قازاقستان مەن رەسەيدىڭ جاھاندىق ازىق- تۇلىك نارىعىندا جەتەكشى ويىنشىعا اينالۋعا الەۋەتى جەتەدى - ق ر پرەزيدەنتى
«بۇگىنگى كۇنى ءبىز ءسوز قىلىپ وتىرعان ازىق- تۇلىك - بۇل ەڭ تۇراقتى ۆاليۋتا. ويتكەنى، مۇناي باعاسى قۇلدىراعانىمەن ازىق- تۇلىك ءار ۋاقىتتا دا بار. ءبىزدىڭ ەلدەرىمىز اگرارلىق- ونەركاسىپتىك ەل جانە بىزدەردىڭ مۇمكىنشىلىگىمىز زور. قازىرگى ادامزات بولاشاعىنىڭ شىنايى قۇندىلىعى بۇل اگرارلىق كەشەن»، - دەدى ەلباسى.
ق ر پرەزيدەنتىنىڭ اتاپ وتۋىنشە، بۇۇ مالىمەتتەرىنە سايكەس 2050 -جىلعا قاراي عالامشار تۇرعىندارى 9 ميللياردتان اسىپ جىعىلادى جانە جاھاندىق دامۋداعى الەمنىڭ كۇن تارتىبىندە تۇرعان ماڭىزدى ماسەلەلەردىڭ ءبىرى - «وسىناۋ ميللياردتاردى قالاي اسىراۋ قاجەت» دەگەن سۇراق.
«قازاقستان مەن رەسەي بۇل تۇرعىدا باعا جەتپەس بايلىققا يە. بۇل ۇلان- عايىر اۋىل شارۋاشىلىعى القابى، زور تاجىريبەسى بار ىرگەلى اگرارلىق عىلىم»، - دەپ اتاپ ءوتتى مەملەكەت باسشىسى.
«ەكى مەملەكەتتىڭ اۋىل شارۋاشىلىعىنا جارامدى القابىن قوسار بولساق، ول 435 ميلليون گەكتاردى قۇرادى. بۇل الەمدىك رەسۋرستىڭ 10 پايىزىنان اسادى. تابيعي كليماتتىق ايماق، قۇنارلى توپىراق بىزدەرگە اگرارلىق سەكتوردىڭ كوپتەگەن سالالارىندا، اتاپ اتيقاندا، استىق، كۇرىش، مايلى داقىلدار، جەم- ءشوپ، ەت جانە ءسۇت ونەركاسىبى باعىتىندا باسەكەگە قابىلەتتى بولۋعا مۇمكىندىك بەرەدى»، - دەدى ق ر پرەزيدەنتى.
ن. نازاربايەۆ رەسەي مەن قازاقستاننىڭ اگروونەركاسىپ كەشەنى بىرەگەي ەكسپورتتىق الەۋەتكە يە ەكەندىگىن باسا اتاپ ءوتتى.
«ازىق- تۇلىك تاۋارلارىنىڭ جيىنتىق يمپورتى تاياۋ جاتقان قىتاي، ءۇندىستان، كاسپي ماڭى مەملەكەتتەرى، ورتالىق ازيا ەلدەرىن قوسا العاننىڭ وزىندە 170 ميلليارد دوللاردان اسىپ جىعىلادى. ءبىزدىڭ قورىمىز وسىنداي»، - دەدى ق ر پرەزيدەنتى.
اۆتور: مارلان جيەمباي