ،
اقىرىن كۇتىپ كەزقۇيرىق جايمەن جورعالار.
سۋماڭداپ تۇلكى وزىنە تىشقان كەرەك بوپ،
بارادى جەلىپ باسى اۋعان جاققا دەدەكتەپ.
وڭكەي ءبىر جاسىق جانارلار سوعان قاداۋلى،
قىپ- قىزىل تۇلكى، قىپ- قىزىل ەت بوپ ەلەستەپ.
ونى دا بىلەد، بولماسا قازىر تۇلكى ىندەر،
ونى ويلاپ كەتسە تاماعى تۇگەل بۇلكىلدەر.
تۇڭلىك قاناتى كۇن كوزىن توسىپ، سابىلىپ،
جالعىز تۇلكىنى الا الماي ءجۇردى- اۋ، شىركىندەر !
سول ساتتە عاجاپ، عالامات ءبىر ءىس باستالدى،
ءبىر قىران كەلەد قىلىشتاي ءتىلىپ اسپاندى.
الگىلەر كورگە كىرگەندەي، ءسىرا، جوق بولدى،
پانالاپ قالدى- اۋ، بايعۇستار، جاقپار تاستاردى.
ايبارلى اقيىق ءدال وسى تاۋدىڭ تۇلەگى،
دوداسىن شىعارار دولى قىراننىڭ ءبىرى ەدى.
جەڭىلىس تاپسا تاۋ مەنەن تاستى شەڭبەكتەپ،
تەك جەڭىس ءۇشىن باسىندا بايگە تىگەدى.
ەكپىنىنەن بە، دىرىلدەپ كەتتى تاۋلاردا،
سوقتى ما قاتتى سورماڭدايلاردىڭ جۇرەگى.
كوردى دە قىران ءشۇيىلدى سولاي شانشىلىپ،
جان بەرمەك قيىن، كورسەتتى تۇلكى قارسىلىق.
جەتكەنشە قۋىپ، سابىرى كەتكەن تاۋسىلىپ،
قانشەڭگەل قىران تۇلكىنى قىستى قاۋسىرىپ.
وڭتايلى جەردەن جۇرەگىن عانا تارتتى دا،
ءبىر تاسقا قوندى، توياتىن ابدەن تاپتى ما.
حاس ساباز قىران سىلانىپ، كەربەز تارانىپ،
سامعادى تاعى قاناتىن قايتا قاقتى دا.
الگىلەر قايدا، قازىر- اق ءبارى ۇيمەلەر،
مۇجۋىر قالماي ىشەگى تالاي سۇيرەلەر.
ومىردە قانشا تەلمەڭدەپ وتكەن ولەزدەر،
بالاپانىندا باياعى سونى ۇيرەنەر.
بويىڭا ءبىتىپ الەمدە بارلىق سۇلۋلىق،
وتىرساڭ شىركىن، نامىستىڭ تۋىن تۇعىر عىپ.
كۇشىگەندەردەي كۇيكى تىرلىگىڭ قۇرىسىن،
اۋ، اعايىندار، قىرانشا ءومىر ءسۇرۋدى ۇق!