قازاق حاندىعىنىڭ مەرەيتويىنا ارنالىپ «اداسقاندار» دەگەن اتاۋمەن سەريال ءتۇسىرىلىپ جاتىر
21- عاسىردا ءومىر ءسۇرىپ جاتقان تانىمال ءانشى مەن پروديۋسەرى، جاس عالىم جانە قورعاۋشى - تورتەۋى اياقاستى اداسىپ، 500 جىل بۇرىنعى زامانعا ءوتىپ كەتكەن تۇستان سەريالدىڭ بارلىق قىزىعى باستالادى.
ءتىپتى سالت- ساناسى بەرىك قازاق حاندىعىنىڭ حالقى ولاردى كورىپ اقىرزامان كەلدى مە دەپ جاعاسىن ۇستايدى. ال زاماناۋي كەيىپكەرلەر ءبىر اۋىلدى دامىتۋعا كۇش سالادى. تارتىمدى يۋمورعا تولى تۋىندى جۇرت كوڭىلىنەن شىعادى دەيدى جاڭا زاماننان كەلگەن سۇلۋ قىز ايدانانىڭ ءرولىن سومدايتىن اكتريسا.
التىناي جولدىبايەۆا، ءانشى، اكتريسا:
- ءبىز كەلگەن كەزدە بولاشاقتىڭ ادامدارى كەلدى. اقىرزامان ورنايدى دەپ ويلايدى باسىندا ءبارى. مەن ءوزىمنىڭ اتىمنان زاماناۋي ءومىر ءسۇرۋدى ۇيرەتكىم كەلەدى. جانە ولارعا دا ۇيرەنىسىپ كەتەمىن. وتە قىزىق ول.
ال تەلەحيكايا بارىسىنداعى وقيعالار قيالدىڭ جەمىسىنەن تۋعان. ارنا باسشىلىعى بۇل ورايدا تاريحي تاقىرىپتارعا ادەمى ازىلمەن بارۋ ارقىلى كورەرمەندەردى وتانسۇيگىشتىككە باۋلۋدى ماقسات ەتىپ وتىرعانىن ايتادى.
باعدات قوجاحمەتوۆ، «31 - ارنانىڭ» باس ديرەكتورى:
- تەلەكورسەتىلىمنىڭ باستى ماقساتى - قازىرگى ۇرپاقتارعا، جاس قازاقتارعا، قازاق ۇلتىنىڭ بولاشاعىن ويلايتىن ادامدارعا ارنالعان. نەگە دەسەڭ، ءبىز قايدان شىققانىمىزدى بىلمەسەك، قايدا باراتىنىمىزدى بىلمەيمىز.
ۇزاقتىعى جارتى ساعاتقا جۋىق بولاتىن 20 ءبولىمدى سەريال قاراشا ايىندا كورەرمەندەرگە جول تارتادى. ال فيلم اۋديتوريالىق جاس تالعامايدى. قيال- عاجايىپ سارىنداعى قىزىققا تولى سەريالدى ەڭبەكتەگەن سابيدەن باستاپ ەڭكەيگەن قارت تا كورە الادى.
«31 - ارنا»