ەكولوگيالىق تاربيە
اسىرەسە اۋىلدىق جەرلەردە كەز كەلگەن جەرگە قوقىس تاستاپ كەتۋ، ساناۋلى شاقىرىم جەرگە ءجۇرىپ بارىپ قوقىس جاشىگىنە تاستاۋعا ەرىنەتىن ادامدار كوپتەپ كەزدەسەدى. بۇل ولقىلىقتار جوعارىدا اتالعان ەكولوگيالىق تاربيەنىڭ ناشار دەڭگەيدە دامۋىنىڭ كەسىرى.
مۇندايعا جول بەرمەس ءۇشىن الدىمەن ەندى ءوسىپ كەلە جاتقان جاس بۋىن تاربيەسىنە باسا نازار اۋدارعانىمىز ءجون. ەڭبەكتەگەن بالا شاعىنان تۋعان وتانىن سۇيۋگە تاربيەلەۋدى قولعا الۋ قاجەت. جاستايىنان بويىنا وتانسۇيگىشتىك سەزىمىن ءسىڭىرىپ وسكەن بالا قورشاعان ورتاسىن لاستاماي، باسقالاردى دا سوعان ۇندەيدى دەپ سەنەمىن.
قايتا قالپىنا كەلمەيتىن تابيعي رەسۋرستاردى وڭدى- سولدى شاشامىز، سۋدى، اۋانى لاستايمىز، كوپتەگەن تۇرمىستىق قوقىستار شىعارىپ جاتىرمىز. تابيعاتتى قورعاۋدى ءوز ۇيىڭنەن باستاۋعا بولادى، بۇل - سۋدى ۇنەمدەپ جۇمساۋ، ونىڭ لاستانۋىن تومەندەتۋ، اۋانى لاستايتىن زياندى زاتتارى جوق نارسەلەردى قولدانۋ، ت. ب. ءسويتىپ ەكولوگيالىق مادەنيەتتىڭ باسى وتباسىندا تۇزىلەدى.
بالالاردى تاربيەلەيتىن اتا- انا مەن ۇستازدار وتە ساۋاتتى، ءبىلىمدى بولۋى كەرەك. ودان كەيىنگى ەكولوگيالىق تاربيەنىڭ قالىپتاسۋى قوعامنىڭ قاتىسۋىمەن بولۋى كەرەك. بۇل كوبىنە ەلدىڭ باسشىلارىنا، ولاردىڭ ەكولوگيالىق مادەنيەتىنىڭ دەڭگەيىنە، قورشاعان تابيعي ورتانى قورعاۋ ماقساتتارىنا قانشالىقتى كوڭىل ءبولىنىپ جاتقانىنا بايلانىستى.
ەكولوگيالىق تاربيە بەرۋدى ءارتۇرلى جولدارمەن جۇرگىزۋگە بولادى. بۇل جەردە بۇقارالىق اقپارات قۇرالدارىنىڭ (ب ا ق) جانە قوعامدىق ەكولوگيالىق ۇيىمداردىڭ ءرولى زور. ب ا ق ءبىرىنشى بولىپ ەكولوگيالىق قولايسىز جاعدايلار تۋرالى دابىل قاعىپ حالىقتى قۇلاعدار ەتىپ وتىرۋى كەرەك. وسىنىڭ ارقاسىندا حالىقتىڭ ەكولوگيالىق سانا- سەزىمى ءوسىپ، كوتەرىلەدى.
ەكولوگيالىق تاربيە ەكولوگيالىق ءبىلىم بەرۋمەن تولىقتىرىلادى. بارىنە ورتاق پرينتسيپى بويىنشا ەكولوگيالىق تاربيە مەن ءبىلىم بەرۋ قوعامنىڭ بارلىق مۇشەسىن قامتۋى كەرەك. ەكولوگيالىق پاندەردى وقىتۋ جوعارى وقۋ ورىندارىنىڭ بارلىعىندا جۇرگىزىلۋى كەرەك. الايدا، جوعارىدا ايتىلعانداي، ەكولوگيالىق اعارتۋ جۇمىسى تەك وقىتۋمەن عانا شەكتەلمەۋ كەرەك.
تاربيەنىڭ باستى قۇرالى - ەجەلدەن كەلە جاتقان ەرتەگى جانرى. تابيعاتتى قورعاۋ جونىندە ەرتەگىلەر جازىلۋى ءتيىس. ارنايى قىزمەتكەرلەر التىن ۋاقىتتارىن شەتەل مۋلتفيلمدەرىن قازاقشاعا اۋدارۋعا جۇمساعانشا، وسىنداي عيبرات بەرەرلىك ەرتەگىلەرگە مۋلتفيلم جاساپ، وتاندىق دۇنيە ويلاپ تابۋى ءتيىس. وسى جولمەن ءارى بالا جۇرەگىنە وتانسۇيگىشتىك سەزىمىن ۇيالاتساق، ءارى ەكولوگيا جاقسارۋىنا ۇلەس قوسۋىمىزدىڭ باستاماسى بولماق.
كەمەلبەكوۆا كەرىمجان
قاز ۇ ۋ، 1-كۋرس ستۋدەنتى
massaget.kz